Read Simba San Lucas 13 Bible Online

San Lucas 13 - Simba bible

San Lucas 13

¹Jare amocue joco pe ñugüɨnoi vae reta umɨmbeu Jesús pe quirãi Pilato uyucaca amocue Galilea pegua reta, jae reta maemɨmba uyeyucacue reta umee Tumpa pe ñugüɨnoi rambueve.

²Jayave Jesús jei chupe reta: —Aramoi pe reta pepɨa pe piyemɨngueta jucuarãi uyeyapo jocua Galilea pegua reta pe, jae reta iyoa ete opaete ĩru Galilea pegua reta güi ramo.

³Che jae peve, jucuarãi'ã co. Jare peeya'ã yave piyemɨngueta icavi mbae vae pepɨa pe oĩ vae, pe reta pecañɨteita vi —jei—.

⁴Jare jocua torre Siloé pe oĩse vae usururu jocua dieciocho vae re jare uyuca reta. Aramoi pe reta pepɨa pe piyemɨngueta jocua dieciocho vae iyoa ete opaete ĩru Jerusalén pegua reta güi —jei—.

⁵Che jae peve, jucuarãi'ã co. Jare peeya'ã yave piyemɨngueta icavi mbae vae pepɨa pe oĩ vae, pe reta pecañɨteita vi —jei. Ɨva ía mbae vae

⁶Jayave Jesús jei chupe reta umɨjaanga reve: —Penti cuimbae güɨnoi ico pe penti ɨva. Oo tẽi ueca ɨva ía. Uvãe'ã chupe —jei—.

⁷Jayave jei ico pe uparavɨquɨ chupe vae pe: ‘Mase, mbapɨ año ma ayu tẽi aeca cua ɨva ía jare avãe'ã chupe. Iyasɨa. Ñañotɨta tẽi ĩru temitɨ jendacue pe’ —jei, jei—.

⁸Jayave co pe uparavɨquɨ vae jei co iya pe: ‘Patrón, emaeño tupɨta ye penti año pegua. Tayoo rani iyɨpɨ rupi jare tañono vacarepoti iyɨpɨ rupi’ —jei, jei—.

⁹‘Jayave ía yave, icavita co. Ẽrei ia'ã yave, ndepuereta ndiyasɨaca’ —jei, jei. Jesús umbɨgüera cuña mbutuu ara pe

¹⁰Jare Jesús oporomboe oĩ penti judío reta itupao pe mbutuu ara pe.

¹¹Jare uecha joco pe penti cuña dieciocho año ma imbaerasɨ vae. Jecuaeño ipe ete. Ipuere'ã etei uyemboɨ cavi.

¹²Jare Jesús uecha ma yave, jei chupe: —Eyu checotɨ, cuña. Ndecuera ma co nembaerasɨ güi —jei.

¹³Jayave Jesús oñono ipo cuña iñãca re. Jare jupivoi cuña ipuere uyemboɨ cavi jare umbɨpɨ umbɨadora Tumpa.

¹⁴Jayave tupao re uyandareco vae pochɨ cua re. Echa'ã Jesús umbɨgüera cuña mbutuu ara pe. Jáeramo tupao re uyandareco vae jei joco pe ñugüɨnoi vae reta pe: —Icavi co yaparavɨquɨ vaerã seis ara. Peyu jocua seis ara pecuera vaerã. Agüɨye peyu pecuera vaerã mbutuu ara pe —jei.

¹⁵Ẽrei yandeYa jei chupe: —Pe reta co jae upurumbɨtavɨ vae reta. Pe reta piyora pegüeye jare pemburica jenda güi mbutuu ara pe peraa vaerã pembɨu —jei—.

¹⁶Mase, cua cuña Abraham iñemoñaa reta pegua co. Ẽrei Satanás dieciocho año ma umɨmbaerasɨ. ¿Icavi'ã pa che ambɨgüera vaerã cua mbaerasɨ güi mbutuu ara pe? —jei.

¹⁷Jare cua Jesús jei ma yave, opaete Jesús jovaicho reta imara. Echa'ã opaete joco pe ñugüɨnoi vae reta uyerovia opaete icavi ete vae Jesús uyapo vae re. Mostaza jãɨcue

¹⁸Jayave Jesús jei: —¿Mbae ra ipuere uyemɨjaanga Tumpa iporoyocuia re? ¿Mbae ra amɨjaangata jese?

¹⁹Yandepuere yamɨjaanga jese penti mostaza jãɨcue —jei—. Uñeñotɨ yave, ucuacuaa jare uyeyapo ɨvɨra tuicha vae. Jare güɨra reta yugüeru uyapo jaitɨrã jese —jei. Levadura

²⁰Jayave jei chupe reta: —¿Mbae ra amɨjaangata Tumpa iporoyocuia re?

²¹Yandepuere yamɨjaanga jese levadura —jei—. Cuña umbɨyea levadura jeta catu harina ndive, levadura uñemɨai vaerã opaete masa rupi —jei. Onque ipɨ-raɨ vae

²²Jare Jesús uguata opaete tenta guasu reta jare tenta guasu-raɨ reta rupi, jare oporomboe joco pe. Jare jecuaeño oo Jerusalén cotɨ.

²³Jayave penti vae upɨrandu Jesús pe: —CheYa, ¿ime pa mbovɨ catu uyembɨasacata vae? Jayave Jesús jei joco pe ñugüɨnoi vae reta pe:

²⁴—Piñemɨmɨrãta pique vaerã onque ipɨ-raɨ vae rupi. Echa'ã che jae peve, jeta vae uipota tẽita uique, ẽrei ndarau ipuere —jei—.

²⁵Echa'ã tenta iya uyequenda ma yave onque, pe reta pepɨtata oca pe. Jayave pemboputa tẽi onque jare pereta tẽi: ‘OreYa, ipea onque oreve.’ Ẽrei jae jeita peve: ‘Che pucuaa'ã’ —jeita, jei—.

²⁶Jayave pereta: ‘Nducaru nderovaque, jare nde ndeporomboe orecalle reta rupi’ —pereta, jei—.

²⁷Ẽrei jae jeita peve: ‘Che jae peve, che pucuaa'ã. Pe reta co jae icavi mbae vae uyapo vae reta. Pesɨrɨ chegüi’ —jeita peve, jei—.

²⁸Jayave piyaota jare perãi pembɨquɨrɨrɨuta. Echa'ã peechata Abraham jare Isaac jare Jacob jare opaete Tumpa iñee aracae umɨmbeu vae reta Tumpa iporoyocuia pe ñugüɨnoi. Ẽrei pe reta oca pe pẽita —jei—.

²⁹Yugüeruta reta opaete que rupi rupi güi, jare uguapɨta reta Tumpa iporoyocuia pe —jei—.

³⁰Ẽrei pemandúa cua re: Amocue añave uñemɨmichi vae uyembɨtenondecata co, jare amocue añave uyembutuicha vae uyembɨtaɨcuecata co —jei. Jesús ipɨatɨtɨ Jerusalén pegua reta re

³¹Jocua ara yugüeru Jesús oĩ vae pe amocue fariseo reta. Jae reta jei Jesús pe: —Ecua cua güi. Echa'ã Herodes uipota ndeyucaca.

³²Jayave Jesús jei chupe reta: —Herodes co jae penti aguara rami. Pecua ipɨ jare pemɨmbeu chupe quirãi jecuae ambɨsɨrɨta aña reta oya jese vae reta güi jare ambɨgüerata imbaerasɨ vae reta añave jare curiye. Jare cõeramo opata co cheparavɨquɨ —jei—.

³³Añete co, icavi co jecuaeño aa Jerusalén cotɨ añave jare curiye jare cõeramo. Echa'ã Jerusalén peño judío reta uyuca Tumpa iñee umɨmbeu vae reta —jei—.

³⁴Jerusalén pegua reta, pe reta piyuca Tumpa iñee aracae umɨmbeu vae reta. Pe reta piyapi ita pe piyuca Tumpa ombou peve vae reta. Jeta vese ma chequɨrẽɨ tẽi pumbatɨ, uru umbatɨ imembɨ reta ipepo igüɨ pe rami, ẽrei pe reta pipota'ã —jei—.

³⁵Mase, Tumpa usɨrɨta ma pegüi. Che jae peve, ndarau ma cherecha pere regua: ‘Tuyembɨadoraca yandeYa jee re ou vae’ —jei.