Read Silimo Wahyu 18 Bible Online

Wahyu 18 - Silimo bible

Wahyu 18

¹Asogo moʼgulnesirikmu en eʼberlik e, at malaikat mu aʼge mesik ʼbogorl pam ʼbu agoma yethegi o. At ai anni modok aʼbik welat, ebe amolit eʼbakʼbage aʼbikmu re, aphwami ʼgwiangma aʼge ʼberlegat enebam ʼgwialisoma yethegi.

²Asogo ʼbu agarik iak loksogoat disogo moʼgulesi “O kota Babel lok aʼge ano modok erlagap pegi o! Modok wolloʼgen dagalak pegi o! Is o kota Babel odoktogwi aʼge ebano, hwe danian denago aʼge ʼgelaʼgeatma re, hwe ano ebam aganhan agoam, Tenniemit, oluk, aphwami enaʼgul onuk loʼbok ʼberlegat emin, ap ʼgain ononuk logo ʼgwiangma aʼge emin, moʼgulentasuam, is en ʼbabi tenhogu legesa ai o. Ye, at hwe ai ebam aganhan agoam tenhouwagoluk ebabut tago ai pam, aphwami ʼgwiangma aʼge di aʼge yu aʼge oʼgo saborogwi aʼge enilmu oruak ʼgelaʼge pagathwerlil laga legesa. Asogo togu legesa aʼgeat de, yogodak arat wolloʼgen dagalegesa yu o. O Babel lok aʼge wolloʼgen dagalegesa yu, hweinat! Asogo wolloʼgen dagalegesema re, Iblis osi enemin, muʼgat enebabut wiak aʼge enemin, Sue ai aʼge nagup erlak oluk ogoiye togwi aʼge ʼberlek emin, is onowi aga o,” oluk moʼgulesi.

⁴Asogo moʼgulesirikmu en eʼberlik e, at Allah iak ʼbogorl pam en mesik disogo egei, “Aphwami en, di aʼge yu aʼge onoʼborl pam louk-louk poluk lagai ai ʼgelaʼge, is aphwami en, at hwe ai emin wiak togwi modok welagai aʼge ai ʼbogorl hegit ligagama, an Allah nede eberak modok welegi ai en e, an en is wene enebam poluk wiagabenebik o. Is wiagabenebiselat, his an neiyagai aʼge is enemin welat, is enebabut wokho wiak tumu enemin wiagaphonobuano oluk e, is ugonoboluk hweiye liplau manis o.

⁵

⁶Ye, his en, at hwe ai wene ebam pagup aʼge en, at en is tagenebasu laga ʼgelaʼgeat, wene ebe ebam pasulat, mesik emin ebam louksogo pomup o. Ye, at en ik wogentasu ai ʼgelaʼgeat, olot het enebam pasu laga aʼge ai, oʼgo wene ebam pogulat, mesik emin ebam louksogo pomup o.

⁷At hwe ai, uʼgwarek en eselat, An nebe ʼgain welat, aphwami neragam onoboluk tenentarok welat e, sugwe nebegesema en nede wiak egirik nge taga leik no? Erlak o, oluk di aʼge yu aʼge ʼburl eʼgerlakma welat uʼgwarek en loksogo erliktago modok oruak ai ʼgelaʼgeat, nonouk loksogo tagalat, ede wiak emarik nge taga lemagoluk wene ebam pomup o.

⁸Asogo epasu ai en e, an Allah nanni aʼbikmu re, mesik erlige soʼboru obuk emin, ou edip emin wogeiktik, ebe odoukmu narlik pasuam aphwami logon enede wiak emarik nge togu lema ai o,” oluk ʼbogorl pam en osoma nesaʼgo hwelegis.

⁹At hwe ai ebe asogo odouk nasulat, asu hobu ligagoam, is ap ʼgain ononuk logo ʼgwiangma welagai aʼge, at hwe ai ebam aganhan agoam, sebelho mia en, ʼbabi tenhouwagoluk tagoam, tenhogu legesa aʼge ebano en enil yetholuk, ebaget ngi togwi nge togwi, modok welegesa.

¹⁰At ebaget nge asogo togulat, “At wiagap pesimu nonouk tago ai, nis emin wiagapnenebisoam nonouk tulno,” oluk, onogorlok en enebe walegat edik welat, nge disogo togu legesa, “At Allah en, his aphwami o Babel aʼge henanni aʼbik ano re, we, mesik erligeat wene henebam poluk wiagaphenebegei ai, eige, nebit e,” oluk, nge togumu entegis o.

¹¹Is asogo nge togukhwe, is aphwami di aʼge yu aʼge oʼgo saborogwi aʼge en e, disogo ogu legesa, “Nenaʼge di aʼge yu aʼge woluk lultik, is aphwami o Babel aʼge enebam oʼgo wogu lege aʼge ebano, pobuk salak enebam oʼgo wogu lomul,” oluk enebaget ngi togwi, nge togwi, modok welegesa.

¹²Asogo nge tugulat, “Di aʼge yu aʼge ai ebe re, oʼgo aʼbik ʼbalogwi aʼge emas emin, perak emin, helebeʼgen oʼgo aʼbigat ʼbalogwi aʼge onuk permata emin, mutiara emin, sum kain sutera sum emin, lenan sum emin, orogole re, wibeʼgen ʼbelak aʼge ʼgelaʼge emin, ʼborlu ʼbelak aʼge ʼgelaʼge emin, e eʼben op aʼge emin, wam lok ʼgelaʼge onuk gajah iak aʼge di aʼge yu aʼge heleʼgogwi aʼge emin, di aʼge yu aʼge e oʼgo aʼbik ʼbalogwi aʼge heleʼgogulat, tembaga aʼge heleʼgogulat, ʼbesimeʼgen aʼge heleʼgogulat, helep onuk pualam aʼge heleʼgogulat, togwi aʼge emin,

¹³eʼben op aʼge kami emin, hedit ʼgelaʼge emin, ʼbeʼga ʼgelaʼge emin, e mur aʼbosu emin, kemenyan aʼbosu emin, anggur eʼgen aʼbosu emin, minyak goreng emin, tepung emin, gandum emin, wam sapi emin, kuda emin, domba emin, ʼgwiang so ʼgelaʼge onuk kereta emin, aphwami enebe eneragam aʼge welemagoluk emin, ʼberlegat woluk lultik, salak enebam oʼgo wogu lomul,” oluk nge togu legesa.

¹⁴Asogo nge togulat, is Babel aʼge disogo moʼgulentigisa, “Di aʼge yu aʼge his henagai aʼge erlak agalat, di aʼge yu aʼge ʼburl eʼgerlakma welat, honogola henagaisogo welegep aʼge erlak agalat, tegeimu re, his en herasogo wo re, modok mia aga o,” oluk ogu legesa.

¹⁵Asogo egesarik, is aphwami di aʼge yu aʼge oʼgo sabusogo is Babel aʼge enebam saborogu legesa aʼge ebano en e, “Is aphwami o Babel aʼge di obotut yu obotut tagenebesi ai ʼgelaʼge, nis asogoat taknonobouwano,” oluk onogorlok en enebe walegat edik welat, enebaget nge togulat e, disogo ogu legesa,

¹⁶“His Babel aʼge honosum kain lenan sum aʼge orogole wibeʼgen ʼbelak ʼgelaʼge emin, ʼborlu ʼbelak ʼgelaʼge emin, ʼbuktak poluk, henalli aʼge emas aʼge emin, helebeʼgen oʼgo aʼbik ʼbalogwi aʼge onuk permata ʼgelaʼge emin, mutiara ʼgelaʼge emin, wogu legep ano re, we, mesik erlige arat almaregesa yu eige, nebit e,” oluk enebaget ngi togwi, nge togwi, modok welegesa. Is asogo togukhwe, is aphwami ik so lok aʼge onuk kapal woluk noʼgwi aʼge onuelak ap ʼgain emin, onosi ik so worogwi aʼge emin, is aphwami muon wogonoboluk lagai aʼge emin, is logon ik laut yeʼgelak aʼge petne di aʼge yu aʼge heratil noʼgwi aʼge emin, ʼberlegat, is aphwami Babel aʼge enebe odouk noʼgukhwe enasu hobu enil yetharok walekma edik welat, disogo ogu legesa,

¹⁷

¹⁸“Eige, nonogorlok o. O kota aphwami Babel aʼge onowiseli yu ʼgelaʼge, o di owi yu owi mesik oruak no? Modok erlak o,” oluk, ʼgwiang enaʼgul pam egilogo enebaget nge togulat disogo ogu legesa, “Eige, nede o. Is aphwami o Babel aʼge enaʼge di aʼge yu aʼge aʼbikmu re, nis nonoso oʼgo ʼbalogo nenilmu oruak aʼge ʼgelaʼge taknonobogwi aʼge anoat de, we, mesik erlige almaregesa yu nede o,” oluk ogu legesa.

¹⁹

²⁰Asogo ogukhwe, at mesik en e, is Allah eiyagai aʼge disogo moʼgulentesi, “Allah en e, his henaʼgulmu is o Babel aʼge wene enebam poluk wiagabenebegei ai en e, his ʼbogorl pam aʼge ʼberlegat honogola henagai hogulat, his Yesus en yoʼgo honoboluk perakhenebesi aʼge emin, his at iak moʼgulontogu legep aʼge emin, his Allah eiyagai logon emin, ʼberlegat honogola henagai hogulat, tip o,” oluk osoma hwelegis.

²¹Asogo osoma hwelegistikmu en eʼberlik e, at malaikat anni aʼbik aʼge mesik wagarik helep lok di aʼge yu aʼge damologwi aʼge ʼgelaʼge haʼboksogo ik laut yeʼgelakma ʼbelabiselat disogo egei, “At Allah en his aphwami o kota Babel aʼge, disogoat annisogo hwikhenta ʼbua o. Asogo hwikhenta ʼbuema re, pobuk aphwami en enil hontouwa modok erlak o.

²²Aphwami o di owi yu owi oʼgo saborogwi aʼge, ononuk erlak aʼge ʼgelaʼge aʼgeat de, ap his aʼge nak e, ononuk oruak aʼge welegesa. Ye, his en henasua aʼge pam aphwami o di owi yu owi enaʼgul onuk loʼbok, lalonobogu legebat o. Asogo togu legep aʼgeat de, is gitar worogwi aʼge emin, weni worogwi aʼge emin, meʼgin ele delak poluk ʼbiʼgong iak inghogwi ai ʼgelaʼge emin, ʼbiʼgong lok aʼge iak inghogwi aʼge emin, pobuk inghasuam iak enesaʼgo holua erlagat o. Ye, ap mesik di aʼge yu aʼge oʼbogun wiak heleʼgiso aʼge en heleʼgisoma enil houwa erlagat o. Ye, onsoʼboru gandum eʼgen aʼge damologukhwe helep oborlogouk oso aʼge ai, pobuk iak osoma enesaʼgo holua erlagat o. Ye, henesaga magale enil houwa erlagat o. Ye, ap en hwami wogonobogwiam onogola enagaisogo eniak ogwi aʼge enesaʼgo holua erlagat o,” oluk osoma hwelegis.

²³

²⁴Is aphwami o kota Babel aʼge en, aphwami Allah iak moʼgulontogwi aʼge emin, Allah eiyagai logon emin, enemep namogo waronobogulat, is aphwami logon ʼgwiangma warenebegisa aʼge ʼberlegat, is enat waronobogulat, tigisarikmu no oluk e, enemep eneʼgik orlogunmu oruak ai en, Allah en wene enebam poluk, wiagabenebegei ai o.