Read Simba San Marcos 7 Bible Online

San Marcos 7 - Simba bible

San Marcos 7

¹Fariseo reta jare amocue mboroyocui re oporomboe vae Jerusalén güi yugüeru vae reta uyembatɨ Jesús oĩ vae pe.

²Jae reta uecha amocue Jesús jemimboe reta ucaru ñugüɨnoi uyepoe mbae reve. Echa'ã jae reta uyapo ve'ã ma itenondegua reta iporomboe. Jáeramo umbɨjeco reta.

³Echa'ã fariseo reta jare opaete judío reta uyepoeñoi ndei ucaru mbove, uyapo vaerã itenondegua reta iporomboe.

⁴Jare yugüeru ye yave umaemee vae reta ñugüɨnoi vae güi, jecuaeño uyepoe ndei ucaru mbove. Jare uyapoñoi reta jeta ĩru mbaembae itenondegua reta iporomboe. Echa'ã oyoe vaso reta, yapepo reta, paila reta jare tupa reta.

⁵Jayave fariseo reta jare mboroyocui re oporomboe vae reta upɨrandu Jesús pe: —¿Maera pa nderemimboe reta uyapo'ã yandetenondegua reta iporomboe? ¿Maera pa ucaru reta uyepoe mbae reve? —jei reta.

⁶Jayave Jesús jei chupe reta: —Añete yepe Isaías imiari peré. Echa'ã jae uicuatía upurumbɨtavɨ vae reta re cuarãi:‘Cua reta chepɨu iyuru peño’ —jei Tumpa—.‘Ẽrei ipɨa pe chepɨu'ã etei.

⁷Chembɨadora-raangaiño.Che jucuarãi'ã aporoyocui’ —jei Tumpa. Jucuarãi uicuatía Isaías —jei Jesús—.

⁸Echa'ã pe reta piyapo'ã Tumpa iporoyocui, ẽrei piyapo cavi yandetenondegua reta iporomboe. Piyoe yapepo reta jare vaso reta, jare jeta cua nunga piyapo —jei.

⁹Jare Jesús jei chupe reta: —Tumpa iporoyocui pemombo co, piyapo vaerã yandetenondegua reta iporoyocui.

¹⁰Moisés jei cuarãi: ‘Ipɨu nderu jare ndesɨ.’ Jare jei vi cuarãi: ‘Jei icavi mbae vae tu ani ichɨ cotɨ vae uyeyucacata co.’ Jucuarãi jei Moisés —jei chupe reta—.

¹¹Ẽrei pe reta pere cuarãi: ‘Penti cuimbae ipuere jei tu ani ichɨ pe umeeta tẽi chupe omborɨ vaerã vae Corbán co.’ Jucuarãi pere —jei—. (Corbán uipota jei: “Amee ma Tumpa pe”.)

¹²Jayave pe reta pemaeño'ã ma jese omborɨ vaerã tu jare ichɨ —jei—.

¹³Jare jeta cua nunga piyapo. Jucuarãi pe reta pemombo Tumpa iporoyocui piyugüi piyapo vaerã yandetenondegua reta iporoyocui. Jare pemboe vi pesambiaɨ reta uyapo vaerã yandetenondegua reta iporoyocui —jei Jesús chupe reta.

¹⁴Jare Jesús ueni umbatɨ opaete joco pe ñugüɨnoi vae reta. —Piyapɨsaca cua re opaete pe reta, picuaa cavi vaerã —jei chupe reta—.

¹⁵Ipotave mbae peu vae oo perɨe pe. Jáeramo umɨnguɨa'ã pepɨa. Jocua piyapo vae jare pere vae umɨnguɨa pepɨa —jei—.

¹⁶Uipota uyandu vae tuyapɨsaca cua ñee re —jei chupe reta.

¹⁷Jare Jesús ueya yatɨ vae reta yave, uique jo pe. Jayave jemimboe reta upɨrandu chupe umɨjaanga reve jei vae re.

¹⁸Jayave Jesús jei chupe reta: —¿Pe retave pa picuaa cavi'ã? Picuaa cavi cua: Ipotave mbae peu vae umɨnguɨa'ã pepɨa.

¹⁹Echa'ã oo'ã pepɨa pe. Oo perɨe pe jare pemombo. Jucuarãi uyeyapo opaete tembíu pe —jei chupe reta.

²⁰Jare Jesús jei: —Jocua piyapo vae jare pere vae umɨnguɨa pepɨa.

²¹Echa'ã pepɨa güi oẽ opaete icavi mbae vae: pepɨa pe piyemɨngueta icavi mbae vae, piyuvanga menda re, piyapo aguasa, pepuruyuca,

²²pemonda, pipota ĩru vae reta imbaembae, piyapo icavi mbae vae, pepurumbɨtavɨ, pembɨquere, peacatãa, icavi mbae vae pere perapicha cotɨ, piyembɨcate jare pico iyaracuaa mbae vae reta rami —jei—.

²³Opaete cua icavi mbae vae oẽ pepɨa güi. Jare cua reta umɨnguɨa pepɨa —jei chupe reta. Cuña sirofenicia pegua ipurugüɨrovia

²⁴Jayave Jesús oo ye joco güi Tiro jare Sidón iyɨpɨ rupi. Jare uique yave penti tenta pe, uipota'ã tẽi quiave uicuaa vaerã jae joco pe oĩ vae. Ẽrei uicuaañoi joco pegua reta.

²⁵Jare penti cuña aña oya imembɨ cuña re vae uyandu Jesús regua, jare ou uyeatɨca jae jovai.

²⁶Jae co penti sirofenicia griega pe uyemɨngueta vae. Jae uyerure Jesús pe umbɨsɨrɨ vaerã aña imembɨ güi.

²⁷Ẽrei Jesús jei chupe: —Tiangapɨɨ rani sambiaɨ reta. Icavi'ã yaequi vaerã tembíu sambiaɨ reta güi, ñamee vaerã yɨmba-raɨ reta pe —jei.

²⁸—Añete tẽi co, carai —jei cuña Jesús pe—. Ẽrei yɨmba-raɨ mesa igüɨ pe ñugüɨnoi vae reta jou tembíu usururucue sambiaɨ reta uitɨ vae —jei.

²⁹Jayave Jesús jei chupe: —Cua ndere vae jeco pegua ndepuere ndeo. Aña usɨrɨ ma nemembɨ güi —jei.

³⁰Jayave cuña oo uvãe jenta pe yave, uecha imembɨ jupa pe oĩ. Aña usɨrɨ ma chugüi. Jesús umbɨgüera cuimbae iupaupa jare iyapɨsa mbae vae

³¹Jayave Jesús ou Tiro iyɨpɨ rupigua güi, jare uasa Sidón jare Decápolis rupi, jare ou uvãe ɨ guasu Galilea pe oĩ vae pe.

³²Jare amocue vae güeru chupe penti cuimbae iupaupa jare iyapɨsa mbae vae. Güeru vae reta uyerure Jesús pe oñono vaerã ipo jese.

³³Jayave Jesús güɨraa cuimbae yatɨ vae reta ipɨte güi. Oñono ipoãca cuimbae iyapɨsa pe. Jayave undɨvɨ, jare uyavɨquɨ cuimbae icũ chugüi.

³⁴Jayave umae ara cotɨ, jare iañeequi, jare jei: —¡Efata! (Cua uipota jei: “¡Iyepea!”)

³⁵Jayave cuimbae uyandu ma, jare icũ omɨ cavi, jare uyemɨngueta cavi ma.

³⁶Jayave Jesús oyocui reta agüɨye vaerã umɨmbeu quía pe. Ẽrei yepe tẽi oyocui ye ye, jeseve jae reta umɨmbeuñoi ĩru vae reta pe.

³⁷Jae reta ipɨacañɨ ete, jare jei: —Opaete mbaembae uyapo vae icavi ete co. Umbɨgüera iyapɨsa mbae vae reta uyandu vaerã, jare umbɨgüera vi upa reta uyemɨngueta vaerã.