Read Silimo Wahyu 22 Bible Online

Wahyu 22 - Silimo bible

Wahyu 22

¹Asogo moʼgulnesimu hegirikmu en eʼberlik e, Allah emin, Domba Emalik emin, eʼbirek ʼgain welagai aʼge enebalema en, ik enelalugabenebiso aʼge il muli wiak op napunak ʼgelaʼge elarukmu en ʼbulogo re,

²o kota ai, ebela esaʼgo pema-pema lagaimu ebano oruakma, ik ano ʼburl oʼgwe lasumu hegi o. Asogo lasukhwe, ik esaʼgo etle akhit, yu akhit, e owi yogo oruakma hegi o. E ai eʼgen noʼgwiam enelalugabenebiso aʼge ano, dugwi mesigat pam eʼgen mesik eselat, dugwi mesik pam eʼgen mesik eselat, tisokhwe mo ligom, ʼbugom, tisokhwe tahun mesigat pam eʼgen hwerli 12 pam egesiso aʼge welaga. Ye, eʼgela pam e, di aphwami yu aphwami enaʼgul onuk loʼbok obabenebiso aʼge hegi o.

³Ye, naduk Allah en aphwami emin, di aʼge yu aʼge emin, heman enebesi aʼge ano noʼgorlak enebesimu no oluk e, pobuk o ai pam heman noʼgorlak oruakma hegi. Allah emin, Domba Emalik emin, eʼbirek ʼgain welagai aʼge enebale ano, o kota eba ʼburl oruakhwe, is aphwami Allah eragam aʼge enede at ebam heʼberik welat, at ebaget togu lema entegis o.

⁴Asogo welat, Allah onuk is eneʼberli pam pelal wogoma re, is en at orogole enil hogu lema o.

⁵Ye, Allah ebe eʼbakʼbage is enebe dakharak enebasumu no oluk e, o hup ogo erlagat, ye, esaga emin, mo emin, yeriselom ogo erlagat, oruakhwe, is ʼgain ononuk logo aʼge welat, aphwami logon eneragam onoboluk tenentarok modok-modok welema entegis o.

⁶Asogo entegistik oruakma, at malaikat ano en pobuk moʼgulneselat, “Di wene yu wene agoam yetholuk wegen ai, aphwami en e, Wene ai demat, oluk pobi tu aʼge o. Wene ai re, il mesik wolom erlakma en perleneat ema aʼge o. Ai en e, nenaik ʼgain Onuk Logo aʼge Allah Arogun is ap at iak moʼgulontogwi aʼge wogentasu aʼge ano en, an malaikat en, at eragam aʼge moʼgulontouwagoluk peraknobou wagama wegi o,” oluk moʼgulnesi.

⁷Asogo moʼgulnosoam, at Yesus en e, disogo moʼgulnesi, “Yethemen! An perleneat weik o. Asogo wagoam sa en di wene yu wene pelal wogo aʼge yu esaʼgo hwelakpoluk hegitsogo taga lema holuk, Allah en obap pasuam ogola agai houwa o,” oluk moʼgulnesi.

⁸Asogo moʼgulnesimu, di wene yu wene ʼberlek yu re, an Yohanes moʼgulnosokhwe nesaʼgo hweliselat, nil hasulat, tegis o. Asogo nesaʼgo hweliselat, nil hasulat, tegistik e, at malaikat wene ai an nil yethouwagoluk moʼgulnese laga aʼge ano, nodogorlu pam en erliktigoluk egi o.

⁹Asogo aʼgeat de, at en disogo moʼgulnesi, “Mo in. An asogo erliknobu mia o. An nebe re, hat emin, harilak logon at Allah iak moʼgulontogwi aʼge emin, is logon enebe ʼberlegat wene pelal wogo aʼge yu enesaʼgo hwelakpoluk hegitsogo togu lema aʼge emin, enemin hegit, nenebe at Allah eragam aʼge nakma re, hede at Allah ebam heʼberik poluk, at nak erliktu o,” oluk moʼgulnesi.

¹⁰Asogo moʼgulnesirik, pobuk moʼgulneselat, “Di wene yu wene Allah en egei aʼge yu perleneat ema ai en e, silo pogwi ai ʼgelaʼge, Aphwami moʼgulonto puk, oluk wene hogola poluk mo u erlakma en moʼgulontogu lomup o.

¹¹Asogo moʼgulontogwiam, sa en ebabut wiak nak taga leik epasu holuk e, wiak nagat taga lemak o. Ye, sa en wiak enemelmel aʼge nak taga leik epasu holuk e, ai aʼgeat taga lemak o. Ye, sa en Allah ede epasu aʼge nak taga leik epasu holuk e, aiat taga lemak o. Ye, sa en ebe Allah paget poluk weleik epasu holuk e, ebe Allah paget poluk welemak o,” oluk moʼgulnesi.

¹²Asogo moʼgulnesimu, at Yesus en moʼgulneselat, “Edip emin, edeʼbi emin, anatma re, naduk edip pam en ʼbekhit pobuk ologun pam notok modok weleik aʼge en, aphwami enebe loʼbok enebabut togwi aʼge hegitsogoat oʼgo wogentaigoluk woluk perleneat weik o.

¹⁴Ye, is logon onosum opsogo emesogo poluk welema aʼge nak e, Allah en obabenebisoam onogola enagai holuk e, e eʼgen noʼgwiam enelalugabenebiso aʼge ano eʼgen noʼgulat, ye, o kota eba ʼgoduk emde ʼbelak oʼgwe en lebagalat-ʼguagalat, togu lomogoluk eiye emarik welema o.

¹⁵Asogo aʼgeat de, is aphwami logon wiak enemelmel aʼge togwi aʼge emin, is hwarl owi wogo poluk ʼbamo wogonobogwi aʼge emin, is hwami yogunat tenontogulat, tenontouwagoluk togulat, togwi aʼge emin, is aphwami waronobogwi aʼge emin, is enede dogwi asua pam heʼberik welat erliktogwi aʼge emin, is enemde pam en lalonobogulat, di bele yu bele togulat, lalonobogulat, togwi aʼge enebe loʼbok emin, ʼberlegat o kota ai abel oʼborl akhit welema o,” oluk moʼgulnesi.

¹⁶Asogo moʼgulnesirik, at Yesus enat pobuk moʼgulneselat e, “Di wene yu wene obok, an not malaikat en his neiyagai o di owi yu owi odoktugu legep aʼge ʼberlegat moʼgulhontouwagoluk heneʼbek perakpou wegi ai re, an Yesus enat o. Ye, e esemis ʼbaktiso ai ʼgelaʼge, ap Daud en dogoʼgwe aʼge ano re, an nebeat o. Ye, wap o mo yegelogo orlu ago hegitsogo lagaborlu ago aʼge ʼbakʼbage aʼbik ano re, anat o,” oluk moʼgulnesi.

¹⁷Asogo moʼgulnesirik eʼberlik e, disogo moʼgulnesi, “Sa ik nele en no agai holuk e, ik enelalugabenebiso aʼge oʼgo erlak weat horloluk nouwagoluk, Allah Arogun emin, Domba Emalik ugwe ʼgelaʼge hwerlesi aʼge ano emin, eʼbirek en ogulat e, Nau manis o, oluk moʼgulentasuam, is logon enebe loʼbok is eʼbirek eniak enesaʼgo hologwi aʼge en, Nau manis o, oluk ogulomat o,” oluk osoma hwelegis.

¹⁸An Yohanes en his logon wene pobuk ema wene an moʼgulnesi aʼge ai henesaʼgo hologup aʼge henebe loʼbok, wene mesik yu moʼgulhentaik, “Sa en wene pelal wegi aʼge yu oruakhweat de, wene mu aʼge ebam loʼbok tiso holuk e, Allah en aphwami wene enebam poluk wiagabonobua oluk egei aʼge pelal wokho pegi aʼge yu hegitsogoat, Allah en at ai wene mesik emin ebam loʼboksogo ebam poluk ebe wiagap pouwayat o.

¹⁹Ye, sa en di wene yu wene pobuk ema aʼge moʼgulnesimu pelal wegi aʼge yu oruakhweat de, wene ai aʼge mesik sebelogo ʼbelabiso holuk e, e eʼgen noʼgwiam enelalugabenebiso aʼge ai eʼgen mesik at nouwagoluk oruak aʼgeat de, Allah en e, Hat no mia, oluk, moʼguleselat, ye, o Allah uʼgwarek owi kota ano at ai eiye emarik libagalat ʼgu agalat, togu lemagoluk oruak aʼgeat de, Allah en, Hat ʼgwilo mia, oluk, moʼguleselat, tua o,” oluk moʼgulhentegis ai o.

²⁰Ye, wene ai ʼberlegat e, demat oluk oso aʼge, at Yesus ano enat, “An perlene weik o,” oluk oso. Asogo osoam, an en e, “Yesus nue. Hat perlene worogun ai, demat emak u ʼgelaʼge, Amin, manup o,” oluk egi.

²¹Ye, his Allah eiyagai o di owi yu owi odoktugu legep aʼge ʼberlegat, narilak norokhwi. Nonue Yesus ebabut op aʼge ano en tenhentarok welemak o.