Read Simba San Juan 2 Bible Online

San Juan 2 - Simba bible

San Juan 2

¹Mbapɨ ara rupi penti cuimbae umenda cuñatai ndive Caná Galilea pegua pe, jare Jesús ichɨ joco pe oĩ.

²Jare uparea reta vi Jesús jare jemimboe reta pe.

³Vino opa ma yave, Jesús ichɨ jei Jesús pe: —Opa ma vino.

⁴—Cuña, ¿maera pa ndere cheve cua? —jei Jesús—. Ndei uvãe cheparavɨquɨ ayapo vaerã —jei.

⁵Jayave Jesús ichɨ jei joco pe uyeyocui vae reta pe: —Piyapo umɨmbeuta peve vae.

⁶Joco pe ñugüɨnoi seis ɨru guasu ita pegua. Judío reta uiporu jocua nunga ɨru guasu mbaembae oyoe vaerã Tumpa cotɨ jecoño mai uyapo rami. Penti penti ɨru guasu ipuere tɨnee pandepo ɨru ɨ pe.

⁷Jesús jei tembiocui reta pe: —Pemɨtɨnee cavi ɨru guasu reta ɨ pe. Jayave jae reta umɨtɨnee cavi.

⁸Jesús jei chupe reta: —Añave piñoẽ peraa peruvicha pe. Jayave jucuarãi uyapo reta.

⁹Uyeyocui vae reta juvicha jou jocua ɨ vinorã uyeyapo vae. Jae uicuaa'ã quía güi ra ou jocua jou vae, ẽrei jembiocui reta uicuaa catu quía güi co oñoẽ. Jayave mburuvicha ueni cuimbae umenda vae.

¹⁰—Opaete ĩru vae reta umee vino icavi vae mboupa reta pe. Jayave jeta vino jou yave ramo umee chupe reta vino icavi nunga mbae vae —jei chupe—. Ẽrei nde añave ramo nemee vino icavi ete vae —jei.

¹¹Jesús cua uyapo Caná Galilea pegua pe. Cuarãi Jesús umbɨpɨ uicuaaca jemimboe reta pe jae imbaepuere tuicha ete co. Jare cua uyapo vae jeco pegua jemimboe reta güɨrovia jese.

¹²Cua jaɨcue rupi Jesús oo Capernaúm pe. Yugüɨraa vi jae jupíe ichɨ jare tɨvɨ reta jare jemimboe reta. Jare upɨta reta joco pe mbovɨ ara. Jesús Tumpa jo pe uyapo vae

¹³Jare coiño ma ou judío reta pascua iara. Jayave Jesús oo Jerusalén pe.

¹⁴Jare Tumpa jo pe uecha umaemee vae reta. Umee ñugüɨnoi güeye reta jare ovecha reta jare pɨcasu reta. Uecha vi corepoti uipepɨca vae reta uguapɨ ñugüɨnoi joco pe.

¹⁵Jayave Jesús uyapo chicote jare omoẽ umaemee vae reta jare ovecha reta jare güeye reta Tumpa jo güi. Jayave upɨyere corepoti uipepɨca vae reta icorepoti jare umbɨyapara imesa reta.

¹⁶Jare jei pɨcasu umee vae reta pe: —Peraa cua güi cua reta. Agüɨye pemee mbaembae cheRu jo pe —jei.

¹⁷Jayave jemimboe reta imandúa quirãi ime Tumpa iñee pe uyecuatía oĩ cuarãi: “Aipota ete Tumpa jo uyepɨuca vaerã. Cheragüɨ̃ro jese. Jáeramo cua jeco pegua ĩru vae reta uyapota icavi mbae vae cheve.” Jucuarãi uyecuatía oĩ.

¹⁸Jayave judío reta upɨrandu Jesús pe: —¿Mbae nunga mɨacañɨ pa ndeechacata oreve nduicuaa vaerã ime ra nenoi mbaepuere cua mbaravɨquɨ ndiyapo vae ndiyapo vaerã?

¹⁹Jesús jei chupe reta: —Pembusururu yave cua Tumpa jo, che amupũa yeta co mbapɨ ara pe.

²⁰—Uparavɨquɨ reta cuarenta y seis año uyapo vaerã cua Tumpa jo —jei judío reta—. ¿Nemupũa yeta ra nde mbapɨ ara pe? —jei.

²¹Ẽrei Jesús uyemɨngueta chupe reta jete re. Echa'ã jete co jae Tumpa jo.

²²Jáeramo Jesús icove ye yave ou umanocue vae reta ipɨte güi, jemimboe reta imandúa cua jei vae re. Jayave güɨrovia aracae Tumpa iñee pe uyecuatía oĩ vae jare jocua Jesús jei chupe reta vae. Jesús uicuaa opaete vae

²³Jesús upɨta Jerusalén pe pascua iara pe. Joco pe oĩ rambueve, jeta vae güɨrovia jese uecha yave jocua mɨacañɨ reta uyapo vae.

²⁴Ẽrei Jesús güɨrovia'ã añetete cua reta ipurugüɨrovia. Echa'ã uicuaa cavi opaete ɨvɨ pegua reta.

²⁵Jae ueca'ã quía umɨmbeu vaerã chupe ɨvɨ pegua reta regua. Echa'ã jae uicuaa cavi ɨvɨ pegua reta ipɨa pe oĩ vae.