Read Simba San Mateo 27 Bible Online

San Mateo 27 - Simba bible

San Mateo 27

¹Jare cõe ma yave, opaete sacerdote reta itenondegua reta jare tenta guasu pegua reta itenondegua reta uyemboemboe Jesús re, uyucaca vaerã.

²Jayave uipocua Jesús jare güɨraa mburuvicha guasu Poncio Pilato pe umee. Judas imano

³Jayave Judas (Jesús umee vae) ipɨatɨtɨ uyapo vae re. Echa'ã uicuaa ma quirãi Jesús jovaicho reta umbɨjeco ma Jesús. Jayave güɨraa ye jocua treinta corepoti sacerdote reta itenondegua reta jare tenta guasu pegua reta itenondegua reta ñugüɨnoi vae pe.

⁴Jare jei chupe reta: —Ayapo mbaeyoa. Echa'ã amee peve jocua cuimbae teco güɨnoi mbae vae piyucaca vaerã —jei. Jayave jae reta jei Judas pe: —Jocua mbae'ã co oreve. Nde co nenoi teco.

⁵Jayave Judas omombo corepoti Tumpa jo pe. Jayave oẽ Tumpa jo güi oo uyeyuvɨ.

⁶Jayave sacerdote reta itenondegua reta omonoo jocua corepoti jare jei: —Jupi'ã co ñañono ye vaerã cua corepoti jɨru Tumpa jo pe oĩ vae pe. Echa'ã ñamee Judas pe yandepuere vaerã yayucaca Jesús —jei reta.

⁷Jayave uyemɨngueta reta uicuaa vaerã mbae ra uyapota corepoti pe. Jayave ogua ñaeu iyapoa iɨvɨ, uñeñotɨca vaerã joco pe ambɨe ɨvɨ pegua reta.

⁸Jáeramo umbɨjee jocua ɨvɨ: Ɨvɨ tugüɨ jepɨcue.

⁹Jare jucuarãi uyeyapo Tumpa iñee aracae umɨmbeu vae Jeremías jei vae. Echa'ã jae jei cuarãi: “Jare jae reta omonoo jocua treinta corepoti. Echa'ã Israel pegua reta umbɨepɨ treinta corepoti jocua cuimbae re. Jepɨ co treinta corepoti.

¹⁰Jayave ogua pɨpe ñaeu iyapoa ico, yandeYa jei cheve rami.” Jucuarãi jei. Pilato uyemɨngueta Jesús ndive

¹¹Jare Jesús uyemboɨ mburuvicha guasu jovai. Jayave mburuvicha guasu upɨrandu chupe: —¿Nde pa co jae judío reta juvicha guasu? —jei. —Nde ndere rami jae co che —jei Jesús chupe.

¹²Jare sacerdote reta itenondegua reta jare tenta guasu pegua reta itenondegua reta uñeapo Jesús re yave, Jesús jei'ã mbae ave.

¹³Jayave Pilato jei chupe: —¿Ndiyandu'ã pa quirãi jeta mbaembae re uñeapo reta nderé?

¹⁴Ẽrei Jesús jei'ã mbae ave chupe. Jáeramo mburuvicha guasu ipɨacañɨ jese. Pilato jei Jesús umanota co

¹⁵Jare pascua ara rupi Pilato oyoracañoi penti pereso tenta guasu pegua reta uipota vae.

¹⁶Jare peresorɨru pe oĩ penti cuimbae jerãcua vae. Jee co Barrabás.

¹⁷Jayave Pilato upɨrandu yatɨ vae reta pe: —¿Pipota pa ayoraca vaerã peve Barrabás ani Jesús, Cristo jee vae?

¹⁸Echa'ã jae uicuaa judío reta umee Jesús chupe ñacatãa jese ramo.

¹⁹Jare Pilato uguapɨ oĩ yave uãa vaerã Jesús, jembireco ombou quía jei vaerã chupe: —Agüɨye iyapo mbae jocua cuimbae jupi vae pe. Echa'ã aiporara ma pɨare chepau pe jae jeco pegua.

²⁰Ẽrei sacerdote reta itenondegua reta jare tenta guasu pegua reta itenondegua reta omboemboe yatɨ vae reta uyerure vaerã Pilato pe oyoraca vaerã Barrabás jare uyucaca vaerã Jesús.

²¹Jayave Pilato upɨrandu chupe reta: —¿Quía nunga pa cua mocui cuimbae güi pipota ayoraca vaerã peve? —Barrabás —jei reta chupe.

²²Jayave Pilato upɨrandu chupe reta: —Jucuarãi yave, ¿mbae pa pipota ayapo vaerã Jesús, Cristo jee vae pe? Jayave opaete vae jei: —Tuyecutuca curusu re.

²³Ẽrei Pilato upɨrandu chupe reta: —¿Mbae icavi mbae vae pa uyapo? Ẽrei jae reta iñeeãta reve jei: —Tuyecutuca curusu re.

²⁴Jare Pilato uicuaa yave ipuere'ã mbae uyapo oyoraca vaerã Jesús - echa'ã judío reta umbɨpɨ uyapo tecorai - jei güeru vaerã chupe ɨ jare uyepoe yatɨ vae reta jovai. Jayave jei chupe reta: —Che anoi'ã teco cua cuimbae jupi vae imano re. Pe reta penoi teco —jei.

²⁵Jayave opaete yatɨ vae reta jei: —Ore jare oriñemoñaa reta turugüɨnoi teco imano re.

²⁶Jayave Pilato oyoraca chupe reta Barrabás. Jare uinupaca ma yave Jesús chicote pe, umee sundaro reta pe, uicutu vaerã curusu re.

²⁷Jayave mburuvicha guasu isundaro reta güɨraa Jesús palacio pe, jare umbatɨ opaete ĩru sundaro reta joco pe.

²⁸Jayave sundaro reta omboi Jesús güi jemimonde jare omondeca chupe temimonde pɨ̃ta vae.

²⁹Jayave oñope reta yurãti catuii vae jare umbapúa oñono Jesús iñãca re. Umee reta vi chupe penti tacuarãsɨ uipɨsɨ vaerã ipo iyacata pe. Jayave uyeatɨca reta jae jovai jare oyoyai. —¡Viva, judío reta juvicha guasu! —jei reta.

³⁰Jare undɨvɨ reta jese. Jayave uipɨsɨ reta tacuarãsɨ uiporu iñãca re.

³¹Jare opa oyoyai reta yave, sundaro reta omboi chugüi temimonde pɨ̃ta vae, jare omondeca ye chupe jemimondei. Jayave güɨraa reta mburuvicha guasu joca güi, uicutu vaerã curusu re. Jesús uyecutuca curusu re

³²Jare yugüɨraa reta rambueve, uecha penti cuimbae Simón jee vae. (Cua Simón tenta guasu Cirene pegua co.) Jayave sundaro reta güɨraaca Simón pe Jesús icurusu.

³³Jare sundaro reta güɨraa Jesús Gólgata jee vae pe. (Cua uipota jei: “Ãcacuerenda”.)

³⁴Jayave umee reta Jesús pe vino uyea mbae iro vae ndive vae. Ẽrei Jesús uicuaa yave mbae jocua, jou'ã.

³⁵Jayave sundaro reta uicutu curusu re. Jayave uyuguari reta Jesús jemimonde re, uicuaa vaerã mbae nunga penti penti güɨraa iyupe vaerã. Jucuarãi uyapo reta uyeyapo vaerã Tumpa iñee aracae umɨmbeu vae jei vae. Echa'ã jei cuarãi: “Uyuguari reta cheremimonde re, uicuaa vaerã mbae nunga penti penti güɨraa iyupe vaerã.” Jucuarãi jei.

³⁶Jayave sundaro reta uguapɨ joco pe uyandareco vaerã Jesús re.

³⁷Jare oñono reta curusu re Jesús iñãca iárambo uyecuatía mbae umbɨjeco jesegua vae: “Cua co Jesús, judío reta juvicha guasu.”

³⁸Jare sundaro reta uicutu vi mocui imonda vae reta, jare oñono penti Jesús iyacata cotɨ jare ĩru iyaso cotɨ.

³⁹Jare uasa vae reta uñeãcambɨvava reve jei icavi mbae vae Jesús pe.

⁴⁰—Nde ndere nembusururuta co Tumpa jo jare ndiyapo yeta mbapɨ ara pe —jei reta chupe—. Iyerepɨ. Nde co jae Tumpa Taɨ yave, egüeyɨ curusu güi —jei reta.

⁴¹Jae ramiño vi sacerdote reta itenondegua reta jare mboroyocui re oporomboe vae reta jare tenta guasu pegua reta itenondegua reta oyoyai.

⁴²—Jae uepɨ ĩru vae reta —jei reta—. Ẽrei ipuere'ã jae uyerepɨ. Jae co Israel pegua reta juvicha guasu yave, tugüeyɨ añave curusu güi, yarovia vaerã jese —jei reta—.

⁴³Güɨrovia Tumpa re; Tumpa tuepɨ añave, uipota yave. Echa'ã jae jei: ‘Che co jae Tumpa Taɨ’ —jei, jei reta.

⁴⁴Jare imonda vae Jesús ndive uyecutuca vae reta jei icavi mbae vae chupe. Jesús umano

⁴⁵Jare guarasɨ ara mbɨte güive mbapɨ ora rupi uñemɨpɨ̃tumimbi opaete ɨvɨ pe.

⁴⁶Jayave mbapɨ ora ma caaru yave Jesús iñeeãta reve jei: —Elí, Elí, ¿lama sabactani? (Cua uipota jei: “CheTumpa, cheTumpa, ¿maera pa chereya?”)

⁴⁷Amocue joco pe ñugüɨnoi vae reta uyandu jare jei tẽi: —Mase, Elías ueni.

⁴⁸Jare jupivoi penti vae osi oo umãquɨ esponja vinagre pe, jare oñono tacuarãsɨ re, jare omondo Jesús iyuru cotɨ.

⁴⁹Ẽrei ĩru reta jei: —Eãro. Yaecha ou Elías umbɨgüeyɨ vaerã.

⁵⁰Jayave Jesús tanta usapɨcai, jare umano.

⁵¹Jayave Tumpa jo umbɨyao vae osoro mbɨte rupi ɨvate güi ɨvɨ cotɨ. Jare ɨvɨ ucãta jare itape reta ovo.

⁵²Jare teõgüerɨru reta uyepea, jare jeta uñeñono tee Tumpa peguarã umanocue vae reta icove ye,

⁵³jare oẽ teõgüerɨru reta güi Jesús icove ye yave ou umanocue vae reta ipɨte güi. Jae reta yugüɨraa Jerusalén pe jare uyecuaa jeta vae pe.

⁵⁴Jare sundaro reta juvicha Jesús re uyandareco oĩ vae jare jae ndive ñugüɨnoi vae reta uecha yave quirãi ɨvɨ ucãta jare opaete uyeyapo vae, uquɨye ete jare jei: —Añeteñoi yepe, cua cuimbae co jae Tumpa Taɨ.

⁵⁵Jare jeta cuña reta umae ñugüɨnoi mbɨrɨ güi. Cua cuña reta yugüeru Jesús ndive Galilea güi uyeyocui vaerã chupe.

⁵⁶Cua reta ipɨte pe ñugüɨnoi María Magdalena, jare Jacobo jare José ichɨ María jee vae, jare Zebedeo taɨ reta ichɨ. José oñono Jesús jetecue teõgüerɨru pe

⁵⁷Jare guarasɨ uique ma yave, penti cuimbae icocatu vae tenta guasu Arimatea pegua José jee vae - jae vi co penti Jesús jemimboe -

⁵⁸oo Pilato pe, jare uyerure chupe Jesús jetecue re. Jayave Pilato oyocui uñemee vaerã chupe Jesús jetecue.

⁵⁹Jayave José umbɨgüeyɨ Jesús jetecue, jare oñoma penti nieso iquɨa mbae vae pe.

⁶⁰Jayave oñono penti teõgüerɨru ipɨau vae itape uyeyoo vae pe, (José imbae co jocua teõgüerɨru) jare umbɨyapayere ita tuicha vae teõgüerɨru jonque re. Jayave José oo ye teõgüerɨru güi.

⁶¹Jare María Magdalena jare ĩru cuña María jee vae uguapɨ ñugüɨnoi teõgüerɨru jovai. Sundaro reta uyandareco teõgüerɨru re

⁶²Jare jocua ara opaete judío reta uyeyapɨcatu ñugüɨnoi pɨareve peguarã. Jayave pɨareve pe sacerdote reta itenondegua reta jare fariseo reta yugüɨraa Pilato pe,

⁶³jare jei chupe: —Oreruvicha, oremandúa ma quirãi jocua cuimbae upurumbɨtavɨse vae ndei umano mbove jei mbapɨ ara rupi icove yeta ou umanocue vae reta ipɨte güi.

⁶⁴Iyocui ndesundaro reta uyandareco vaerã teõgüerɨru re mbapɨ ara pegua, agüɨye vaerã jemimboe reta yugüɨraa joco pe pɨ̃tu yave oñomi vaerã jetecue. Echa'ã jucuarãi yave, jeita reta opaete vae pe icove ye ma co ou umanocue vae reta ipɨte güi. Jare jucuarãi yave, jae reta umbɨtavɨta jeta Jesús umbɨtavɨ vae reta güi —jei reta.

⁶⁵Jayave Pilato jei chupe reta: —Joco pe penoi chesundaro reta. Pecua pembɨyandarecoca cavi jese pepuere rupi —jei.

⁶⁶Jayave jae reta yugüɨraa jare uyuquenda cavi teõgüerɨru jonque. Echa'ã oñono mbae ita tuicha vae re agüɨye vaerã quía uipea, jare ueya joco pe sundaro reta uyandareco vaerã teõgüerɨru re.