Read Silimo Wahyu 20 Bible Online

Wahyu 20 - Silimo bible

Wahyu 20

¹Asogo entegistikmu en, eʼberlik e, at malaikat mesik ʼbogorl pam en ʼgoduk horogwi aʼge onuk kunci ʼgwiang ogola opma orogobu aʼge emin, herle ʼgoʼbi ʼbesimeʼgen aʼge emin, eʼgikmu woluk ʼbu agoma yethegi o.

²Asogo woluk ʼbu agarik, at ʼgosu ʼgelaʼge lok o page enat welaga aʼge onuk Iblis ogulat, Setan ogulat, ogwi aʼge ano, ebe tenak poluk, di aphwami yu aphwami lalenebiso ai ʼgelaʼge lalonobu erlakma en 1.000 tahun eʼgik herle werak ʼgwiang ogola opma orogobu welemagoluk ʼbelebak pesirik, ʼgoduk deʼgalim lasogo ʼgwelebak pogwi ai ʼgelaʼge, ʼgoduk kunci lasogo pasumu hegi o. Eba welemarik en, hebilogo peligom hegitsogoat il mesigat hebelik welemagoluk hebilogo lagabak porluma o.

⁴Asogo hegirikmu en, eʼberlik e, ap ʼgain enebalema aʼbik oruakma eba enebe aʼbigat ʼgain welat, aphwami logon eneragam onoboluk tenentarok welat wene enebam pogulat, noʼgorlogulat, togu lemagoluk eiyerak enebegesema entegis o. Ye, mesik hegi re, is aphwami mene orlomene ʼgelaʼge lok aʼge ano emin, dogwi at ebe ʼgelaʼge ogut heleʼgik aʼge ano emin, erligonobu erlakma en, onuk tuelak pelal wogo aʼge ano enede weʼgerlogo eneʼberli pam de a? Eneʼgik pam de a, wo erlakma en ukpoluk, Yesus til denaga laga aʼge moʼgulentil denagai aʼge paget emin, Allah iak paget emin, onoʼgorlop ʼbalogo warenebegisa aʼge arat togolik enelalugabonobogulat, edigenebesirik, at Kristus emin aphwami logon eneragam onoboluk tenentarok oruakma en, mo ligom ʼbugom osokhwe 1.000 tahun oruakma entegis.

⁵Aphwami waregesa aʼge ai naduk enelalugabenebegeitik edigenebasumu entegis. Asogo aʼgeat de, is aphwami waregesa aʼge pema akhit logon nak e, o mo ligom, ʼbugom, osokhwe togolik enelalugabonobo erlakma en 1.000 tahun tuagoluk enebesimu oruakhwe entegis o.

⁶Is aphwami naduk waregesa aʼge logon pobuk werak modok welemagoluk wene enebam poluk waronobumu warema. Aʼgeat de, is logon naduk togolik enelalugabonobua, enebe Allah paget onobouwa aʼge ai nak e, onogola modok enagai houwa o. Is ai pobuk warom erlak welat, enebe Allah emin, Kristus emin, eʼbirek eiye emarik, o mo ligom, ʼbugom, osokhwe 1.000 tahun pam, is Kristus emin aphwami logon eneragam onoboluk tenentarok welema entegis o.

⁷Asogo entegistikmu en, eʼberlik e, o mo ligom, ʼbugom, osokhwe, 1.000 tahun arat wolotluk en, ologun ʼgoboksogo re, Iblis eʼgik herle werak aʼge ano herle hebilogo porluma o.

⁸Asogo porlu agoam e, weim obuogoluk, aphwami enaʼgul onuk loʼbok ʼbogorl edip-edip oʼgut ugan pam erabu akhit en, orogobu akhit en, etleba akhit en, yema akhit en, welagai aʼge lalenebiogoluk enede edikpil lasumu hegi o. Ai re, o onuk Gog aʼge emin, Magog aʼge emin, eneʼbek weim yoʼgo lagarik, enebe modok aʼbik ik ʼberlik laut esaʼgoma welago ai ʼgelaʼge odoksogo enebesimu oruakma entegis o.

⁹Asogo odoktigisarik, aphwami Allah eiyagai o kota Allah owi seli ede hwedik aʼge ano pulholuk oruakma, o lasogo enebe waronobuogoluk ʼbetesogo ʼgumogoluk togumu re, odouk ʼbogorl pam en ʼbu agalat, enebe ʼberlek odouk en perlengsogo nasumu entegis o.

¹⁰Asogo nasukhwe, at mene orlomene ʼgelaʼge ano emin, at mesik en, “An Allah iak moʼgulentasu legi o,” oluk iak eseiyat lalenebiso aʼge ano emin, ik laut odouk aʼge yeʼgelakma hwedali al ʼgelaʼge eʼben wiak aʼge onuk belerang emin-emin magale nasu modok welagoma eba haʼboksogo ʼbelabenebegei aʼge ano eba oruakma, Iblis ano pobuk eneʼbek haʼboksogo hwikha ʼbegeimu enemin eba welat, hup erlige nonouk togwi modok welema entegis o.

¹¹Asogo hegirikmu en, eʼberlik e, Allah ʼgain welagoma ebale lok ʼgut aʼge oruakma, at ebe eba oruakma hegi. Asogo oruakma ʼbogorl, ʼgwiang, ʼberlegat, at ogoiyesogo erlak agarikmu no oluk e, pobuk enil ho aʼge erlak agoma hegi o.

¹²Asogo erlak agokhwe, aphwami waregesa aʼge ononuk oruak aʼge emin, ononuk erlak aʼge emin, at ʼgain ebalema oruak ano orogolema edik oruakma entegis o. Asogo oruakhwe, suesiʼga ʼberlegat hebilogulat e, suesiʼga mesik aphwami enelaluk modok welemagoluk obabonobua aʼge nak ononuk pelal wogo aʼge hebeliselat, taga laga. Asogo hebilholuk, is aphwami waregesa aʼge enebabut togu legesa aʼge suesiʼga eba pam pelal wogo aʼge hegitsogoat wene enebam pasulat, noʼgorliselat, tisoma hegi o.

¹³Ai ʼgelaʼgeat, aphwami pema akhit waregesarik, ik laut yeʼgelakma welagai aʼge, ik laut en pelalogo lebigonobou wagalat, aphwami warotluk ʼgwiang ogola opma orogobu ʼbigisa aʼge, at waragai edip emin, opma orogobu emin, eiye welago aʼge ano en onoborlu agalat, tisoma re, at Allah en is enebe loʼbok enebabut togu legesa hegitsogoat wene enebam pasulat, noʼgorliselat, tisoma hegi o.

¹⁴Wene asogo enebam pouwa ai re, suesiʼga is aphwami logon enebe loʼbok enelaluk modok welemagoluk obabonobua aʼge nak, ononuk pelal wogo ano pam wogo erlak aʼge holuk, asogo ik laut odouk yeʼgelak aʼge ai pam haʼboksogo ʼbelagenebasulat, ʼgwiang ogola orogobu emin, waragai edip emin, eminat haʼboksogo ebayat ʼbelagenebasumu hegi o. Asogo ʼbelagenebasu laga ai re, naduk lodu paget warotlukmu en, pobuk warema re, ik odouk aʼge yeʼgelakma ʼbelagonobua aiat o.