Read Silimo Wahyu 19 Bible Online

Wahyu 19 - Silimo bible

Wahyu 19

¹Asogo osoma hwelegistikmu en, eʼberlik e, aphwami aʼbik logolak ʼbogorl pam welat eniak loksogoat disogo ogumu hwelegis, “Nenaik Allah hanni aʼbik, ... Nenebe delnenebise legen aʼge, ... Harat erlikhobu, ... Erlikhobogu lege u ʼgelaʼge, ... ogu lege, ... Hat en wene enebam pasulat, noʼgorliselat, ... Demat nak ese legen aʼge, ... Hegitsogo nak ese legen ano en, ... Aphwami o Babel aʼge enebabut, ... Hwe danian nil denago aʼge ʼgelaʼge ebano en, ... Aphwami o di owi yu owi welagai aʼge, ... Wiagabonobogwi ai en, ... Wene enebam pegentik wiagabenebegen, ... Is en heragam aʼge enemep enamogo warenebegisa paget, ... Enaʼgulmu warenebigen ai en, ... Erlikhobogu lege,” ... oluk weni worogu legesa.

³Asogo werigisarik en, pobuk mesik worogulat e, “Nenaik Allah, ... Erlikhobogu lege, u ʼgelaʼge, ... ogu lege, ... Aphwami Babel aʼge enasu hobu, ... ʼGarok u erlakma en ligago modok oruak,” ... oluk ogu legesa.

⁴Asogo ogukhwe, is ap enarlue enebe 24 ebano emin, is Allah en walentesimu enelaluk welagai aʼge enebe ugan ebano emin, enemin en at Allah ebe ʼgain welago aʼge ebalema oruakma eragam ʼgoluk, ondogorlu pam hurotluk erliktogulat disogo ogu legesa, “Demat ema,” u ʼgelaʼge, “Amin,” ogulat, “Erlikhobogu lege,” u ʼgelaʼge, “Haleluya,” ogulat, ogu legesa.

⁵Ye, Allah ʼgain welago aʼge ebalema ebano en disogo ogumu hwelegis, “His Allah eragam aʼge ononuk oruak aʼge emin, ononuk erlak aʼge emin, ʼberlegat Allah honogorloksogo welegep aʼge nenaik Allah erliktogu lemis o,” oluk ogumu hwelegis.

⁶Asogo ogumu nesaʼgo hwelegistikmu en eʼberlik e, aphwami aʼbik odoktak welat, eniak e, ik hurl lok aʼge iak oso ʼgelaʼge emin, orlolu iak logat ʼbageselat en iak orlu orlu lasu ai ʼgelaʼge emin, disogo ogu legesa, “Nenaik Allah erliktogu lege, u ʼgelaʼge, Haleluya, ogu lege. Hat hanni modok aʼbikmu, di aʼge yu aʼge tu nak ano en, yogodak arat heragam nenebegentik tennentarok welegen o.

⁷Asogo welat, Domba Emalik ugwe ʼgelaʼge waigoluk owi arat dakha egeimu, at ugwe ʼgelaʼge ano uʼgwarek en arat leik-louksogo pagathwerlesirikmu no oluk e, ebe arat horlouwa ai en nonogola nenagaisogo, aʼgoluksogo, at erliktogu lomok o.

⁸Ugwe asogo hwerlaigoluk, osum lenan aʼge il ʼgut nogorlok aʼge ʼbuktak welemagoluk wogesimu hegi o. Sum op ai ebe re, aphwami Allah eiyagai enebabut hegitsogo togwi aʼge aiat o,” oluk ogu legesa.

⁹Asogo ogumu hwelegistikmu en, at malaikat ano en disogo moʼgulnesi, “Is aphwami Domba Emalik ugwe ʼgelaʼge hwerlasulat, seni sogo naumagoluk yoʼgo enebegesa aʼge nak onogola enagai houwak o, oluk pelal womup o,” oluk moʼgulnesirik, pobuk moʼgulneselat e, “Wene yu re, demat Allah en egei aʼge o,” oluk moʼgulnesi.

¹⁰Asogo moʼgulnese lagama, an en, at malaikat ano eragam ʼgoluk nodogorlu pam hweriogo welat erliktiogoluk tegis aʼgeat de, at en moʼgulneselat e, “Mo in. Asogo erliknobogun. An nebe re, hat emin, harilak emin, his ʼgelaʼge henemin hegit o. Wene Yesus en moʼgulnentesi aʼge moʼgulentil noʼgwi aʼge ai, at Allah Arogun en onogola ʼgagalogo moʼgulontogwiam moʼgulontogwi ai, wene edip at Yesus en moʼgulnentesi aiat o. Holuk e, at Allah yat erliktuok o,” oluk moʼgulnesi.

¹¹Wene asogo moʼgulnesirikmu en eʼberlik e, ʼbogorl hielak pasuam wam onuk kuda asu ʼgut aʼge oʼborl pam, ap mesik onuk e, “Ebabut Heʼbisogo Tago” aʼge ogulat, “Demat Nak Oso” aʼge, ogulat, ogwi aʼge, hweriogo welat, weim hegitsogo ebeselat, wene hegitsogo enebam pasulat, noʼgorliselat, til nosoma yethegi o.

¹²Ap ai il e, odouk magale ʼgelaʼge, ye, aʼgul pam e, ʼgare-ʼgare ebe aʼbik ap ʼgain ononuk logo aʼge ʼbuktak onobogwi ai ʼgelaʼge ʼbuktak o. Ye, at onuk ʼgelaʼge mesik mu aʼge at ebetne pelal wogo oruakhwe aphwami ʼberlegat eneperlak, we, at uʼgwarek nak aluk aʼge pelal wogo welaga hegi o.

¹³Ye, at ai osum yat mep egelik aʼge ʼbuktak, ye, onuk enalukmu ogu legesa re, “Allah Iak”.

¹⁴Asogo ʼbuktak nosoma, ap eʼgaragun logon ʼbogorl pam aʼge aʼbigat logolak onosum kain lenan sum ʼgut aʼge ʼbuktak, ye, enebe loʼbok onuam kuda asu ʼgut aʼge oʼborl pam hweriogo welat, at eʼberlik noʼgumu yerentegis o.

¹⁵At asogo neselat, aphwami enaʼgul onuk loʼbok ʼberlegat mabenabonobouwa aʼge, ʼgarok eʼgat aʼbik aʼge emdelema en liplau wagoma hegi o. Asogo mabenabonoboluk ʼbouwaʼgun ʼbesimeʼgen anni aʼbik ai ʼgelaʼge, at iak anni pam aphwami tenagonoboluk, aik Allah anni modok aʼbikmu re, di aʼge yu aʼge tu aʼge nak ano en e, olot het emarik, wene enebam pasuam anggur eʼgen aʼbosu naʼguogoluk ebalema sagalogwi ai ʼgelaʼge, at oyuk en al ʼbesilonobua aʼge hegi o.

¹⁶Ye, at onuk ʼgelaʼge mesik disogo, “Ap ʼgain ononuk logo aʼge ʼberlegat emin, onue lak ʼgain ʼberlegat emin, onue ʼgain Nonuk Logo re, anat o,” oluk osum yat aʼge pam emin, agaʼgu pam emin, pelal wogo oruakma hegi o.

¹⁷Asogo hegirikmu en eʼberlik e, at malaikat mesik mo pam edik welat e, iak loksogo is di sue yu sue ʼberlegat ʼbogorl petne ʼburl eba darak nosoma, disogo moʼgulentasu laga, “Ap ʼgain ononuk logo aʼge emin, weim wene eiye aʼge emin, onosi heberlak aʼge emin, wam kuda ebe emin, ap oʼborl pam huragalat noʼgwi aʼge emin, aphwami ononuk oruak aʼge emin, ononuk erlak aʼge emin, eneragam aʼge emin, enematek welagai aʼge emin, ʼberlegat Allah en warenebegeitik eneino aʼbigat henebesi aʼge nagup en, henebe odoktu manis o,” oluk osoma hwelegis o.

¹⁹Asogo hwelegistikmu en, yethegi ʼgal e, mene orlomene ʼgelaʼge lok aʼge ano osi ʼgain ononuk logo aʼge ʼgwiangma aʼge emin, onosi tentara aʼge emin, enemin en, at wam kuda oʼborl pam hweriogo aʼge ano emin, osi tentara aʼge emin, enemin weim obuogoluk enebe logolak oruakma entegis o.

²⁰Asogo oruakma, at mesik pageat wagarik, “An Allah iak moʼgulhentasu legi o,” oluk iak eseiyat at mene orlomene ʼgelaʼge ano ilem elalin taga laga aʼge ano en, lalenebisokhwe demat ʼgelaʼge, is aphwami logon en, “Nis at mene orlomene ʼgelaʼge ebabut wiak aʼge yu osi o,” oluk silo ʼgelaʼge enebam ʼbalogulat, enede dogwi at mene orlomene ʼgelaʼge lok aʼge ano ebe ʼgelaʼge ogut heleʼgik aʼge ano pam heʼberik poluk, togu legesa aʼgeat de, yogodak at mene orlomene ʼgelaʼge ano ebe emin, iak esei lalenebise laga aʼge ano emin, eʼbirek tenagonoboluk, herle wusogo ik laut odouk aʼge yeʼgelakma hwedali al ʼgelaʼge eʼben wiak aʼge onuk belerang emin-emin magale nasu modok welagoma eba enebe enelaluk ʼgaʼgo peragenebasumu hegi o.

²¹Asogo yethasulat, aphwami is onosi ʼberlegat ugonoboluk legesa aʼge, at wam kuda oʼborl pam hweriogo nese laga aʼge ano emdelema en ʼgarok liplau wagalat warenebise laga. Asogo enebe wusogo enebesimu di tue yu tue ʼberlegat wegesarik, eneino onogum ningsogo noʼgumu yerentegis o.