Read Silimo Wahyu 3 Bible Online

Wahyu 3 - Silimo bible

Wahyu 3

¹Asogo moʼgulnesirik pobuk moʼgulneselat, “Allah Arogun modok ʼgaroktak aʼge re, sabiren ʼgelaʼge ano eiye welat, hwesagal ebe sabiren ano neʼgigem tenak welat, taga legi aʼge ano en wene yu moʼgulheik, At malaikat Allah eiyagai o Sardis odoktogwi aʼge tenentarok welago aʼge ano, wene an en moʼgulentaik aʼge yu, hat en pelal wokho eʼbek perakpemen o, His o Sardis aʼge aphwami en honobok ogulat e, Is enelaluk oruak, oluk, ogwi aʼgeat de, henebe werak aʼge ʼgelaʼge welat henebabut togu legep aʼge ai an naluk o.

²An en his henebabut ʼbalise legi re, naik Allah il pam opsogo ʼgaroksogo togu legep erlak ai o. We, perleneat waromogoluk henede nak lebe lebe oso eria pamat, peiyalogo inomtik e, heneʼgik honoyuk haʼbuktak poluk henanni omup o.

³His asogo peiyalogo inoroguptik henanni orogup erlak holuk e, aphwami yogot wouwogoluk hisakho wagai ai ʼgelaʼge, an asogoat, his en, At ai erlige wema, oluk heneperlagat oruakma weikno oluk e, wene naduk moʼgulhentigisema henesaʼgo hweligep aʼge henede eberak poluk e, wiak togu legep aʼge ʼbaksogo ukpoluk henebabut heberloroguptik, wene aiat heneʼgik ʼbetesogo tenak wolomup o.

⁴Asogo aʼgeat de, his aphwami o Sardis aʼge henebe weiyat logon, aphwami en onosum emerak aʼge soduk daguano oluk degelak welagai ai ʼgelaʼge, wiak logon tu erlakma en oruak aʼge ai, onosum ʼgut aʼge ʼbuktu hegitsogoat ʼbuksogo an nemin noʼgu lomul o.

⁵Sa en anni ema holuk e, sum ʼgut aʼge ʼbuktak paik o. Ye, an is aphwami enelalugabenebise legi aʼge nak ononuk tuesiʼga pam ʼbelak aʼge hosogo ukpaik erlak o. An naik emin, malaikat yoʼgo ʼbelagonobou wago aʼge emin, enil pam, Is yu an neiyagai o, oluk ononuk ʼbaksogo moʼgulentaik,

⁶oluk, egi aʼge ai, Allah Arogun en Allah eiyagai o di owi yu owi odoktogwi aʼge moʼgulentasu ai, henesaʼgo oruak holuk e, opsogo holip o, oluk moʼgulentegis aʼge ai, pelal wokho eneʼbek perakpomup o,” oluk moʼgulnesi.

⁷Asogo moʼgulnesirik pobuk moʼgulneselat e, “An wiak tu erlakma en, degelak welat, niak demat nak ese legi aʼge en ʼgoduk horogwi aʼge Daud en aʼge wik-wok ʼgoduk hwerikmu re, aphwami logon en laru mia o. Ye, ʼgoduk lerakpaikmu re, aphwami logon en horu mia aʼge ano en wene yu moʼgulheik, At malaikat Allah eiyagai o Filadelfia odoktogwi aʼge tenentarok welago aʼge ano, wene an en moʼgulentaik aʼge yu, hat en pelal wokho eʼbek perakpemen o,

⁸Yethemit! His henebabut togu legep e, henanni modok weiyat aʼgeat de, an niak hwelakpoluk hegitsogo togulat, nobok elabe tu erlakma en ʼbaksogo moʼgulontogulat, togu legep ai an nalukmu re, his henebaget e, ʼgoduk aphwami mu aʼge en laru modok mia aʼge hwerik henebegi o.

⁹Yethemit! Is aphwami Iblis eiyagai odoktogwi enebe Yahudi aʼge erlak aʼgeat de, eniak eseiyat, Nis nenebe Yahudi aʼge, oluk ogwi aʼge ai, his heneragam ʼgumarik, an his nede hwedik welegi aʼge ai enaluk emagoluk, is enebe his heneʼbek onobou weik o, oluk demat moʼgulhentegis.

¹⁰Asogo onobou weik ai re, an en, Henepe mosogo wolomup o, oluk moʼgulhentegis aʼge ai, niak hwelakpoluk hegitsogo togu legep ai en, o pobuk Allah en aphwami ʼgwiangma yema welagai aʼge ʼberlegat di obotut yu obotut enebam pouwa aʼge ai pasukhwe re, his nak e, an en neragam opsogo tenhentarok weleik o.

¹¹An perleneat weik o. Asogo weiktik, sa omut oruak sa omut erlak pungtak lagalat, enanni agai aʼge oʼgo ʼgare-ʼgare ʼbuktak onobogwi ai ʼgelaʼge, oʼgo his wokhentaik aʼge, is aphwami muon en delogo horlouwano oluk, his ebe wegep aʼge ai, heneʼgik ningsogo tenak wolomup o.

¹²Ye, sa en anni ema aʼge holuk e, o dum uak lagabogwi ai ʼgelaʼge, at asogoat Allah uʼgwarek owi werikmu edikpoluk, naik Allah onuk emin, owi kota Yerusalem ʼget aʼge at enat ʼbogorl pam en ʼbelakpouma aʼge ai onuk emin, an nonuk ʼget aʼge emin, an en, at ai ebam pelal ʼbalogo poma re, at ebe o eba en liplauma modok erlak o,

¹³oluk egi aʼge ai, Allah Arogun en Allah eiyagai o di owi yu owi odoktogwi aʼge moʼgulentasu ai, his henesaʼgo oruak holuk e, opsogo holip o, oluk moʼgulentegis aʼge ai, pelal wokho eneʼbek perakpomup o,” oluk moʼgulnesi.

¹⁴Asogo moʼgulnesirik, pobuk moʼgulneselat e, “Edipmu en, di aʼge yu aʼge edip pamat oruakma, Allah en walhesi aʼge ai, at obok nebabut heʼbisogo demat nak oso aʼge, nonuk demat emak u ʼgelaʼge, Amin ano en wene yu moʼgulheik, At malaikat Allah eiyagai o Laodikia odoktogwi aʼge tenentarok welago aʼge ano, wene an en moʼgulentaik aʼge yu, hat en pelal wokho eʼbek perakpemen o,

¹⁵His henebabut togu legep aʼge ai, ʼberlegat an naluk o. His henede horl welat, henebakhenne togu legep erlagat, ye, aganhansogo welat, aʼgoluksogo togu legep erlagat, we, henede horl welat henebakhenne ʼgelaʼge wolorogup holuk, aiat wolorogup o. Ye, aganhan welat aʼgoluksogo wolorogup holuk e, aiat wolorogup o.

¹⁶Aʼgeat de, henede horl erlagat, aganhan erlagat, we, horl de a? Aganhan de a, aganhan wei nak welegep ai en e, ik il seram aʼge enemdema en lukho ukpogwi ai ʼgelaʼge, an en henebe lebikhenebaik o.

¹⁷His e, henerlagaigat, henil hopnigat, henageʼgolomat, welarat de, Nis nenebe enede ʼgelaʼge modok wiagat welege, oluk pobirak erlak, his en ogulat, Nis e, nenebe nonuʼgwarek en ʼgainap hwerlegerik, di aʼge yu aʼge nenerlagaik om erlakma en, nenilmu aʼbik welege, oluk ogu legep ai o.

¹⁸Asogo welegep ai en, his ʼgain henilmu aʼbik orogup en e, emas odouk pam werakho op heleʼgik aʼge nebam oʼgo ʼbalogulat, henageʼgolom welegep aʼge ai, heneʼgerli agomano oluk e, ʼbukhorlouwogoluk sum ʼgut aʼge nebam oʼgo ʼbalhorlogulat, henil wiak aʼge ai, op agoam di aʼge yu aʼge yethogu lemagoluk, aʼbosu henil petne egelogup en nebam oʼgo ʼbalhorlogulat, togup en henesaʼgo weregis o.

¹⁹Asogo henesaʼgo weregis ai re, is aphwami an nede hwedik aʼge nak, enebe loʼbok enesaʼgo wusogo lagalʼbisok ʼgoʼbu warenebiso nak ai en e, wiak togu legep aʼge ai ukpoluk, henebabut heberloroguptik e, aʼgoluksogo togu lomup o.

²⁰Yethemit! An nebe ʼgodukmu edik welat, ʼgoduk ʼbak-ʼbakhasu legi o. Asogo ʼbak-ʼbakhasuam, ap sa en an niak esaʼgo holholuk e, ʼgoduk hutniouwa holuk, an at eʼbek ʼgwiktik e, soʼboru noʼgulat nare-hare nemin hwedik wolomul o.

²¹An arat nanni egimu, naik ʼgain welago aʼge ebalema nemin welege yu ʼgelaʼge, sa en anni ema holuk, an ʼgain welago aʼge nebalema emin wolomogoluk edikpaik o,

²²oluk egi aʼge ai, Allah Arogun en Allah eiyagai o di owi yu owi odoktogwi aʼge moʼgulentasu aʼge ai, henesaʼgo oruak holuk e, opsogo holip o, oluk moʼgulentegis aʼge ai, pelal wokho eneʼbek perakpomup o,” oluk moʼgulnesi.