Read Silimo Wahyu 21 Bible Online

Wahyu 21 - Silimo bible

Wahyu 21

¹Asogo hegirikmu en, eʼberlik e, Allah en ʼbogorl emin, ʼgwiang emin, naduk aʼge erlagap pasulat, ik laut yeʼgelak aʼge erlagap pasulat, tegeitik, ebalema re, ʼbogorl emin, ʼgwiang emin, ʼget aʼge heliʼgogo pesimu oruakma hegi o.

²Asogo heliʼgogo pesirik, at uʼgwarek owi seli o kota Yerusalem ʼget aʼge, hwami onogunlak horlouwagoluk enalli aʼge leik-louksogo wogwi ai ʼgelaʼge, at oruakma ʼbogorl pam en ʼbelabu agoma hegi o.

³Asogo hegirikmu en, pobuk nesaʼgo hwelegis ʼgal e, at Allah ʼgain welagoma ebalema ano en, at mesik iak loksogo eselat e, “Yethemit! Allah aphwami enemin modok welema aʼge, owi ai yethemit! Asogo welat, is at eiyagaiat welema, ye, at Allah is enaik enede ebam heʼberik welema aʼgeat welat, emin modok welema o.

⁴Asogo welat, di wene yu wene naduk aʼge erlagap poluk, at en is enil aʼbosu arat hosogo pesirikmu no oluk e, enebe waraga lema erlagat, enede wiak aga lema erlagat, nge togu lema erlagat, nonuk togu lema erlagat o,” oluk osoma hwelegis.

⁵Ye, at Allah ebe ʼgain welagoma ebalema ebano welat, disogo egei, “Di aʼge yu aʼge ʼberlegat ʼget aʼge walsogo pegi aʼge yema yethemit, oluk egeitik e, an disogo moʼgulnesi, “Wene yu paget, aphwami en e, Wene ai demat, oluk pobi tu aʼge ai en e, pelal womup o,” oluk moʼgulnesi.

⁶Asogo moʼgulnesirikmu en, eʼberlik mesik disogo moʼgulnesi, “Edip emin, edeʼbi emin, anatma, an nebe re, edipmu en ʼbekhit, edeʼbi pam notok modok weleik aʼge en, ik nele hogwi aʼge ik enelalugabenebiso aʼge elarukmu en naʼgogo oʼgo erlak weat wogentasu leik o.

⁷At sa en anni ema aʼge holuk e, wene ʼberlegat egi aʼge ai, at eiye welema o. Asogo eiye welat, an Allah at aik ede nebam heʼberik welema aʼgeat welema, ye, at an nomlogoat welema o.

⁸Asogo aʼgeat de, is aphwami logon onogorlok modok aʼbik aʼge emin, Allah iak wik-wok en ukpogwi aʼge emin, Allah emelmel aʼge togwi aʼge emin, aphwami waronobogwi aʼge emin, hwami yogunat tenontogulat, tenontouwagoluk togulat, togwi aʼge emin, huo ʼbamo waronobogwi aʼge emin, dogwi asua pam heʼberik welat, erliktogwi aʼge emin, eniak esei ogwi aʼge ʼberlek emin, ik laut odouk aʼge yeʼgelak oruakma, hwedali al ʼgelaʼge eʼben wiak aʼge onuk belerang emin-emin magale nasu modok welagoma eba hwigentai louwa o. Hwigentai louwa ai re, enebe naduk lodu paget warotlukmu en pobuk warema aiat o,” oluk moʼgulnesi.

⁹Asogo moʼgulnesirikmu en eʼberlik e, Allah en ologun ʼgoboksogo aphwami wiagabonobuagoluk, is malaikat enebe sabiren en Allah olot het ik ʼgelaʼge naʼgogo woluk herlelu egesa aʼge ebano aʼge mesik wagarik disogo moʼgulnesi, “Domba Emalik en ugwe ʼgelaʼge hwerlesi aʼge ai ebe moʼgulhomma hil yethagun en e, suk o,” oluk moʼgulnesi.

¹⁰Asogo moʼgulnosokhwe, Allah Arogun nebam louk lau wagama re, at malaikat ano en woknoboluk dom yat lok aʼge pam ligagarik, Allah uʼgwarek owi o kota Yerusalem ʼbogorl pam Allah en ʼbelabu waga aʼge ano moʼgulnesimu yethegi o.

¹¹O kota ai re, Allah ebe amolit erliktogwi aʼge ʼgelaʼgeatma re, amolit helep amolit wiak oʼgo aʼbik ʼbalogwi aʼge onuk baiduri pandan orogole muli wiak op napunak ʼgelaʼge hegi o.

¹²Ye, leget pakleget yat lok werikmu re, ʼgoduk emde 12 pam ʼbelak. Ye, ʼgoduk emde ʼbelak ebe loʼbok pam e, aphwami Israel aʼge enaʼgul onuk 12 enat pelal wogoma re, is malaikat enebe 12 enat ʼgoduk emde loʼbok ebam ʼgagalak welegesa.

¹³Ye, o kota ai, abel mo yegelogo orlu ago akhit e, ʼgoduk emde henagan pam ʼbelak welaga. Ye, abel eradima akhit e, ʼgoduk emde henagan pamat ʼbelak welaga. Ye, abel ogodima akhit e, ʼgoduk emde henagan pamat ʼbelak welaga. Ye, abel mo obuk oso akhit e, ʼgoduk emde henagan pamat ʼbelak welaga.

¹⁴Ye, leget pakleget wogo ai, obule helep ebe 12 atma re, at Domba Emalik en enebe 12 enat pulogo yoʼgo onoboluk peragenebesi aʼge ebano ononuk pelal wogo oruakma hegi o.

¹⁵Ye, at malaikat an wene moʼgulnese laga aʼge ano en, o kota ano emin, ʼgoduk emde ʼbelak ebano emin, leget pakleget wogo ano emin, elit aʼge emas aʼge pam walhaigoluk tenakho oruakma yethegi o.

¹⁶Asogo tenak welat ebe walhasulat e, o kota ano oʼgut ugan pam heleʼgikmu re, eleget pema-pema yat akhit emin, horok akhit emin, emin hegitmu re, elit aʼge ano pam walhasu laga. Asogo walhasuam, leget eleget pema-pema emin, ologun pema-pema emin, hwerli is eneʼgik wenarogwi hegit e, 12.000 pam, ye, nis yema en wenarogwi hegit e, 2.400 kilometer agoma hegi o.

¹⁷At malaikat ano en aphwami en walhogwi ʼgelaʼge leget pakleget ano walhesi aʼge re, hwerli is eneʼgik wenarogwi hegitsogo re, 144 pam, ye, nis yema wenarogu lege hegitsogo re, 60 meter ʼgelaʼge agoma hegi o.

¹⁸Leget pakleget ai re, helep amolit wiak oʼgo aʼbik ʼbalogwi aʼge onuk baiduri pandan ai aʼge heleʼgik o. Ye, o kota ai ebe emas orogole napunak ʼgelaʼge op oruakma hegi o.

¹⁹O kota ai, leget pakleget obule werik e, di helep yu helep oʼgo aʼbik aʼge onuk permata aʼge ilmu opsogo werik. Ye, helep obule nomor 1 onuk baiduri pandan ai aʼge werik. Ye, eʼberlik, helep obule nomor 2 onuk nilam ai aʼge werik. Ye, eʼberlik helep obule nomor 3 onuk yakut ai aʼge werik. Ye, eʼberlik helep obule nomor 4 onuk zamrud ai aʼge werik.

²⁰Ye, eʼberlik e, helep obule nomor 5 onuk baiduri sepah ai werik. Ye, eʼberlik e, helep obule nomor 6 onuk delima ai aʼge werik. Ye, eʼberlik e, helep obule nomor 7 onuk ratna cempaka ai aʼge werik. Ye, eʼberlik e, helep obule nomor 8 onuk pirus ai aʼge werik. Ye, eʼberlik e, helep obule nomor 9 onuk topas ai aʼge werik. Ye, eʼberlik e, helep obule nomor 10 onuk krisopras ai aʼge werik. Ye, eʼberlik e, helep obule nomor 11 onuk lazuardi ai aʼge werik. Ye, eʼberlik e, ebe ologunmu helep obule nomor 12 onuk kecubung ai aʼge werikmu hegi o.

²¹Ye, ʼgoduk emde ʼbelak ebe 12 ebano ʼgoduk ebe loʼbok helep oʼgo aʼbik aʼge onuk mutiara ai aʼge heleʼgik. Ye, o kota ai ebela noʼgwiʼgwe ʼberlek e, emas aʼge orogole muli wiak op orogole napunak ʼgelaʼge duelak, oruakma hegi o.

²²Asogo hegi aʼgeat de, o kota eba Allah anni aʼbikmu di aʼge yu aʼge tu nak aʼge ano emin, Domba Emalik ano emin, eʼbirek enebe Allah owi werik ʼgelaʼge oruakhwe no oluk e, Allah owi werik mesik oruakma ho erlak.

²³Ye, o kota eba Allah eʼbakʼbage yeriselat, Domba Emalik ano esaga ʼgelaʼge ʼgwialiselat, atiasogo yerisoma no oluk e, mo emin, dugwi emin, yeriselom erlagat oruakma hegi o.

²⁴Asogo eʼbakʼbage aʼbik oruakhwe no oluk e, aphwami ʼgwiangma aʼge enaʼgul onuk loʼbok logon eneʼbakʼbage ai pam noʼgu lema o. Ye, is ap ʼgain ononuk logo aʼge ʼgwiangma aʼge enaʼge di aʼge yu aʼge oʼgo aʼbik aʼge oruakma erligonobogwi aʼge ai woluk o kota ano po ʼgogu lemayat o.

²⁵Ye, o kota eba o hik oso erlakhwe erlige modok welema ai en e, leget pakleget werikmu ʼgoduk emde ʼbelak ebe loʼbok, ʼgoduk ebe lerak erlakma en hwerik modok welema hegi o.

²⁶Ye, aphwami enaʼgul onuk loʼbok ʼberlegat enaʼge di aʼge yu aʼge aʼbikmu erligonobogulat, hau doʼgok onobogulat, togwi aʼge ai woluk o kota eba po ʼgogu lema o.

²⁷Asogo ʼgogu lema aʼgeat de, aphwami wiak enemelmel aʼge togulat, eniak eseiyat ogulat, togulat enebam hoonobu erlak aʼge o eba ʼgogu lema modok erlak hegi. Asogo aʼgeat de, is logon enelaluk modok welemagoluk obabonobua aʼge nak ononuk pelal wokho Domba Emalik oruesiʼga pam pesi aʼge nak o eba ʼgogu lema hegi o.