Read Simba San Mateo 28 Bible Online

San Mateo 28 - Simba bible

San Mateo 28

¹Mbutuu ara uasa ma yave, neimbove asɨ domingo ara pe María Magdalena jare ĩru cuña María jee vae yugüɨraa teõgüerɨru cotɨ.

²Jare ɨvɨ tanta ucãta. Echa'ã penti ángel yandeYa pe uyeyocui vae ugüeyɨ ara güi jare umbɨsɨrɨ ita tuicha vae teõgüerɨru jonque güi. Jayave ángel uguapɨ oĩ ita re.

³Jare jova uyecuaa ama uvera vae rami. Jare jemimonde tĩ asɨ roɨ tĩ asɨ vae rami.

⁴Jare teõgüerɨru re uyandareco ñugüɨnoi vae reta urɨrɨ uquɨye ramo, jare umano vae echa upɨta reta.

⁵Jayave ángel jei cuña reta pe: —Agüɨye pequɨye. Echa'ã aicuaa peeca peĩ Jesús curusu re uyecutuca vae.

⁶Mbaetɨ ma cua pe oĩ. Icove ye ma ou umanocue vae reta ipɨte güi, jae jei rami. Peyu pemae jendacue re —jei—.

⁷Jare pecua voi pere jemimboe reta pe: ‘Jae icove ye ma ou umanocue vae reta ipɨte güi. Jae oota perenonde Galilea pe. Joco pe peechata.’ Amɨmbeu ma co peve —jei chupe reta.

⁸Jayave cuña reta oẽ voi teõgüerɨru güi. Uquɨye reta jare uyerovia tuicha reta. Jare osi yugüɨraa umɨmbeu vaerã Jesús jemimboe reta pe.

⁹Jare Jesús uñeovãiti jae reta ndive jare jei chupe reta: —Piyerovia catu. Jayave cuña reta uyeatɨca ɨvɨ pe uicuãva ipɨ rupi jare umbɨadora.

¹⁰Jayave Jesús jei chupe reta: —Agüɨye pequɨye. Pecua pemɨmbeu cherɨvɨ reta pe yugüɨraa vaerã Galilea pe. Joco pe cherechata —jei. Sundaro reta umɨmbeu vae

¹¹Jare cuña reta yugüɨraa ye rambueve teõgüerɨru güi, amocue sundaro tenonde yave teõgüerɨru re uyandareco vae reta yugüɨraa vi tenta guasu pe, jare umɨmbeu sacerdote reta itenondegua reta pe opaete uyeyapo vae re.

¹²Jare sacerdote reta itenondegua reta uyembatɨ tenta guasu pegua reta itenondegua reta ndive. Jare uyemboemboe ma yave, umee jeta corepoti sundaro reta pe.

¹³Jare jei chupe reta: —Pere: ‘Jesús jemimboe reta yugüɨraa teõgüerɨru pe pɨ̃tu yave, jare oñomi Jesús jetecue ore ndoque noĩ rambueve’ —pere, jei reta—.

¹⁴Jare mburuvicha guasu cua uicuaa yave, numɨmbeuta chupe pe reta mbaetɨ co teco penoi —jei reta.

¹⁵Jayave sundaro reta uipɨsɨ corepoti jare uyapo sacerdote reta itenondegua reta jare tenta guasu pegua reta itenondegua reta jei chupe reta uyapo vaerã vae. Jare jecuaeño opaete judío reta jei jucuarãi co uyeyapo. Jesús oyocui jocua once jemimboe reta

¹⁶Jayave jocua once Jesús jemimboe reta yugüɨraa Galilea pe penti ɨvɨtu guasu re Jesús umɨmbeu chupe reta vae rami.

¹⁷Jare jemimboe reta uecha yave Jesús, umbɨadora. Ẽrei amocue vae ipuere'ã güɨrovia jae co Jesús vae.

¹⁸Jare Jesús ou jei chupe reta: —Opaete mbaepuere uñemee ma cheve ara pe jare ɨvɨ pe.

¹⁹Jáeramo pecua peporomboe opaete que rupi rupi jare pembɨbautiza cheRu jee re jare cheree re jare Espíritu Santo jee re —jei—.

²⁰Jare pemboe reta opaete che poyocui vae re. Jare che aĩta pe reta ndive jaeño mai pegua cua ara reta opa regua —jei.