Read Simba San Lucas 1 Bible Online

San Lucas 1 - Simba bible

San Lucas 1

¹Jeta vae umɨmbeu ma uicuatía reve opaete yandepɨte pe uyeyapo vae regua.

²Jocua uyeyapo vae iyɨpɨ güive uecha vae reta jucuarãi umɨmbeu yandeve. Echa'ã jae reta umɨmbeu Tumpa iñee ĩru vae reta pe.

³Jáeramo icavi echa cheve che vi aicuatía vaerã ndeve, mburuvicha Teófilo, amɨmbeu vaerã ndeve quirãi opaete uyeyapo. Echa'ã che aicuaa cavi opaete iyɨpɨ güive uyeyapo vae.

⁴Aicuatía aĩ ndeve cua, ndicuaa vaerã añete co jocua ndiyemboe jese vae. Juan oata vae regua

⁵Herodes ico yave ɨvɨ Judea pegua reta juvicha guasurã, ico vi penti sacerdote Zacarías jee vae. Jae co sacerdote penti atɨ Abías jee vae pegua. Zacarías jembireco co jae Aarón iñemoñaa reta pegua jare jee co Elisabet.

⁶Zacarías jare jembireco uyapo jupi vae jare jucuarãi umbɨyerovia Tumpa. Echa'ã jecuaeño uyapo yandeYa iporoyocui reta. Mbaetɨ quía ipuere umbɨjeco reta mbae re.

⁷Ẽrei mbaetɨ co Zacarías isambiaɨ. Echa'ã Elisabet imembɨ mbae vae co. Jare Zacarías jare Elisabet ucuacuaa ete ma.

⁸Penti ara penti atɨ Abías jee vae pegua sacerdote reta uparavɨquɨ ñugüɨnoi Tumpa jo pe. Jáeramo Zacarías uyapo oĩ iparavɨquɨ joco pe.

⁹Jare jocua ara Zacarías iparavɨquɨ co uique vaerã yandeYa jo japɨpe pe etei uapɨ vaerã mbae ipiche cavi vae. Echa'ã jecuaeño uyapo jucuarãi sacerdote reta.

¹⁰Jare jeta Israel pegua reta yatɨ ma uyerure ñugüɨnoi Tumpa jo oca pe, Zacarías mbae ipiche cavi vae uapɨ oĩ rambueve.

¹¹Jare uyecuaa Zacarías pe penti ángel yandeYa pe uyeyocui vae. Ángel uyemboɨ oĩ mbae ipiche cavi vae imesa iyacata cotɨ.

¹²Jare Zacarías uecha yave ángel, ipɨacañɨ jare uquɨye vi.

¹³Ẽrei ángel jei chupe: —Agüɨye equɨye, Zacarías. Tumpa uyandu ma ndiyerure, jare nembireco Elisabet imembɨta ndeve cuimbae. Jare nembɨjeeta Juan —jei—.

¹⁴Jare nde ndiyeroviata co tuicha. Jare jeta vi uyeroviata jae oa vae regua —jei ángel Zacarías pe—.

¹⁵Echa'ã yandeYa umbutuichacata co. Jae ndarau etei ucau. Jare tɨneeta Espíritu Santo pe ichɨ güi oa güive —jei chupe—.

¹⁶Jare umbɨyerovata yandeYa Tumpa cotɨ jeta Israel pegua reta —jei—.

¹⁷Jae oota yandeYa jenonde uauca vaerã tu reta pe isambiaɨ reta jare Tumpa jei vae uyapo'ã vae reta uyeyapo vaerã iyaracuaa vae retarã jare jupi vae retarã. Jucuarãi uyapota, Israel pegua reta uãro vaerã yandeYa. Jae icota Elías icose vae rami jare güɨnoita mbaepuere Elías güɨnoise vae rami —jei ángel Zacarías pe.

¹⁸Jayave Zacarías jei ángel pe: —¿Quirãita pa aicuaa añetete ra cua nde ndere cheve vae? Echa'ã che acuacuaa ete ma jare chembireco ucuacuaa ete ma vi —jei.

¹⁹Jayave ángel jei ye Zacarías pe: —Che co jae Gabriel. Che ayeyocui Tumpa pe. Tumpa chembou chemiari vaerã ndeve jare amɨmbeu vaerã ndeve cua ñee icavi vae —jei chupe—.

²⁰Mase, niñeeta'ã ndepɨta cua amɨmbeu ndeve vae uyeyapo regua. Echa'ã nderovia'ã che jae ndeve vae. Ẽrei che jae ndeve vae uyeyapota co ara ou uyeyapo vaerã yave —jei.

²¹Jare Israel pegua reta uãro ñugüɨnoi Zacarías oẽ vaerã Tumpa jo güi, jare ipɨacañɨ reta quirãi Zacarías upɨta ɨma Tumpa jo japɨpe pe.

²²Jare Zacarías oẽ yave, ipuere'ã omoẽ iñee chupe reta. Jáeramo jae reta uicuaa Zacarías uecha mbae Tumpa jo pe oĩ rambueve. Echa'ã jae umupũa ipo chupe reta. Ẽrei ipuere'ã etei mbae jei chupe reta.

²³Jare opa ma yave Zacarías iparavɨquɨ Tumpa jo pe, oo ye jenta pe.

²⁴Jare mbovɨ ara rupi Zacarías jembireco Elisabet ipurúa. Jayave Elisabet uñemi pandepo yasɨ jenta pe. Echa'ã jae jei:

²⁵—Cuarãi yandeYa uyapo cheve. Ɨma ma chemara ĩru vae reta güi chemembɨ'ã etei ramo. Ẽrei añave yandeYa chemborɨ agüɨye vaerã chemara chugüi reta —jei. Jesús oata vae regua

²⁶Jare Elisabet seis yasɨ ma ipurúa yave, Tumpa ombou ángel Gabriel tenta guasu Nazaret ɨvɨ Galilea pegua pe

²⁷María ipɨ. María co jae penti cuñatai güɨreco'ã etei cuimbae vae. Ẽrei jae jei ma umenda vaerã José ndive. José co jae penti David iñemoñaa reta pegua.

²⁸Jare ángel uique María oĩ vae pe jare jei chupe: —Iyerovia. YandeYa ipɨacavi ndeve. YandeYa oĩ nde ndive. YandeYa nemɨvendise ete ĩru cuña reta güi —jei.

²⁹María cua uyandu yave, ipɨacañɨ. Echa'ã uicuaa'ã mbae ra uipota jei ángel jei chupe vae.

³⁰Jayave ángel jei chupe: —Agüɨye equɨye, María. Echa'ã Tumpa ipɨacavi ndeve —jei—.

³¹Mase, ndepuruata co jare nemembɨta. Jare nembɨjeeta nemembɨ Jesús —jei María pe—.

³²Jae güɨnoita mbaepuere tuicha vae, jare jeeta co Tumpa Taɨ. Jare yandeYa Tumpa uyapota Israel pegua reta juvicha guasurã itenondegua David rami —jei—.

³³Jare jae icota Jacob iñemoñaa reta juvicha guasurã jaeño mai pegua. Jare jae iporoyocuia ndarau opa —jei ángel chupe.

³⁴Jayave María jei ángel pe: —¿Quirãita pa uyeyapo cua? Echa'ã ndei areco cuimbae —jei.

³⁵Jayave ángel jei María pe: —Espíritu Santo outa ndeve. Tumpa imbaepuere rupi cua uyeyapota ndeve. Jáeramo nemembɨ oata iyoa mbae reve jare jeeta co Tumpa Taɨ —jei—.

³⁶Mase, nerentarã Elisabet ipurúa vi, yepe tẽi ucuacuaa ete ma. Seis yasɨ ma ipurúa oĩ, yepe tẽi ĩru vae reta umbɨjee ‘Imembɨ mbae vae’ —jei—.

³⁷Echa'ã Tumpa ipuere uyapo opaete —jei chupe.

³⁸Jayave María jei ángel pe: —Mase, che co jae yandeYa pe ayeyocui vae. Tome tuyeyapo cheve nde ndere cheve vae rami —jei. Jayave ángel oo ye María oĩ vae güi. María opou Elisabet pe

³⁹Jayave mbovɨ ara rupi María oẽ oo voi jenta güi penti tenta guasu ɨvɨtu reta re Judea pegua pe.

⁴⁰Jare oo uvãe Zacarías jenta pe, jare umbɨsaluda Elisabet.

⁴¹Jare Elisabet uyandu yave María jei chupe vae, Elisabet imembɨ omɨ rai jɨe pe. Jare Elisabet tɨnee Espíritu Santo pe.

⁴²Jayave Elisabet iñeeãta reve jei: —Tumpa nemɨvendise ete ĩru cuña reta güi. Jare umɨvendiseta nemembɨ —jei—.

⁴³Jare yepe tẽi nde co jae cheYa ichɨrã, ẽrei nde ndeyu ndepou chepɨ. Chepɨacañɨ cua re —jei—.

⁴⁴Mase, nde nembɨpɨ chemɨngueta rupive, chemembɨ omɨ rai cherɨe pe uyerovia ramo —jei Elisabet María pe—.

⁴⁵Nde nderovia yandeYa uyapota co jae jei ndeve uyapota vae. Jáeramo jae nemɨvendise ma —jei.

⁴⁶Jayave María jei:“Ambɨadora yandeYa.

⁴⁷Ayerovia Tumpa re.Jae co chembɨasa vae.

⁴⁸Yepe tẽi che cheparavete, ẽrei jae cheparareco.Mase, añave güive opaete vae jeita Tumpa chemɨvendise co.

⁴⁹Echa'ã Tumpa imbaepuere tuicha co.Jae uyapo icavi vae cheve imbaepuere pe.Jae co iyoa mbae vae jee vae.

⁵⁰Jare Tumpa uiparareco opaete uipɨu Tumpa vae reta.

⁵¹Uicuaaca quirãi imbaepuere tuicha co.Opa umɨai uyembɨcate vae reta.

⁵²Jae uequi imbaepuere mburuvicha reta güi,jare umbutuichaca uñemɨmichi vae reta.

⁵³Umɨngapɨɨ iyembaɨ vae reta tembíu icavi vae pe.Ẽrei umee'ã co mbae icocatu vae reta pe.

⁵⁴Omborɨ Israel pegua uyeyocui chupe vae reta.Echa'ã imandúa quirãi jei uipararecota co.

⁵⁵Echa'ã jucuarãi jei yandetenondegua reta pe - jae reta co Abraham jare iñemoñaa reta.Echa'ã jei chupe reta uipararecota co jaeño mai pegua” —jei María.

⁵⁶Jare María upɨta Elisabet ipɨ mbapɨ yasɨ pegua. Jayave ramo oo ye jenta pe. Juan oa vae regua

⁵⁷Jare ara ou uvãe yave Elisabet imembɨ vaerã, oa imembɨ cuimbae.

⁵⁸Jare jerãcua Elisabet jentaɨgua reta jare jentarã reta pe quirãi yandeYa uiparareco Elisabet. Jare jae reta uyerovia Elisabet ndive.

⁵⁹Jare sambiaɨ ocho ara ma güɨnoi yave, jentarã reta yugüeru umɨcircuncidaca vaerã. Jare jae reta uipota oñono jese tu jee Zacarías.

⁶⁰Ẽrei sambiaɨ ichɨ jei chupe reta: —Jucuarãi'ã co. Yambɨjeeta co Juan.

⁶¹Ẽrei jae reta jei chupe: —Mbaetɨ etei co nerentarã jocua tee güɨnoi vae.

⁶²Jayave jae reta iñãca omomɨ Zacarías pe upɨrandu vaerã chupe mbae nunga tee ra uipota oñono taɨ re.

⁶³Jayave Zacarías uechaca chupe reta jae uipota mbae uicuatía jese vae. Jayave uicuatía cuarãi: “Jee co Juan.” Jare opaete joco pe ñugüɨnoi vae reta ipɨacañɨ.

⁶⁴Jayave jupivoi Zacarías ipuere omoẽ ye iñee. Jare imiari chupe reta umbɨadora reve Tumpa.

⁶⁵Jare opaete Zacarías jentaɨgua reta ipɨacañɨ cua re. Jare opaete cua uyeyapo vae jerãcua opaete ɨvɨtu Judea pegua reta rupi.

⁶⁶Jare opaete uyandu vae reta ipɨa pe uyemɨngueta cua uyeyapo vae re jare jei reta iyupe: —¿Mbae nunga sambiaɨ ra co aipo cua? Echa'ã yandeYa imbaepuere oĩ jae ndive. Zacarías umɨmbeu Tumpa iñee

⁶⁷Jayave Zacarías - jae co Juan tu - tɨnee Espíritu Santo pe jare umɨmbeu Tumpa iñee. Echa'ã jae jei:

⁶⁸“Tuyembɨadoraca yandeYa Tumpa.Yande co jae Israel pegua reta.Echa'ã Tumpa ipɨacavi yandeve ramo, yanderepɨ ma.

⁶⁹Jae ombou yandeve jembiocui David iñemoñaa reta pegua yanembɨasa vaerã imbaepuere tuicha vae pe.

⁷⁰Jucuarãi Tumpa jei iyɨpɨ güive Tumpa iñee umɨmbeu vae reta rupi.Jae reta uñeñono tee Tumpa peguarã.

⁷¹Tumpa yanembɨasata yanderovaicho reta güi.Jae yanembɨasata opaete ñanemɨtarẽɨ vae reta güi.

⁷²Tumpa uiparareco Abraham jare ĩru yandetenondegua reta.Echa'ã Tumpa etei uyemɨngueta Abraham ndive,jare añave imandúa ma jocua jei uyapota vae re.

⁷³

⁷⁴Jáeramo umeeta yandeve yayeyocui vaerã chupe yaquɨye mbae reve.Echa'ã jae yanderepɨta yanderovaicho reta güi” —jei Zacarías—.

⁷⁵“Tumpa ñaneñono teeta iyupeguarã jare yayapota jupi vae,jare jae icota yande ndive cua ɨvɨ pe yaico rambueve.

⁷⁶Jare ĩru vae reta uyemɨngueta nderé yave, jeita:‘Jae co penti Tumpa iñee umɨmbeu vae.’Echa'ã nde, cheraɨ, ndeota yandeYa jenonde ndiyapɨcatu vaerã japerã.

⁷⁷Nemɨmbeuta yandeYa imbae reta pe quirãi Tumpa umbɨasata chupe reta imbaeyoa reta jare jucuarãi uyembɨasacata.

⁷⁸Cuarãi Tumpa uyapota, yandeparareco ramo.Jare ipuruparareco jeco pegua ombouta yanembɨasa vaerã, opa ara rupi ombou guarasɨ yanemborɨ vaerã rami.

⁷⁹Jae yanemborɨta guarasɨ jembipe yanemborɨ rami.Echa'ã guarasɨ umee yandeve tembipe agüɨye vaerã yaico pɨ̃tumimbi pe.Jae yanemborɨta agüɨye vaerã yaquɨye mano güi.Jae yanemborɨta yaico vaerã yandepɨacatu reve” —jei Zacarías.

⁸⁰Jare sambiaɨ ucuacuaa, jare uñemɨatangãtu Tumpa cotɨ. Jare ico ñana rupi uyecuaa Israel pegua reta pe regua.