Read Silimo Wahyu 6 Bible Online

Wahyu 6 - Silimo bible

Wahyu 6

¹Asogo hegerik eʼberlik e, silo pogwi ai ʼgelaʼge, suesiʼga yat aʼge aʼbosu ebe sabit pam dopnosogo pegesa aʼge ano, Domba Emalik ano en, mesik naduk hebelisoam e, is Allah en walentesimu enelaluk welagai aʼge enebe ugan ebano aʼge mesik en e, “Suk o,” oluk iak orlolu iak ʼgelaʼge osoma nesaʼgo hwelegis o.

²Asogo osoma, nil yethegi ʼgal e, ap mesik segen woluk ʼgare-ʼgare ap ʼgain ononuk logo aʼge ʼbuktak onobogwi aʼge aʼgul pam ʼbuktak pegesema, wam kuda asu ʼgut aʼge oʼborl pam hweriogo welat, o sebeligoluk sebelil nosoma yethegi o.

³Ye, silo pogwi ai ʼgelaʼge, suesiʼga yat aʼge pam aʼbosu dopnosogo pegesa ano aʼge, at Domba Emalik ano en mesik naduk hebelegeitik en, pobuk mesik hebelisoma re, is Allah en walentesimu enelaluk welagai aʼge ebano mesik en, naduk iak olukmu en pobuk mesik iak eselat, “Suk o,” oluk osoma hwelegis o.

⁴Asogo osokhwe re, wam kuda asu momi aʼge lasumu yethegi o. Ap mesik wam kuda ai oʼborl pam hweriogo nosoma re, disogo moʼgulegisema hwelegis, “Aphwami ʼgwiangma aʼge enebam lioksogo op wolom mia o. At e, aphwami logon en logon waronobogulat, logon en logon waronobogulat, wat-wat ʼbugu lemagoluk, hat eiye takhebege,” oluk ʼgarok lok aʼge wogigisema wam kuda ano oʼborl pam hweriogo nosoma yethegi o.

⁵Ye, silorak ai ʼgelaʼge, suesiʼga yat aʼge ai pam aʼbosu dopnosogo pegesa aʼge ano, Domba Emalik ano en ʼbiren hebelegeitik en mesik hebelisoma re, is Allah en walentesimu enelaluk welagai aʼge ebano, enebe ʼbiren arat eniak egesarikmu en, eʼberlik e, “Suk o,” oluk ogukhwe hwelegistik, yethegi ʼgal e, wam kuda asu sing aʼge mesik lasumu yethegi o. Ye, ap mesik eʼgin aʼge walhogwi aʼge eʼgikmu wik-wok wam kuda ai oʼborl pam huragarik nosoma yethegi o.

⁶Asogo nosoma yethegirik, nesaʼgo hwelegis ʼgal e, is Allah en walentesimu enelaluk welagai aʼge enebe ugan ebano eneʼgerlakma en aphwami eniak ʼgelaʼge disogo egei, “Beras ʼgelaʼge gandum eʼgen ai aʼge eʼgin aʼge pam sogoluak eʼgik mesigat nak yagarak poluk walsogo re, oʼgo yabuk agauwa mesik erlige paget togwiam eneʼgik oʼgo wogontogwi ai ʼgelaʼge ʼberlegat po yo. Ye, heʼbak eʼgen ʼgelaʼge onuk jelai ai aʼge eʼgin aʼge sogoluak ogola henagan nak yagasogo re, oʼgo yabuk agauwa mesik erlige togwiam eneʼgik oʼgo wogontogwi ai ʼgelaʼge ʼberlegat po yo. Asogo aʼgeat de, minyak e zaitun aʼbosu emin, anggur aʼbosu emin, ai nak e, wiagap po re, mia o,” oluk osoma hwelegis o.

⁷Ye, silo pogwi ai ʼgelaʼge, suesiʼga yat aʼge pam aʼbosu dopnosogo pegesa aʼge ano, Domba Emalik ano en, eʼgik henagan pam arat hebelegeitik en, mesik hebelisoma re, is Allah en walentesimu enelaluk welagai aʼge ebano enebe henagan en eniak arat egesarikmu en, mesik en eselat, “Suk o,” oluk osoma nesaʼgo hwelegis o.

⁸Hwelegistik, yethegi ʼgal e, wam kuda asu aphwami waromogoluk onorogole erlagaiktak pogwi ai ʼgelaʼge nosoma yethegi o. Ye, enebe waragai ai, edip aphwami ʼgelaʼge agalat e, wam kuda ai oʼborl pam huragarik denaga laga o. Asogo nosoma, at eʼberlik e, ʼgwiang ogola ʼbogwi ai, aphwami ʼgelaʼgeat agarik e, emin noʼgumu yerentegis o. Asogo noʼgulat e, aphwami ʼgwiangma aʼge ʼberlegat enebe ugan pam meʼgisogo onoboluk, henaganak aʼge pam waronobu erlakma en ugonoboluk, mesik nak aphwami muon en ʼgarok pam waronobogwiam waragalat, soʼboru obuk en waragalat, ou edip lok aʼge pam en waragalat, mene orlomene emin, wam maro emin, iak en lebilenebisoam waragalat, togu lemagoluk eiyerak enebegesema noʼgumu yerentegis o.

⁹Asogo entegistikmu en, eʼberlik e, silo pogwi ai ʼgelaʼge, suesiʼga yat aʼge pam aʼbosu dopnosogo pegesa ano aʼge, Domba Emalik ano en eʼgik ugan pam arat hebelegeitik, mesik hebelisoma re, aphwami Allah iak ningsogo wegesarik, is logon moʼgulontogu legesa ai paget warenebegisa aʼge enarogun Allah uam wusogo e narlik pogumu opma oruakma yerentegis o.

¹⁰Is asogo welat, eniak loksogoat disogo ogumu hwelegis o, “Nenaik Allah hanni aʼbik ʼgektak modok welat, hegitsogo nak taga legen aʼge nenaik o. Agauwa meren woloroguntik en aphwami ʼgwiangma aʼge en nis watnenebigisa aʼge ano nenaʼgulmu wene enebam poluk waronobogun no,” oluk moʼgulogu legesema,

¹¹at en e, “Henarilak honorokhwi pema akhit enemin an nebaget togu legep aʼge, his wathenebigisa ai ʼgelaʼge, waronobua aʼge owan oruak ai re, is yerentarok welat set hwalogo il mesigat wolomup,” oluk moʼgulentesirik, onosum ʼgut aʼge enebe loʼbok ʼbuktak enebasumu nil entegis o.

¹²Asogo yerentegistikmu en, eʼberlik yethegi ʼgal e, suesiʼga yat aʼge pam silo pogwi ai ʼgelaʼge, aʼbosu dopnosogo pegesa ano aʼge Domba Emalik ano en eʼgik huabenam arat hebelegeitik e, mesik hebelisoma re, mouk loksogo erlang-perlang hasulat, o mo orogole sum soduk aʼge ʼgelaʼge takpasulat, dugwi orogole aphwami enemep ʼgelaʼge takpasulat,

¹³hwesagal ai, e ara eʼgen owanma sogwei annisogo punhau wagoam, ʼgwiangma lologo ʼbu ago ai ʼgelaʼge, asogoat ʼbogorl pam en ʼgwiangma lologo ʼbu agalat,

¹⁴ʼbogorl ai, pelal wogo aʼge eʼgirlogo pogwi ai ʼgelaʼge, eʼgirlogo erlak agalat, dom aʼgul emin, ik eʼgen oʼgwe emin, welagai oʼgwe loʼbok en weʼgwe hwikhasulat, tugumu yethegi o.

¹⁵Asogo tugumu re, aphwami ʼgwiangma aʼge, ap ononuk logo aʼge emin, ʼgain aʼge emin, onuelak weim obogwi aʼge emin, enilmu oruak aʼge emin, ononuk oruak aʼge emin, aphwami enebedek, eneragam aʼge enebe ʼberlegat emin e, owik oʼgwe hisak agalat, dom petne helep ele yat oʼgwe hisak agalat, tugukhwe entegis o.

¹⁶Asogo hisogo welat, dom emin, helep emin, disogo moʼgulontogu legesa, “Allah olot het nenebam pouwa ano arat horok lau waga yema re, sa ʼgelaʼge en ede ʼbuksogo sebelholuk mo ua epegep? Mia o. Ai en e, his en, at ʼgain welago aʼge ebalema oruak ai en orogole haro en watnenebiselat, Domba Emalik ai olot het nenebam poluk watnenebiselat, tua yu re, orloʼbuksogo nenebe sebelnenebiselat e, honolukhwema hisogo nenebemit o,” oluk ʼgonu moʼgulontogukhwe nesaʼgo hwelegis o.