Read Simba San Marcos 3 Bible Online

San Marcos 3 - Simba bible

San Marcos 3

¹Jesús uique ye judío reta itupao pe, jare joco pe oĩ penti cuimbae ipo jovaicho tɨpa vae.

²Jare joco pe ñugüɨnoi vae reta umae ngatu Jesús re, uecha vaerã umbɨgüerata ra quía mbutuu ara pe. Echa'ã jae reta uipota tẽi umbɨjeco Jesús.

³Jayave Jesús jei cuimbae ipo jovaicho tɨpa vae pe: —Epũa eyu iyemboɨ cua reta jovai.

⁴Jare Jesús upɨrandu joco pe ñugüɨnoi vae reta pe: —¿Yayapota pa icavi vae ani icavi mbae vae mbutuu ara pe? ¿Icavi pa yapuruepɨ ani yapuruyuca vaerã mbutuu ara pe? ¿Mbae pa jei mboroyocui cua re? —jei chupe reta. Ẽrei jae reta jei'ã mbae ave.

⁵Pochɨ reve Jesús umae iyɨpɨ rupi ñugüɨnoi vae reta re, jare tuicha ipɨatɨtɨ jae reta ipɨatanta ramo. —Eupi ndepo —jei cuimbae pe. Jayave cuimbae ipo uupi, jare ucuera voi.

⁶Jayave fariseo reta oẽ judío reta itupao güi, jare uyemboemboe voi herodiano reta ndive Jesús re, quirãita ra uyucaca vaerã. Jeta uyembatɨ ɨ guasu jembeɨ pe

⁷Jayave Jesús jare jemimboe reta yugüɨraa ɨ guasu pe, jare yugüɨraa vi jaɨcue jeta Galilea güi. Jare yugüeru vi jae oĩ vae pe jeta Judea pegua reta, Jerusalén pegua reta, ɨvɨ Idumea pegua reta, Jordán jovaicho pegua reta, jare tenta guasu Tiro jare Sidón iyɨpɨ rupigua reta, uyandu yave opaete Jesús uyapo vae regua.

⁹Jare Jesús oyocui jemimboe reta umɨcuatɨ̃ro chalana jae oĩ vaerã pɨpe, agüɨye vaerã oyopɨ yatɨ vae reta.

¹⁰Echa'ã jae umbɨgüera ma jeta vae, jare opaete ĩru imbaerasɨ vae reta uñemɨañamɨaña yugüeru icotɨ. Echa'ã uipota oya jese, uyavɨquɨ vaerã.

¹¹Jare aña reta uecha Jesús yave, uyeatɨca jae jovai jare iñeeãta reve jei: —Nde co jae Tumpa Taɨ.

¹²Jare Jesús oyocui ete: —Agüɨye pemɨmbeu quía co che. Jesús uiparavo doce cuimbae reta

¹³Jayave Jesús oo ɨvɨtu guasu re, jare ueni jae uiparavo vae retaño. Jare jae reta yugüeru jae oĩ vae pe.

¹⁴Jare jocua reta güi uiparavo doce cuimbae reta umɨĩru vaerã. Jae omondota reta umɨmbeu vaerã Tumpa iñee.

¹⁵Umeeta vi chupe reta mbaepuere umbɨgüera vaerã imbaerasɨ vae reta jare umbɨsɨrɨ vaerã aña reta oya jese vae reta güi.

¹⁶Cua co jae uiparavo vae reta jee: Simón (Jesús umbɨjee Pedro),

¹⁷jare Zebedeo taɨ reta Jacobo jare Juan jee vae (Jesús umbɨjee cua mocui reve Boanerges. Cua jee uipota jei: “Ara jɨapu vae rami”),

¹⁸jare Andrés, Felipe, Bartolomé, Mateo, Tomás, Alfeo taɨ Jacobo jee vae, Tadeo, Simón (jae co Zelote pe ueni vae),

¹⁹jare Judas Iscariote (cua cuimbae umee Jesús jovaicho reta pe). Jayave Jesús ou ye jenta pe jae reta ndive. Jei reta icavi mbae vae Espíritu Santo cotɨ

²⁰Jare uyembatɨ ye jeta vae. Jáeramo Jesús jare jemimboe reta iquĩi'ã ucaru vaerã.

²¹Jesús jentarã reta cua uicuaa yave, yugüeru güɨraa vaerã tẽi. —Iyaracuaa'ã ma oĩ —jei reta.

²²Jare mboroyocui re oporomboe vae yugüeru Jerusalén güi vae reta jei: —Aña guasu Beelzebú jee vae oya ma jese, jare aña guasu imbaepuere pe umbɨsɨrɨ aña reta oya jese vae reta güi —jei reta.

²³Jayave Jesús ueni reta, jare jei chupe reta umɨjaanga reve: —Ndarau Satanás jaei uyembɨsɨrɨ cuimbae güi.

²⁴Penti tenta guasu pegua reta oyovaicho uyupii yave, opata co jocua tenta guasu.

²⁵Jae ramiño vi penti tenta pegua reta oyovaicho uyupii yave, opata co jocua tenta.

²⁶Jare Satanás pochɨ iyupe yave, jare imbaepuere uyembɨyao yave, ndarau tẽi ma ico. Opata tẽi co —jei chupe reta—.

²⁷Ime yave quía uipota uique cuimbae ipɨrãta vae jenta pe upɨ̃ro vaerã imbaembae chugüi vae, uipocuata rani cuimbae ipɨrãta vae. Jayave ramo ipuereta upɨ̃ro imbaembae chugüi —jei—.

²⁸Añete che jae peve, opaete ɨvɨ pegua reta imbaeyoa reta jare opaete iñee icavi mbae Tumpa cotɨ jei reta vae Tumpa ipuere umbai.

²⁹Ẽrei Tumpa ndarau etei umbɨasa jei icavi mbae vae Espíritu Santo cotɨ vae pe. Uyembɨjecota jaeño mai pegua —jei chupe reta.

³⁰Echa'ã tenonde yave jae reta jei: —Aña oya ma jese. Jáeramo Jesús jei jucuarãi chupe reta. Jesús ichɨ jare tɨvɨ reta

³¹Jayave Jesús ichɨ jare tɨvɨ reta yugüeru uvãe Jesús oĩ vae pe, jare oca güi omondo uenica.

³²Jare uguapɨ ñugüɨnoi iyɨpɨ rupi vae reta jei chupe: —¡Aipo! Ndesɨ jare nderɨvɨ reta oca pe ñugüɨnoi, jare ndereca.

³³—¿Quía nunga pa co jae chesɨ jare cherɨvɨ reta? —jei Jesús chupe reta.

³⁴Jayave umae iyɨpɨ rupi uguapɨ ñugüɨnoi vae reta re. —Cua nunga reta co jae chesɨ jare cherɨvɨ reta —jei—.

³⁵Echa'ã Tumpa jei vae uyapo vae reta co jae cherɨvɨ jare cherindɨ jare chesɨ —jei.