Read Silimo Wahyu 2 Bible Online

Wahyu 2 - Silimo bible

Wahyu 2

¹Asogo moʼgulnesirik pobuk disogo moʼgulnesi, “An neʼgik ʼbekhit akhit hwesagal ebe sabiren tenak welat, esaga ʼgwialogwi aʼge ebe sabiren oyuk yogo emas aʼge heleʼgik ano esaʼgoʼgwe oruakhwe, nebe ʼburl welat nese legi aʼge ano en wene yu moʼgulheik, At malaikat Allah eiyagai o Efesus odoktogwi aʼge tenentarok welago aʼge ano, wene an en is moʼgulentaik aʼge yu, hat en pelal wokho eʼbek perakpemen o,

²His en an nebaget henepe mosogo welat henannisogoat togulat, is logon wiak togwiam e, Onomuat o, oluk, enesaʼgo werak erlakma en ugonobogu legep erlak o. Ye, is logon Yesus en peragonobou wago aʼge ʼgelaʼge takpoluk wegesarik ogwiam, his en e, Eniak esei ogwi, oluk enebabut enak aʼgeat ʼbalogu legep o. Henebabut asogo togu legep ai, an naluk o.

³Ye, aphwami en an nebaget di obotut yu obotut takhonobogukhweat, his en e, At nenebit, oluk, uknobo erlakma en henepe mosogo welegebat o.

⁴Asogo aʼgeat de, naduk henede an nebam hwedik welegep ai ʼgelaʼge, yogodak asogo welegep erlak ai nak e, Wiak togwi, oluk henebabut ʼbalise legi o.

⁵Ai holuk e, his ʼgoboksogo modogat pegeptik welegep ai, henede ebetholuk, henebabut heberloroguptik e, naduk togu legep ano ʼgelaʼgeat togu lomup o. Asogo togup erlak holuk e, an nebe weiktik e, his en aʼge esaga ʼgwialogwi aʼge ai ebalema en henokho wokhaik o.

⁶Asogo aʼgeat de, is logon ap Nikolaus ebabut wokho togwiam, an nebit entasu legi ʼgelaʼgeat, his henebit ontogu legep ai nak e, op o.

⁷Wene egi aʼge ai, at Allah Arogun en Allah eiyagai o di owi yu owi odoktogwi aʼge moʼgulentasu ai, henesaʼgo holu holuk e, opsogo hwelip o. At ap sa en anni ema holuk e, Allah iabukmu eʼgen enelalugabenebiso aʼge nouwagoluk wogeik o, oluk wene ʼberlegat moʼgulentegis aʼge ai, pelal wokho eneʼbek perakpomup o,” oluk moʼgulnesi.

⁸Asogo moʼgulnesirik, pobuk moʼgulneselat, “An e, edipmu en ʼbekhit edeʼbimu modok weleik aʼge ano arat waregirik en pobuk nelaluk egirik welago aʼge ano en, wene yu moʼgulheik o, At malaikat Allah eiyagai o Smirna odoktogwi aʼge tenentarok welago aʼge ano, wene an en is moʼgulentaik aʼge yu, hat en pelal wokho eʼbek perakpemen o,

⁹His demat aʼge paget henebe ʼgain henilmu oruak aʼgeat de, is aphwami Iblis eiyagai aʼge de, eniak eseiyat, Nis nenebe Yahudi aʼge, oluk ogulat, his hononuk wiagapsogo honobogwiam, henebe henerlagaik wiaksogo welegep ai, an nalugat o.

¹⁰At Iblis en his henede ʼgagaluagoluk, aphwami his aʼge pema akhit eneʼgik herle wusogo onoboma, agauwa 10 pam di obotut yu obotut hogu lema ai re, honogorlok hagup o. Di obotut yu obotut asogo takhonobogukhwe, henede nebam heʼberik poluk, an nemin hwedik oruakma warorogup holuk e, sa omut oruak sa omut erlak oluk pungtak lagaimu en, is enanni agai aʼge oʼgo ʼgare-ʼgare ʼbuktak onobogwi ai ʼgelaʼge, oʼgo noburlal-hoburlal takhenebaik o.

¹¹Wene moʼgulentegis ai Allah Arogun en, Allah eiyagai o di owi yu owi odoktogwi aʼge moʼgulentasu ai, henesaʼgo oruak holuk e, opsogoat hwelip o. Sa en anni ema holuk e, is logon waremarik pobuk modok-modok warema ai, enemin wiagabenebaik erlak o, oluk wene ʼberlegat moʼgulentegis aʼge ai pelal wokho eneʼbek perakpemen o,” oluk moʼgulnesi.

¹²Wene asogo moʼgulnesirik, pobuk moʼgulneselat e, “An ʼgarok eʼgat pema-pema merak aʼge neʼgikmu tenak welegi aʼge ano en wene yu moʼgulheik, At malaikat Allah eiyagai o Pergamus odoktogwi aʼge tenentarok welago aʼge ano, wene an en is moʼgulentaik aʼge yu, hat en pelal wokho eʼbek perakpemen o,

¹³His e, Iblis ebe ʼgain welat aphwami logon eragam tenentarok welagoma eba welegep ai an naluk o. Asogo Iblis owi pamat welat, an nomlogo Antipas en nobok ebit om erlakma en, ebabut heʼbisogo welat moʼgulentil denagoma, is logon en ebe honogola en worugumu, his en e, Nis nenede Yesus ebam heʼberik welege ai erlak, nenebit, oluk ʼgoboksogo uknobo erlakma en, nemin hwedik modok welegep ai, henebabut an naluk o.

¹⁴Asogo aʼgeat de, wene weiyat logon an nebit aʼge togu legep aʼge ai moʼgulhentaik o. Pageat aphwami Israel aʼge enebe wiak emagoluk, wam dogwi pam werak aʼge ʼgwerik noʼgulat, ʼbabi tenontogulat, tuagoluk, ap Bileam en Balak moʼgulesimu, at en enede ʼgagalise laga aʼge ai, his logon at owene ai tenak welegep hentegis o.

¹⁵Ye, his logon en, wene ap Nikolaus en moʼgulentesi aʼge owene ai wik-wok tenak welegebat ai o. Asogo togu legep ai, an nebit modok epasu legi o.

¹⁶Nebit epasu legi ai en e, his wiak togu legep aʼge ai ukpoluk henebabut heberlomup o. Asogo heberlorogup erlak holuk e, his ʼgarok an nemdema aʼge pam wathenebiogoluk perleneat weik o.

¹⁷Wene moʼgulentegis ai, Allah Arogun en is Allah eiyagai o di owi yu owi odoktogwi aʼge moʼgulentasu ai, henesaʼgo oruak holuk e, opsogo hwelip o. Sa en anni ema aʼge holuk, soʼboru onuk manna hisogo aʼge wogeselat, onuk ʼget aʼge tualogo helep ʼgut aʼge pam pelal wokho wogeselat, tik o. Onuk pelal wogo ai re, is logon eneperlak. We, at onuk pelal wogo horlouwa aʼge ai nak aluk ema aʼge wogema, oluk ʼberlegat moʼgulentegis aʼge ai, pelal wokho eneʼbek perakpomup o,” oluk moʼgulnesi o.

¹⁸Asogo moʼgulnesirik pobuk disogo moʼgulnesi, “An Allah omlogo nil e, odouk magale ʼgelaʼge. Ye, noyuk e, tembaga odouk olomu werarogwiam amolit pasu ai ʼgelaʼge ano en wene yu moʼgulheik o. At malaikat Allah eiyagai o Tiatira odoktogwi aʼge tenentarok welago aʼge ano, wene an en is moʼgulentaik aʼge yu, hat en pelal wokho eʼbek perakpemen o,

¹⁹His henebabut togu legep aʼge ai an naluk o. Is aphwami muon henedesogo welegep aʼge ai emin, henebit om erlakma en henebabut heʼbisogo welegep aʼge ai emin, is logon lerontogu legep aʼge ai emin, is logon en di obotut yu obotut takhonobogukhwe, henepe mosogo welegep ai emin, ʼberlegat an naluk o. Ye, naduk weisogo ʼgelaʼge togu legep aʼgeat de, yogodak modok aʼbik togu legep ai, an nalugat o.

²⁰Asogo aʼgeat de, at hwe Izebel ano en iak eseiyat, An nebe Allah iak moʼgulentasu legi aʼgeat o, oluk aphwami an neragam aʼge enebe aʼbigat ʼbabi tenogu lemagoluk moʼgulentasulat, wam dogwi pam werak aʼge ʼgwerik noʼgu lemagoluk moʼgulentasulat, tagokhwe, his en e, wene yagoum erlakma en, At omuat, oluk ukpogu legep ai nak e, Is wiak togwi, oluk henebabut ʼbalise legi o.

²¹At hwe ai, ʼbabi tenhouwagoluk tago aʼge ai ukpoluk ebabut heberlemagoluk yetharok welegi aʼge re, at tago aʼge ai, ukpoluk ebabut heberlom e, ebit o.

²²Wene yu henede eberak wolomup o, Is ap logon en, hwe ai emin ʼbabi togwi aʼge ukpoluk, enebabut heberlagai erlak holuk e, is nonouk tuagoluk, hwe ai nogo osoma ebano hwikhai louwa o.

²³Asogo tagoam, is Allah eiyagai o di owi yu owi odoktogwi aʼge ʼberlek en enil ontoluk, is en e, At Allah re, aphwami enede eberogwi aʼge ai emin, enede ʼgagalogwi aʼge ai emin, alukmu re, aphwami nenebe loʼbok nenebabut togu lege aʼge hegitsogoat wene nenebam pasulat, oʼgo woknentasulat, tua o, oluk, an pobi nobuagoluk, is aphwami at hwe ai iak wogwi aʼge enebe warenebigat o.

²⁴Asogo aʼgeat de, aphwami logon en, Hwe ai owene, Iblis iak ogola aʼge moʼgulentasu, oluk ogwi aʼge ai, his aphwami o Tiatira aʼge pema akhit en, wene ai moʼgulogulat, henaluk agalat, tu erlak ai en e, his en wene eʼgin aʼge mesik togup en moʼgulhentaik erlak o.

²⁵We, an weik ai owan wom erlak oruakhwe, wene wegep aʼge aiat heneʼgik ningsogo tenak wolomup o, oluk moʼgulhentegis ai o.

²⁶Sa en an nagai aʼge tago modok hwerli o ologun pam anni lai louwa holuk e, an naik en aphwami enaʼgul onuk loʼbok, an en tenentarok welemagoluk ediknoboluk eiyerak nebesi ai ʼgelaʼge, at anni lai louwa aʼge ai asogoat tenentarok welemagoluk edikpoluk e, eiyerak poma, aphwami en ʼbouwaʼgun ʼbosie emeʼgen aʼge pam ik eʼbe ʼgwiang domul aʼge pam heleʼgik aʼge damuk-demaktak pogwi ai ʼgelaʼge, at iak annisogoat moʼgulentasulat, tenentarok welema o, [1]

²⁸Ye, hwesagal wap o mo orlu ago hegit en orlu ago aʼge ano wogeigat o, oluk moʼgulhentegis aʼge ai,

²⁹Allah Arogun en is Allah eiyagai o di owi yu owi odoktogwi aʼge moʼgulentasu ai, henesaʼgo oruak holuk e, opsogo holip o, oluk moʼgulentegis aʼge ai, pelal wokho eneʼbek perakpomup o,” oluk moʼgulnesi.