Read Simba San Juan 13 Bible Online

San Juan 13 - Simba bible

San Juan 13

¹Uyaro ma pascua iara. Jare Jesús uicuaa ara uvãe ma ueya vaerã cua ɨvɨ oo ye vaerã Tu pe. Imeño uau imbae cua ɨvɨ pe ñugüɨnoi vae reta, jare añave uicuaacata quirãi uau ete.

²Judas Iscariote - jae co Simón taɨ - ipɨa pe uyemɨngueta ma umee vaerã Jesús jovaicho reta pe. Echa'ã jucuarãi uipota aña guasu Judas ipɨa pe uyemɨngueta vaerã. Jare Jesús uicuaa cavi ma Tu oñono opaete mbaembae ipo pe. Uicuaa vi ou co Tumpa güi jare oo yeta co Tumpa pe. Jare pɨ̃tu yave Jesús jare jemimboe reta ucaru ñugüɨnoi yave, Jesús upũa mesa güi, omboi iyasoya iarambogua, jare oñoma icúa penti toalla pe.

⁵Jayave oñono ɨ penti ɨa pe jare umbɨpɨ oyoe jemimboe reta ipɨ, jare oyoe ma yave, umɨtini toalla icúa re oĩ vae pɨpe.

⁶Jare oo uvãe yave Simón Pedro oĩ vae pe, Pedro jei chupe: —CheYa, ¿nequɨrẽɨ pa ndiyoe chepɨ?

⁷—Cua ayapo aĩ vae ndicuaa cavi'ã añave —jei Jesús—, ẽrei ndicuaa cavita co taɨcue rupi.

⁸—Ndarau etei ndiyoe chepɨ —jei Pedro. —Jucuarãi yave, nde cheĩru'ã co —jei Jesús chupe.

⁹Jayave Simón Pedro jei: —CheYa, iyoe chepo jare cheãca vi - agüɨye iyoe chepɨño.

¹⁰—Uyau ma vae uyau yeta'ã ma —jei Jesús—. Ipɨño ma oyoeta. Echa'ã opaete jete iquɨa mbae ma. Jare pe reta pequɨa mbae ma. Ẽrei opaete'ã co pe reta —jei.

¹¹Echa'ã Jesús uicuaa quía umeeta jovaicho reta pe. Jáeramo jei: “Ẽrei opaete'ã co pe reta.”

¹²Jayave opa yave ipɨ reta oyoe, uyemonde ye Jesús jare oo uguapɨ jenda pe. Jayave upɨrandu chupe reta: —¿Picuaa cavi pa ayapo ma peve vae?

¹³Pe reta pere cheve: ‘Oporomboe vae’, jare pere vi: ‘OreYa.’ Añete co cua pere vae. Echa'ã aporomboe jare che co jae peYa —jei chupe reta—.

¹⁴Ẽrei yepe tẽi che pomboe jare che co jae peYa, ẽrei ayoe ma pepɨ reta. Jáeramo icavi co pe reta piyoe vaerã pepɨ piyugüi —jei—.

¹⁵Echa'ã che cua ayapo aicuaaca vaerã peve, pe reta vi piyapo vaerã che ayapo peve vae rami —jei—.

¹⁶Añete che jae peve, penti uyeyocui vae imbaepuere tuicha'ã ete ipatrón imbaepuere rami. Jae ramiño vi penti temimondo imbaepuere tuicha'ã ete omondo vae imbaepuere rami —jei—.

¹⁷Cua picuaa cavi. Piyapo yave, Tumpa uyapota icavi vae peve —jei Jesús chupe reta—.

¹⁸Opaete pe reta re'ã ayemɨngueta aĩ. Che aicuaa quía aiparavo vae reta. Ẽrei Tumpa iñee pe uyecuatía oĩ vae uyeyapota co. Echa'ã uyecuatía oĩ cuarãi: ‘Jocua ucaru che ndive vae chemeeta.’ Jucuarãi uyecuatía oĩ —jei—.

¹⁹Cua amɨmbeu peve añave ndei uyeyapo mbove, cua uyeyapo yave perovia vaerã quía co che —jei.

²⁰Añete che jae peve, cheremimondo pe uyapo icavi vae, cheve co uyapo icavi vae. Jare jocua cheve uyapo icavi vae, uyapo vi icavi vae chembou vae pe —jei. Jesús umɨmbeu Judas umeeta

²¹Cua jei ma yave, Jesús tuicha ipɨatɨtɨ jare jei: —Añete che jae peve, penti pepɨte pe oĩ vae chemeeta cherovaicho reta pe.

²²Jayave Jesús jemimboe reta umae iyee reta. Uicuaa'ã quía re ra uyemɨngueta.

²³Penti jemimboe - jae co Jesús uau vae - ucaru oĩ Jesús iyɨpɨ pe.

²⁴Jayave Simón Pedro omomɨ iñãca jocua ĩru temimboe uecha vaerã, jare jae upɨrandu vaerã Jesús pe quía regua ra uyemɨngueta.

²⁵Jayave jocua temimboe Jesús iyɨpɨ pe ucaru oĩ vae upɨrandu Jesús pe: —¿Quía pa co jae, cheYa?

²⁶—Ameeta chupe mbɨyape —jei Jesús—, tembíu pe amãquɨ ma yave. Jocua co jae —jei. Jayave tembíu pe umãquɨ ma yave, uequi umee Judas Iscariote pe - jae co Simón taɨ.

²⁷Jayave Judas jou ma yave, Satanás oya jese. Jayave Jesús jei Judas pe: —Iyapo voi jocua ndiyapota vae.

²⁸Ẽrei mbaetɨ quía mesa pe oĩ vae uicuaa maera Jesús jei jucuarãi Judas pe.

²⁹Amocue vae ipɨa pe uyemɨngueta tẽi Jesús jei chupe vae uipota jei: “Ecua egua yaipota fiesta peguarã vae”, ani: “Ecua emee mbae iparavete vae reta pe.” Echa'ã Judas güɨnoi corepoti jɨru.

³⁰Jayave opa yave jou mbɨyape, Judas oẽ oo. Jare pɨ̃tu ma co. Mboroyocui ipɨau vae

³¹Jayave oẽ ma yave Judas, Jesús jei: —Che ayeyapo cuimbaerã. Añave ɨvɨ pegua reta chembɨadorata. Jare umbɨadorata vi Tumpa chereco pegua —jei—.

³²Ɨvɨ pegua reta umbɨadorata Tumpa chereco pegua. Jáeramo Tumpa etei chembɨadoracata ɨvɨ pegua reta pe. Añave voi chembɨadoracata —jei—.

³³Cherɨvɨ reta, michi peguaño ma apɨtata pe reta ndive. Jayave chereca tẽita, ẽrei pe reta ndarau pepuere peo che aata vae pe. Echa'ã cuarãi amɨmbeu judío reta pe, jare añave amɨmbeu vi peve —jei—.

³⁴Amee peve penti mboroyocui ipɨau vae. Piyerau. Piyerau che puau rami —jei Jesús chupe reta—.

³⁵Piyerau yave, opaete ɨvɨ pegua reta uicuaata pe reta cheremimboe reta co —jei. Jesús umɨmbeu Pedro uicuacuta co

³⁶Simón Pedro jei Jesús pe: —CheYa, ¿quetɨ pa ndeota? —Ndarau añave ndepuere ndeo che aata vae pe —jei Jesús—. Ẽrei taɨcue rupi ndeota co —jei.

³⁷Pedro jei: —CheYa, ¿maera pa chepuere'ã aa nde ndive añave? Che tamano ndepepɨca pe —jei.

³⁸—Nde ndere nemanota chepepɨca pe —jei Jesús—. Añete che jae ndeve, ndei uru cuimbae uñee mbove, mbapɨ vese ma checuacuta —jei—.