Read Silimo Wahyu 5 Bible Online

Wahyu 5 - Silimo bible

Wahyu 5

¹Asogo tugukhwe nil entegismu en, eʼberlik e, at ʼgain ano ebe ebale welagoma welat, suesiʼga yat aʼge pam pelal abel oʼborl olukhwe wogo oruak aʼge eʼgerlik oruakma, “Is logon en enil ʼgwelakho mia,” oluk silo pogwi ʼgelaʼge, aʼbosu sabit pam dopnosogo pegesa aʼge eʼgikmu tenak oruakma nil hegi o.

²Hegirik oruakma, at malaikat anni aʼbik aʼge mesik en iak loksogo eselat e, “Suesiʼga yat aʼge pam pelal wogo aʼge eʼgerlik yu, Hebelu mia o, oluk silo pogwi ʼgelaʼge, aʼbosu dopnosogo pegesa aʼge yu, sa eiye welat elirat wokholuk hebelu epegep,” oluk hin wesi.

³Asogo hin wesimu, is logon ʼbogorl pam aʼge de a? ʼGwiangma aʼge de a? At e, ʼgwiang ogola orogobu aʼge de a, suesiʼga yat aʼge pam pelal wogo aʼge eʼgerlik ai, elirat hebilholuk, ogola ʼgwelakho aʼge eiye mesik horoenebigisa aʼge re, enebe erlagat.

⁴Asogo ap mesik eiye welat en, suesiʼga yat aʼge pam pelal wogo aʼge ai, elirat hebilholuk il ogola ʼgwelakho aʼge ebe modok erlak ai en e, nede wiak agarik, nge aʼbik tegis o.

⁵Asogo nge tagoma re, ap enarlue aʼge ebano mesik en e, “Nge tago puk o. E esemis daintiso ai ʼgelaʼge, ap Daud en dogoʼgwe aʼge aʼgul onuk Yehuda aʼge dagagarik en, ebe mene orlomene ʼgelaʼge onuk singa ano arat anni agarik eiye agarikmu re, suesiʼga yat aʼge pam pelal wogo aʼge eʼgerlik ai, is logon enil houwano oluk silo ʼgelaʼge enebe sabiren oruak aʼge ano en nak e, elit hebelu o,” oluk moʼgulnesi.

⁶Asogo oluk moʼgulnesirikmu en, eʼberlik e, is Allah en walentesimu enelaluk welagai aʼge logon enebe ugan ebano emin, ap enarlue enebe 24 ebano emin, at ʼgain welago aʼge ebale ano eragam oʼgwe oruakhwe, eneʼgerlak ede ʼburl e, Domba Emalik arat werigisa aʼge aʼgul pam iak sabiren daintak, ye, il e, sabit pamat, edik welaga. Il sabiren ai ebe re, Allah en Arogun o di owi yu owi yerentasu aʼge ebanoat o.

⁷Pobuk e, Domba Emalik ano wagarik e, suesiʼga yat aʼge pam pelal wogo eʼgerlik aʼge, at ʼgain Allah welago aʼge ebalema ʼgain welat, eʼgik ʼbekhit akhit en tenak oruakma wasumu nil hegi o.

⁸Asogo eʼgikmu wasuam e, is Allah en walentesimu enelaluk welagai aʼge logon enebe ugan aʼge ebano emin, ap enarlue aʼge enebe 24 ebano emin, Domba Emalik ano eragam ʼgoluk ondogorlu pam welat erliktogu legesa. Asogo erliktogulat, is ap enarlue aʼge ebano enebe loʼbok gitar ʼgelaʼge emin, kemenyan aʼbosu ik eʼbe emas heleʼgik aʼge pam neʼgak aʼge emin, eneʼgikmu tenak welat weni worogu legesa. Kemenyan ai ebe re, Allah eiyagai seʼban ogwi aiat o.

⁹Asogo weni ʼget aʼge pelalogo worugulat, “Hat nak e, arat wathebigisema waregentik, .. Aphwami ʼberlegat enaʼgul onuk loʼbok, eniak loʼbok, ... Enagap loʼbok, onowi loʼbok, ... Hat hemep pam Allah paget oʼgo ʼbalogo onoboluk, ... Eiye egentik, ... Suesiʼga yat aʼge pam pelal wogo eʼgerlik ai, .. Wik-wok e, silo pogwi ai ʼgelaʼge, ... Aʼbosu dopnosogo pegesa aʼge ai, ... Elit hebelu, ... Is ai oʼgo ʼbalogo enebegentik, ... Nenaik Allah paget togu lemagolu, ... Enaʼgul onuk, Allah eiye, tualigen, ... Enebe ʼgainat edigenebegentikmu, ... Is en aphwami ʼgwiangma aʼge, ... Eneragam onoboluk tenentarok wolorogun,” ... oluk weni worogumu entegis o.

¹¹Weni asogo werigisarikmu en, pobuk mesik disogo yethegiat. At Allah ʼgain welagoma ebale ebano emin, is Allah en walentesimu enelaluk welagai aʼge ebano emin, ap enarlue ebano emin, enemin ʼburl oruakhwe, eneragam oʼgwe waleʼgik e, is malaikat esan di ʼgobok yu ʼgobok eneʼgik wenaru modok mia aʼge welat eniak loksogoat disogo ogu legesa,

¹²“Emalik werigisa aʼge ai nak e, ... Di aʼge yu aʼge eragam pogulat, ... Ilmu oruak aʼge welat, ... Wene ede ʼgagalak nak welat, ... Anni aʼbik welat, tiso yo. ... Holuk, at nak e, elirat hau doʼgoksogo worugulat, ... Erliktugulat, hau worugulat, tugulom o,” ... oluk erliktogu legesa.

¹³Ai ʼgelaʼge, is Allah en walhesi aʼge ʼberlegat, ʼbogorl pam aʼge emin, ʼgwiangma aʼge emin, ʼgwiang ogola orogobu aʼge emin, ik laut yeʼgelakma welago aʼge emin, ʼberlek en weni worogulat e, “At ʼgain welago aʼge ebalema oruak ai, ... Emalik ano eʼbirek e, ... Isat enanni oruak o, ... Oluk hau waronobogulat, eniak lobuksogo moʼgulontogulat, ... Erligonobogulat, togwi modok wolomok o,” ... oluk ogumu hwelegis o.

¹⁴Is asogo ogumu re, is Allah en walentesimu enelaluk welagai aʼge logon enebe ugan ebano en e, disogo ogu legesa, “Demat emak,” oluk u ʼgelaʼge, “Amin,” ogu legesa. Ye, is enarlue enebe 24 ebano en ogo re, at eragam ʼgoluk ondogorlu pam welat erliktugumu entegisat o.