Read Silimo Wahyu 4 Bible Online

Wahyu 4 - Silimo bible

Wahyu 4

¹Asogo moʼgulnosoam hegirikmu en eʼberlik e, nabi ʼgelaʼge pam mesik disogo yethegi. ʼBogorl pam e, ʼgoduk mesik hwerik oruakma, at naduk iak ʼbiʼgong iak lok aʼge ʼgelaʼge pam moʼgulnosoam nesaʼgo hwelegis aʼge ano en pobuk disogo moʼgulnesi, “Wene ya wolomtik en pobuk ema aʼge hil yethanogoluk, moʼgulheik en e, erli suk o,” oluk moʼgulnesi o.

²Asogo moʼgulnosokhwe erianoat, Allah Arogun nebam louk lau wagoam nil yethegi ʼgal e, ʼbogorl pam at ʼgain welagoma ebale oruakma yethegi o. Asogo oruakma re, at ebe ebalema eriano hweriogo oruakma yethegi o.

³At ai orogole re, helep amolit wiak oʼgo aʼbik ʼbalogwi aʼge onuk baiduri pandan emin, delima emin, ʼgelaʼge oruakma, warloʼguk orogole ebeletak aʼge at ʼgain welagoma ebalema ano waleʼgik oruakma yethegi o.

⁴At ʼgain welagoma ebalema ʼburl hweriogo oruakhwe, is logon ʼgain welagai aʼge enebale 24 pam oruakma, ap enarlue aʼge enebe 24 onosum ʼgut aʼge ʼbuktak, ye, ʼgare-ʼgare re, emas aʼge honogo aʼge ap ononuk logo aʼge ʼbuktak welagai ai ʼgelaʼge ʼbuktak aʼge enebe enebaleʼgwe ano hweriogo welegesa.

⁵Asogo oruakma, at ʼgain welago aʼge ebale ano pam en ebinal pobuk naduk lobukhasulat, orlolu iak lok aʼge suptak pasuam iak logat orlu eselat, tisokhwe, at ʼgain welago aʼge ebale ano orogolema re, esaga ʼgwielak oyuk yogo ebe sabit pam welaga. Ai ebe re, Allah Arogun modok ʼgaroktak aʼge oluk u ʼgelaʼge ebe sabiren anoat o.

⁶Ye, at ʼgain welago aʼge ebale ano orogolema re, mesik napunak orogole lalu ik laut yeʼgelak aʼge ʼgelaʼge welaga. Asogo oruakma, at ʼgain welago aʼge ebale ʼburl oruakhwe, abel pema-pema, is Allah en walentesimu enelaluk welagai aʼge logon enebe ugan en enil onoʼborl oʼgwe onolukhweʼgwe aʼbik aʼge welegesa.

⁷Asogo welegesa ai, mesik e, orlomene ʼgelaʼge onuk singa ai ʼgelaʼge, ye, mesik e, wam sapi ierak aʼge orogole ʼgelaʼge, ye, mesik e, orogole aphwami onorogole ʼgelaʼge, ye, mesik e, pedi-pedi, darak lasukhwe yethogwi ai ʼgelaʼge, oruakma yethegi o.

⁸Is ai enebe ugan aʼge re, enebe loʼbok enagapsaburl hebarlik pamatma re, enabel oʼborl akhit emin, olukhwe akhit emin, enil modok aʼbik aʼge eniak mo u erlakma en, hup erlige modok Allah erliktugulat e, “Nenaik Allah Onuk Logo aʼge anni aʼbik, .. Page omuat ʼgeksogo welaga, ........ Yogodak ogo ʼgektagat oruak, ..... Pobuk ʼgektak modogat welema,” .... oluk erliktogwi modok welegesa.

⁹Asogo ogulat. nin hwedik nan hwedik at ʼgain elaluk modok welago aʼge ano ebe ebalema oruakhwe erliktogulat, “Nenaik ʼgain welegen aʼge harat hau wathobogulat, erlikhobogulat, logo hobogulat, togu lomul o,” tugumu re,

¹⁰is ap enarlue enebe 24 ebano en, at ʼgain elaluk modok welago aʼge ano ondogorlu pam huregesarik erliktogulat, ʼgare-ʼgare enaʼgul pam ʼbuktak aʼge ebano noʼgorlogo, at ʼgain welago aʼge ebalema ebano orogolema hwikhai lagalat e, disogo ogu legesa,

¹¹“Nenaik Allah Honuk Logo, .... Di aʼge yu aʼge ʼberlegat, .... Hat hede epegentik en walhegen, ... Walsogo pegenma oruak ai, ... Harat ʼgain hanni aʼbik holuk, ... Erlikhobogulat, hau doʼgoksogo wathobogulat, tugulom o,” ... oluk orogole wokho erliktugumu entegis.