Read Silimo Wahyu 8 Bible Online

Wahyu 8 - Silimo bible

Wahyu 8

¹Asogo moʼgulnesirikmu en, eʼberlik e, suesiʼga yat aʼge silo pogwi ai ʼgelaʼge aʼbosu ebe dopnorak pegesa aʼge ano, at Domba Emalik ano en eʼgik hebarlik pam hebelegeitikmu en mesik hebelisoma re ʼbogorl pam en setengah jam ʼgelaʼge di aʼge yu aʼge iak oborlogouk dengtakma hegi o.

²Asogo welagarik e, pobuk nil yethegi ʼgal e, malaikat enebe sabiren Allah en ʼbiʼgong iak lok aʼge ʼgelaʼge ebe sabirenat wogentesimu, at orogolema edik oruakma entegis o.

³Asogo oruakhwe, malaikat mu aʼge en sogoluak emas heleʼgik aʼge wik-wok e, di aʼge yu aʼge Allah paget narlik obogumu emas heleʼgik aʼge ano pam wagarik e, edik welaga. Asogo oruakma, Allah en e, at eiyagai ʼberlek seʼban ogwi aʼge eniak emin, kemenyan emin, emin ʼberlegat narlik obouwagoluk, kemenyan aʼbik wogesimu, di aʼge yu aʼge Allah narlik obogumu ano, ebe at ʼgain welago aʼge ebalema ano olukhwema oruakma pei lagaimu yethegi o.

⁴Asogo pei lagaihwe re, Allah eiyagai seʼban ogwi aʼge eniak emin, kemenyan eʼben emin, malaikat ano eʼgik pam en Allah orogolema lagabisoma hegi o.

⁵Asogo tegeitik, eʼberlik e, at malaikat ano en odouk di aʼge yu aʼge wusogo Allah narlogwi aʼge ano wesirik, sogoluak ano ogola yagasogo re, ʼgwiangma woroksogo hwikha ʼbu aga laga. Asogo ʼbelakpou wagoam e, ebinal pobuk naduk yebekhasulat, orlolu iak logat ʼbaktak poluk orlu eselat, mouk aʼbik erlang-perlang hasulat, tisokhwe hegi o.

⁶Asogo hegirikmu en, eʼberlik e, malaikat enebe sabiren aʼge ebano ʼbiʼgong lok aʼge ʼgelaʼge ebe sabiren en iak inghouwogoluk enebabut hebik-hebeksogo tugukhwe entegis o.

⁷Asogo enebabut heberlak poluk e, naduk malaikat mesik eʼbiʼgong iak inghasuam e, moru hagarleʼgen emin, odouk emin, mep emin, mesik oʼgwe neʼgarlok-heʼgarlok takpoluk ʼgwiangma hwikha ʼbu agoam e, ʼgwiang emin, e lok aʼge emin, ebe henagan pam meʼgisogo poluk ʼbiren ukpasulat, mesik odouk en aling-ling wokho nasulat, eʼgela herleʼgela un aʼge ʼberlegat nasulat, tisoma yethegi o.

⁸Ai ʼgelaʼge, at malaikat naduk eʼbiʼgong iak inghesirikmu en, pobuk at mesik eʼbiʼgong iak inghasuam e, dom ʼgelaʼge lok aʼge mesik odouk magale dain osoam e, ik laut lok aʼge yeʼgelakma hwikha ʼbu agoam e, ik laut emin, Allah en walhesi aʼge ik laut ogola welago aʼge emin, ik so lok aʼge onuk kapal emin, ebe henagan pam meʼgisogo, ʼbiren ukpasulat, mesik wiagap pasuam e, ik orogole mep agalat, di aʼge yu aʼge ik olomu aʼge logon waragalat, kapal wiak agalat, tisoma yethegi o.

¹⁰Asogoat is malaikat ʼbiren eneʼbiʼgong iak ingholukmu en mesik eʼbiʼgong iak inghasuam e, hwesagal lok aʼge ʼbogorl pam en esaga heberlak aʼge ʼgelaʼge magale ʼgwialogo ʼbu agarik, ik elaruk oʼgwe emin, ik ebe lok wago aʼge emin, henagan pam meʼgisogo poluk, ʼbiren ukpasulat, mesik esik aʼbik aʼge takpoluk pasumu hegi o. Hwesagal ai onuk e, Esigwiak. At en asogo ik esigapsogo pasumu no oluk e, aphwami ik noʼgwiam enebe aʼbigat waragaihwe entegis o.

¹²Asogo malaikat enebe henagan eneʼbiʼgong iak inghegesarikmu en, mesik eʼbiʼgong iak inghasuam e, mo emin, dugwi emin, hwesagal emin, aphwami ʼgoʼbu waronobogwiam enanni erlak ago ai ʼgelaʼge, enamolit henagan pam meʼgisogo poluk, ʼbiren ukpasulat, mesik hik agalat yoru erlakma en mo eselat, o erlige mesigat aʼge, lok oʼgwe mo yerisolomtik en, wei oʼgwe yoru erlakma en mo eselat, o hup mesigat aʼgeat de, lok oʼgwe dakharak wolomtik en, wei oʼgwe hik modok agalat, tisoma nil hegi o.

¹³Asogo egeitikmu en, pobuk yethegi ʼgal e, sue pedi-pedi ʼgelaʼge ʼbogorl lik ʼgwiang ʼbelap ʼburl eba agapsaburl langsogo darak neselat e, iak loksogoat disogo ese laga, “Malaikat enebe ugan eneʼbiʼgong iak inghegesarikmu en e, pobuk malaikat enebe henagan en eneʼbiʼgong iak inghogwiam, aphwami ʼberlegat ʼgwiangma welagai aʼge, modok wiagabonobua ai re, Eige! Eige! Enebe nede o!” oluk il nosoma nesaʼgo hwelegis o.