Read Silimo Wahyu 9 Bible Online

Wahyu 9 - Silimo bible

Wahyu 9

¹Asogo malaikat enebe ugan en eneʼbiʼgong iak inghegesarikmu en, mesik eʼbiʼgong iak inghasuam e, hwesagal mesik en ʼgwiang ogola opma ʼbugumu, orogobu ʼgoduk horuagoluk ʼgoduk horogwi aʼge onuk kunci wogegisema ʼbogorl pam en ʼgwiangma ʼbu agoma yethegi o.

²ʼBu agarik, ʼgwiang ogola opma orogobu ʼgoduk hwerisoam e, odouk hobu yabuk serlik pogwiam ligago ai ʼgelaʼge, ʼgoduk hwerik oʼgwe ai en, hobu ligagalat e, mo emin, ʼbogorl emin, hiktak pasumu yethegi o.

³Hobu ai ogola en e, di hoʼbukhwap yu hoʼbukhwap erlelim iak en erlelik enebasu ai ʼgelaʼge, iak en aphwami erlilenebise lemagoluk, eiyerak enebegesema, hobu eʼgerlak oʼgwe en orlu aga laga.

⁴Is hoʼbukhwap ai moʼgulentasulat e, “E ebe emin, eʼgela emin, di aʼge yu aʼge owi yogo mu aʼge logon emin, ʼberlegat wiagap po modok mia o. We, aphwami Allah esilo eneʼberli pam pelal wogo erlak aʼge holugat wiagabenebip o,” oluk onoborlu egesema entegis o.

⁵Asogo onoborlu agalat, “Aphwami enebe modok ʼbeʼgi waronobogup no yo. We, erlelim iak en erlilentasuam nonouk wiaksogo togwi ai ʼgelaʼge, dugwi huaben welat, nonouk wik-wiaksogo togu lemak o,” oluk moʼgulentegisema entegis o.

⁶Asogo tagonobogukhwe obotut en wik-wiaksogo hogulat, “Nenebe lebeksogo warolo e,” oluk waromogoluk, onuʼgwarek en di walhogulat, yu walhogulat, tua aʼge re, enebe lebeksogo warema erlak, oluk egeimu no oluk e, warom erlakma en nonouk nak togwi modok welema o.

⁷Ye, is hoʼbukhwap ai enebe re, wam kuda, aphwami en oʼborl pam huragalat weim ebil louwogoluk esan polik pogumu welagai ai ʼgelaʼge welegesa. Is ai onorogole re, aphwami onorogole ʼgelaʼge, enaʼgul pam e, ʼgare-ʼgare ʼgelaʼge emas aʼge ʼbuktak.

⁸Ye, enasu re, hwami enasu ʼgelaʼge. Ye, eniak e, mene orlomene onuk singa ai aʼge iak ʼgelaʼge.

⁹Ye, enemik pam e, sing ʼbuktogwi ai ʼgelaʼge, ʼbesimeʼgen aʼge ʼbuktak. Ye, enagapsaburl oborlogouk e, ap weim ebi louwogoluk wam kuda esan aʼbik aʼge en ʼgwiang so ʼgelaʼge logon ebam dipsogo legenak aʼge onuk kereta aʼge lisogo wogonoboluk, lasukhwe, oyuk amitmit ʼbo pasu ai ʼgelaʼge o.

¹⁰Ye, enage erlelim age iak langtak ai ʼgelaʼge oruakma re, dugwi huaben welat eniak en aphwami erlilenebise lemagoluk eiyetak enebegesema erlilonobogumu entegis o.

¹¹Ye, is ai onue ʼgain onuk logo aʼge tenentarok welago aʼge re, at malaikat Allah en ʼgwiang ogola orogobu ʼbelagenebegeimu welago aʼge anoat o. At ai onuk, nis neniak pam e, wiagabenebiso aʼge oluk u ʼgelaʼge, is aphwami Ibrani aʼge eniak pam e, onuk Abadon ogulat, ye, is aphwami Yunani eniak pam e, Apolion ogulat, ogumu yethegi o.

¹²Asogo wiagabonobua aʼge re, mesik wiagabenebegeitik, pobuk agauwa ʼbiren pam agaikhen wiagabonobua aʼge owan oruak o.

¹³Malaikat enebe huaben eneʼbiʼgong iak asogo inghegesarikmu en, mesik eʼbiʼgong iak inghasuam, di aʼge yu aʼge Allah paget narlogwi aʼge ebale, ebe emas heleʼgik aʼge, ye, oʼgut pema-pema ugan pam wam sapi iak ʼgelaʼge heleʼgik aʼge, Allah orogolema oruakma eba en aphwami eniak ʼgelaʼge ogumu hwelegis o.

¹⁴At iak ai en e, at malaikat mesik eʼbiʼgong iak inghesi aʼge ano en, asogo iak ingholuk e, eʼgikmu tenak oruakma disogo moʼgulesi, “Malaikat enebe ugan pam ik lok aʼge mesik onuk Efrat esaʼgoma herle werak oruak aʼge ebano herle hebilenebi lak o,” oluk moʼgulesi.

¹⁵Asogo moʼgulesi ai re, is malaikat ai en aphwami enebe henagan pam meʼgisogo onoboluk, ʼbiren ugonobogulat, mesik tahun ai pam, dugwi ai pam, agauwa ai pam, jam ai pam, enebe modok warenebil lo yo, oluk pageat Allah en yoʼgo enebesimu ʼgagalak oruakma, herle hebilonobogumu nil hegi o.

¹⁶Asogo entegistikmu en, pobuk moʼgulneselat e, “Ap tentara esan logolak wam onokuda loʼbok oʼborl pam hweriogo oruakma entigen ai, enebe ʼberlek e, 200 juta yat oruak o,” oluk moʼgulnosoma nesaʼgo hwelegis o.

¹⁷Asogo hwelegistikmu en, pobuk wam kuda emin, aphwami oʼborl pam hweriogo aʼge emin, nabi ʼgelaʼge pam yethegi o. Is ai enemik pam sum sing ʼbuktogwi ai ʼgelaʼge ʼbuktak oruakma entegis o. Asogo entegis ai re, is logon onosum il odouk magale ʼgelaʼge ʼbuktak, ye, is logon, onosum il ʼbogorl lalu ʼgelaʼge ʼbuktak, ye, is logon onosum orogole ʼbogorlik ʼbelak aʼge ʼgelaʼge ʼbuktak, ye, onokuda ebano aʼgul e, mene orlomene onuk singa ai aʼge aʼgul ʼgelaʼge. Ye, enemde elema en e, odouk emin, hobu emin, hwedali al ʼgelaʼge eʼben wiak aʼge onuk belerang ai aʼge emin, liplau waga laga.

¹⁸Asogo odouk emin, hobu emin, belerang eʼben wiak aʼge ai emin, ebe henagan wiagabenebiso aʼge ai, enemdelema en liplau wagalat e, aphwami enebe henagan pam meʼgisogo onoboluk, ʼbiren ugenebasulat, mesik enebe ʼbeʼgi modok warenebil lagaimu en entegis o.

¹⁹Is enemdelema en asogo waronobogulat, ye, enage aʼgum ʼgosu aʼgul oruak aʼge ʼgelaʼgeatma re, asogo waronobogulat, tugumu entegis o. Is wam kuda ai enanni re, enemde emin, enage emin, aiatma re, aphwami enebe asogo di obotut yu obotut enebam poluk waronobogu legesa ai o.

²⁰Asogo aʼgeat de, is aphwami pema akhit waronobu erlak aʼge ai en, muʼgat ebabut wiak aʼge ebam heʼberik welat, eneʼgik en dogwi asua emas aʼge emin, perak aʼge emin, tembaga aʼge emin, helep aʼge emin, e aʼge emin, wusogo pogwi ai o. Asogo wusogo pogwi ai, is dogwi ai en, enil ontogwi erlagat, enesaʼgo hologwi erlagat, ebela lagai erlagat, aʼgeat de, asogo wusogo poluk,

²¹aphwami logon enebe ele yakho waronobogulat, logon ʼbamo ʼgelaʼge ele erlak aʼge waronobogulat, ʼbabi tenontugulat, yogorlia wogulat, togu legesa aʼge ukpoluk enebabut heberlom erlakma en welat e, wiak modok hwedigat tugukhwe entegis o.