Read Simba San Juan 4 Bible Online

San Juan 4 - Simba bible

San Juan 4

¹YandeYa Jesús uyandu jerãcua ma co fariseo reta pe cuarãi: “Jesús uyapo oĩ jare umbɨbautiza oĩ jeta jemimboe retarã Juan güi.” Jucuarãi jerãcua.

²Ẽrei Jesús etei upurumbɨbautiza'ã. Jemimboe retaño upurumbɨbautiza ñugüɨnoi.

³Jayave cua uicuaa yave, Jesús oẽ Judea güi oo ye Galilea pe.

⁴Jare oo Samaria rupi. Echa'ã tape uasa jocoropi.

⁵Jayave oo uvãe tenta guasu Sicar jee vae pe. Jocua tenta guasu Samaria pegua co, jare coiño oĩ ɨvɨ Jacob aracae umee taɨ José pe vae güi.

⁶Jocua ɨvɨ pe oĩ penti ɨcua. Jocua ɨcua jee Jacob iɨcua. Jayave Jesús uguapɨ ɨcua iyɨpɨ pe. Echa'ã mbɨrɨ ma uguata, jare icandɨ. Jare doce pota rupi ma.

⁷Jayave ou uvãe penti cuña Samaria pegua ɨ güɨnoẽ vaerã. Jare Jesús jei chupe: —Emee tau ɨ.

⁸Echa'ã Jesús jemimboe reta yugüɨraa tenta guasu pe jembiurã ogua vaerã.

⁹Jayave cuña Samaria pegua jei Jesús pe: —Nde co jae penti judío jare che co jae penti Samaria pegua. ¿Maera pa nde ndere cheve: ‘Emee tau ɨ?’ —jei. (Echa'ã judío reta uyemɨngueta'ã Samaria pegua reta ndive.)

¹⁰Jayave Jesús jei cuña pe: —Che jae ma ndeve: ‘Emee tau ɨ.’ Ndicuaa yave Tumpa uipota umee ndeve vae jare ndicuaa yave quía co che, ndiyerureta tẽi co cheve jare che ameeta tẽi co ndeve ɨ tecove güɨnoi vae —jei Jesús.

¹¹—Carai —jei cuña Jesús pe—, nde mbaetɨ mbae nenoi ɨ nenoẽ pɨpe vaerã, jare cua ɨ quɨpe oĩ. ¿Quía güi pa nderuta jocua ɨ tecove güɨnoi vae? —jei—.

¹²¿Tuicha ete pa nembaepuere yandetenondegua Jacob imbaepuere güi? Echa'ã Jacob umee yandeve cua ɨ. Jae etei jare taɨ reta jare jɨmba reta jou cua güi —jei cuña.

¹³Jesús jei chupe: —Ipotave cua ɨ jou vae iúe yeta co.

¹⁴Ẽrei ipotave ɨ che ameeta jou vae ndarau ye iúe —jei—. Echa'ã jocua ɨ che ameeta chupe vae uyeyapota ipɨa pe penti ɨcua ɨ oẽ vae rami. Jecuaeño umeeta chupe tecove opa mbae vae —jei.

¹⁵—Carai —jei cuña—, emee cheve cua ɨ, agüɨye ye vaerã cheúe jare agüɨye ye vaerã ayu cua pe ɨ anoẽ vaerã —jei.

¹⁶Jayave Jesús jei chupe: —Ecua eeni neme peyu cua pe.

¹⁷—Mbaetɨ cheme —jei cuña. —Añete co ndere: ‘Mbaetɨ cheme’ —jei Jesús cuña pe—.

¹⁸Echa'ã nenoi ma pandepo neme, jare jocua cuimbae añave nenoi vae jae'ã co neme. Añete co ndere —jei.

¹⁹—Carai —jei cuña—, añave aicuaa nde co jae penti Tumpa iñee umɨmbeu vae —jei—.

²⁰Yandetenondegua reta umbɨadora Tumpa cua ɨvɨtu guasu re. Ẽrei pe reta pere Jerusalén pe oĩ Tumpa jo, jare joco peño ĩru vae reta vi umbɨadorata tẽi Tumpa —jei cuña.

²¹—Chererovia, cuña —jei Jesús—. Outa ma ara agüɨye vaerã pembɨadora cheRu cua ɨvɨtu guasu reño ani Jerusalén peño —jei—.

²²Pe reta pemaembɨadora yave, picuaa cavi'ã mbae pembɨadora vae. Ore numaembɨadora yave, nduicuaa cavi co mbae numbɨadora vae. Echa'ã ĩru vae reta uyembɨasacata judío reta rupi —jei—.

²³Ẽrei outa ma ara - ou ma co - añetete Tumpa umbɨadora vae umbɨadora vaerã Espíritu Santo rupi. Umbɨadorata añete vae rupi —jei—. Echa'ã cheRu ueca cua nunga jae reta umbɨadora vaerã —jei—.

²⁴Tumpa co jae Espíritu. Umbɨadora vae reta tumbɨadora Espíritu Santo rupi jare añete vae rupi —jei Jesús.

²⁵Jayave cuña jei Jesús pe: —Aicuaa Tumpa ombou vae outa co - jae co Cristo jee vae - jare jae ou yave, umɨmbeuta yandeve opaete mbaembae regua —jei.

²⁶—Jae co che ayemɨngueta aĩ nde ndive vae —jei Jesús.

²⁷Cua jei oĩ yave, Jesús jemimboe reta yugüeru uvãe. Ipɨacañɨ Jesús uyemɨngueta oĩ cuña ndive vae re. Ẽrei penti ave jei'ã chupe: “¿Mbae pa ndipota?” ani “¿Maera pa ndiyemɨngueta jae ndive?”

²⁸Jayave cuña ueya iɨru joco pe jare oo uvãe tenta guasu pe. Jei cuimbae tenta guasu pegua reta pe:

²⁹—Pecua peecha cuimbae opaete ayapocue umɨmbeu cheve vae. ¿Jae'ã ra co Cristo, Tumpa ombou vae? —jei.

³⁰Jayave cuimbae reta oẽ tenta guasu güi yugüeru Jesús cotɨ.

³¹Cuña oo ma yave, Jesús jemimboe reta jei chupe: —Oporomboe vae, ecaru.

³²—Ime anoi cherembiurã pe reta picuaa mbae vae —jei Jesús chupe reta.

³³Jayave jemimboe reta jei uyupe: —¿Güeru ma ra quía mbae jou vaerã?

³⁴—Che ayapo chembou vae uipota ayapo vaerã vae, jare opaete iparavɨquɨ ayapo —jei Jesús—. Cua co jae cherembiurã rami —jei—.

³⁵Pe reta pere: ‘Irundɨ yasɨ rupi oĩta ma co mbaevɨro.’ Ẽrei che jae peve: Mase, pemae co reta re. Joco pe oĩ vae yagüɨye ma co. Uvãe ma mbaevɨro —jei Jesús—.

³⁶Jare tecove opa mbae vae uñemee chupe vae uyeavɨro vae rami co. Jare temitɨ iya umbɨepɨ umbaevɨro vae pe, umaetɨ vae jare umbaevɨro vae uyerovia pãve vaerã —jei—.

³⁷Jucuarãi añete co cua: ‘Penti vae umaetɨ jare ĩru vae umbaevɨro’ —jei—.

³⁸Che pomondo peavɨro vaerã peparavɨquɨ'ã jese vae. Ĩru vae reta uparavɨquɨ jese, jare pe reta peavɨro jae reta iparavɨquɨ vae —jei Jesús chupe reta.

³⁹Jare jeta jocua tenta guasu pegua reta - Samaria pegua reta co - güɨrovia Jesús re cuña umɨmbeu chupe reta vae jeco pegua. Echa'ã cuña jei ma chupe reta: “Opaete ayapocue umɨmbeu cheve.”

⁴⁰Jayave Samaria pegua reta yugüeru uvãe yave Jesús oĩ vae pe, jei chupe: —Ecua orerenta pe epɨta ore ndive. Jayave Jesús oo upɨta joco pe mocui ara.

⁴¹Jare jeta ĩru vae reta upurugüɨrovia Jesús etei jei chupe reta vae jeco pegua.

⁴²Jayave jei reta cuña pe: —Tenonde yave ndupurugüɨrovia nde ndere oreve vae jeco pegua. Ẽrei añave ndupurugüɨrovia ore etei nduyandu ramo, jare añave nduicuaa cua co jae ɨvɨ pegua reta umbɨasa vae Cristo jee vae —jei reta. Jesús umbɨgüera mburuvicha taɨ

⁴³Mocui ara rupi Jesús oo joco güi Galilea cotɨ.

⁴⁴Echa'ã Jesús etei jei penti Tumpa iñee umɨmbeu vae jentaɨgua reta uipɨu'ã.

⁴⁵Jayave Jesús oo uvãe yave Galilea pe, joco pegua reta umbɨresive cavi. Echa'ã uecha reta ma opaete Jesús uyapo Jerusalén pe pascua pe vae. Echa'ã jae reta yugüɨraa vi joco pe.

⁴⁶Jayave Jesús oo uvãe Caná Galilea pegua pe. Joco pe tenonde yave uyapo ɨ vinorã. Jare ico Capernaum pe penti mburuvicha. Cua cuimbae taɨ imbaerasɨ oĩ.

⁴⁷Jare uicuaa yave Jesús ou ma co Judea güi uvãe Galilea pe, ou uvãe Jesús oĩ vae pe jare uyerure chupe taɨ re. —Ecua cherenta pe embɨgüera cheraɨ —jei—. Echa'ã umanota ma oĩ.

⁴⁸—Aechaca'ã peve yave mɨacañɨ reta, ndarau perovia cheré —jei Jesús chupe.

⁴⁹—Carai —jei mburuvicha—, ecua cherenta pe agüɨye vaerã cheraɨ umano.

⁵⁰—Ecua yeño —jei Jesús chupe—. Nderaɨ icove catu ye ma oĩ —jei. Jayave mburuvicha güɨrovia Jesús jei chupe vae jare oo ye jenta cotɨ.

⁵¹Jare oo rambueve jenta cotɨ, jembiocui reta yugüeru oovãiti jare jei chupe: —Icove catu ye ma oĩ nderaɨ.

⁵²Jayave mburuvicha upɨrandu chupe reta: —¿Mbae ora pe pa umbɨpɨ ucuera? —Caarumo una rupi jacu upɨta chugüi —jei reta chupe.

⁵³Jare cunumi tu uicuaa jocua ora pe etei co Jesús jei chupe: “Nderaɨ icove catu ye ma oĩ.” Jayave upurugüɨrovia jae jare opaete jenta pegua reta.

⁵⁴Cua mɨacañɨ uyapo Jesús uicuaaca vaerã quía co jae, ou yave Judea güi Galilea pe. Mocui ma co cua mɨacañɨ.