Read Silimo Wahyu 7 Bible Online

Wahyu 7 - Silimo bible

Wahyu 7

¹Asogo nil entegistikmu en, eʼberlik e, is malaikat enebe ugan ʼbogorl edip-edip erabu akhit en, orogobu akhit en, etleba akhit en, yema akhit en, sogwei punhau wago akhit, ebela ologun sebelogo edik welat, sogwei ebe ugan aʼge ʼgwiang oʼgwe punhau wagalat e, eʼgela lebe hasulat, ik laut yeʼgelak oʼgwe punhau wagalat, tuano oluk eneʼgik en tenak oruakma yerentegis o.

²Is asogo oruakhwe, malaikat mu aʼge mesik o mo yegelogo liplau wagoma eba en Allah elaluk modok welago aʼge esilo woluk liplau wagarik, Allah en is malaikat enebe ugan ebano ʼgwiang emin, ik laut yeʼgelak aʼge emin, wiagap pouwagoluk eiyetak enebesi aʼge ebano disogo moʼgulentasukhwe hwelegis,

³“Nis en, is nenaik Allah eragam aʼge nenede weʼgerlogo Allah esilo eneʼberli pam owan po erlak welege ai re, ʼgwiang emin, e edip emin, ik laut yeʼgelak emin, wiagap po mia o,” oluk moʼgulesi.

⁴Asogo moʼgulesirik e, aphwami Israel aʼge en dogoʼgwe aʼge enaʼgul onuk loʼbok ʼberlegat enede weʼgerlogo Allah esilo eneʼberli pam enebil legesarik, “Enebe hwerli 144.000 pam silo enebil lege,” oluk osoma hwelegis o.

⁵Is eneʼberli pam silo enebegesa ai enebe re, ye, is aphwami enaʼgul onuk Yehuda aʼge re, 12.000, ye, is aphwami enaʼgul onuk Ruben aʼge re, 12.000, ye, is aphwami enaʼgul onuk Gad aʼge re, 12.000, ye, is aphwami enaʼgul onuk Asyer aʼge re, 12.000, ye, is aphwami enaʼgul onuk Naftali aʼge re, 12.000, ye, is aphwami enaʼgul onuk Manasye aʼge re, 12.000, ye, is aphwami enaʼgul onuk Simeon aʼge re, 12.000, ye, is aphwami enaʼgul onuk Lewi aʼge re, 12.000, ye, is aphwami enaʼgul onuk Isakhar aʼge re, 12.000, ye, is aphwami enaʼgul onuk Zebulon aʼge re, 12.000, ye, is aphwami enaʼgul onuk Yusuf aʼge re, 12.000, ye, is aphwami enaʼgul onuk Benyamin aʼge re, 12.000. Allah esilo enebe loʼbok asogo eneʼberli pam enebesirik e, “Hwerli ai hwerli enebegema oruak o,” oluk osoma hwelegis

⁹Asogo hegirikmu en, eʼberlik nil yerentegis ʼgal e, di aphwami yu aphwami enaʼgul onuk loʼbok, enagap loʼbok, onowi loʼbok, eniak loʼbok, sum ʼgut yat ʼbuktak aʼge, aphwami en weni worogulat, wedin eʼgela porloksogo eneʼgikmu wogwi ai ʼgelaʼge, e eʼgela aʼge eneʼgikmu woluk, Allah ʼgain welago aʼge ebalema eba Domba Emalik eʼbirek oruakma enilem odoktak enebe hwerli yu pam oluk, eneʼgik wenaru modok mia welat, eniak loksogoat disogo ogu legesa,

¹⁰“Nenaik ʼgain Allah hebalema welegen aʼge, Emalik emin, ... Delnonobogwi aʼge, ... Edip hisat welegep,” ... oluk weni worogumu entegis.

¹¹Ai ʼgelaʼge re, Allah ʼgain welago aʼge ebale ebe ʼburl oruakhwe, is ap enarlue ebano emin, is Allah en walentesimu enelaluk welagai aʼge logon enebe ugan ebano emin, eragam oʼgwe waliʼgogo oruakhwe, is malaikat enebe ʼberlegat enabel pema pema waliʼgogo welat, onorogole Allah eragam sakhunsogo welat erliktogu legesa.

¹²Asogo erliktogulat, disogo ogu legesa, “Demat emak u ʼgelaʼge, Amin, ... Nenaik Allah hematek lok, ... Di wene yu wene haluk modok welat, ... Hat hanni pam tennentarok oruakma, ... Hau wathobogulat, erlikhobogulat, ... Hau doʼgoksogo wathobogulat, logo hobogulat, ... Ogwi modok wolomul ai o, ... Demat emak u ʼgelaʼge, ... Amin,” ... oluk weni worugumu entegis.

¹³Asogo ogukhwe, is ap enarlue ebano aʼge mesik en hin wokniasulat e, “Is aphwami onosum ʼgut yat aʼge ʼbuktak yema re, salak. Ye, o ʼgeba en wegesa,” oluk hin wokniesi.

¹⁴Hin asogo wokniasuam, an en e, “Nue, an neperlak o. Hat nak e, haluk welegen o,” oluk moʼgulosoam, at en e, disogo moʼgulnesi, “Is aphwami yema re, o ʼgwiangma oruakma aphwami logon en di obotut yu obotut aʼbik tagonobogwiam, Allah en delenebegeimu, onosum Domba Emalik emep pam arat ʼgut modok emerigisa aʼge o.

¹⁵Asogo tigisarikmu no oluk e, Allah ʼgain welago aʼge ebalema ebe oruakma ilem edik welat, at owi werikmu at ebaget hup erlige tago modok oruakma, at ʼgain welago aʼge ebalema oruak aʼge ano en, aphwami en mo orlouk watnonobuano oluk, o worogwi ai ʼgelaʼge, at ebe en is sebelogo tenentarok welema o.

¹⁶Asogo onoboluk oruakma Domba Emalik ano Allah ʼgain welago aʼge ebalema ebe ʼburl welat, aphwami en domba oʼgonogwi ai ʼgelaʼge, is tenentarok modok welat, ik aphwami enebe enelalugabenebiso aʼge nouwagoluk, elarukmu wogonoboluk lasulat, Allah en enil aʼbosu ho tagalat, taga lema ai en e, soʼboru emin, ik emin, nele hogu lema modok erlak o. Ye, mo en emin, odouk en emin, orlouk en modok loʼbugenebise lema erlak o,” oluk moʼgulnesi.