Read Simba San Juan 6 Bible Online

San Juan 6 - Simba bible

San Juan 6

¹Cua jaɨcue rupi Jesús oo uvãe ɨ guasu Galilea jovaicho pe. Jocua ɨ guasu jee vi Tiberias.

²Jare tenonde yave Jesús umbɨgüera amocue imbaerasɨ vae reta, jare jeta vae uecha ma mɨacañɨ Jesús uyapo vae reta. Jáeramo añave cua reta yugüɨraa Jesús jaɨcue.

³Jayave Jesús oo uyupi ɨvɨtu guasu re jare uguapɨ joco pe jemimboe reta ndive.

⁴Jare coiño ma ou judío reta ifiesta pascua jee vae.

⁵Jare Jesús umae yave, uecha jeta vae yugüeru icotɨ. Jayave upɨrandu Felipe pe: —¿Quiape pa yandepuereta yagua mbɨyape cua reta jou vaerã —jei.

⁶Jare cua Jesús jei uicuaa vaerã mbae ra jeita Felipe. Echa'ã Jesús uicuaa ma mbae uyapota vae.

⁷Felipe jei chupe: —Doscientos ara mbaravɨquɨ jepɨ pegua mbɨyape ndarau uepitɨ cua reta jou vaerã, penti penti mbovɨño jou yave.

⁸Penti Jesús jemimboe Andrés jee vae - jae co Simón Pedro tɨvɨ - jei Jesús pe:

⁹—Ime cua pe oĩ penti cunumi pandepo mbɨyape jare mocui pira güɨnoi vae. Ẽrei jocua mbovɨ co cua jeta vae reta jou vaerã —jei.

¹⁰—Pemɨmbeu chupe reta uguapɨ vaerã —jei Jesús. Jare jeta capiichape oĩ joco pe. Jayave uguapɨ reta. Jare cuimbae reta cinco mil rupi ñugüɨnoi.

¹¹Jayave Jesús uipɨsɨ jocua mbɨyape jare umee yasurupai Tumpa pe. Jayave umee mbɨyape jemimboe reta pe, jare jemimboe reta umee uguapɨ vae reta pe. Jae ramiño vi umee pira chupe reta. Jare opaete vae jou jare iyangapɨɨ.

¹²Jayave iyangapɨɨ reta ma yave, Jesús jei jemimboe reta pe: —Pembatɨ tembíu uñepɨsãacue jembɨre vae, agüɨye vaerã mbae uyemombo —jei.

¹³Echa'ã jocua pandepo mbɨyape güi jembɨre mbɨyape uñepɨsãacue jare uyeeya joco pe, opa ma ucaru reta yave. Jayave Jesús jemimboe reta umbatɨ jare umɨtɨnee doce canasta.

¹⁴Jare joco pe ñugüɨnoi vae reta uecha ma yave cua mɨacañɨ Jesús uyapo vae, jei reta: —Cua cuimbae jocua Tumpa iñee umɨmbeu vae etei co. Echa'ã Tumpa iñee pe uyecuatía oĩ outa co ɨvɨ pe —jei reta.

¹⁵Jare Jesús uicuaa yugüeruta uipɨsɨ uyapo vaerã juvicha guasurã, yepe tẽi jae uipota'ã. Jayave oo chugüi reta ɨvɨtu guasu re. Jaeño oo. Jesús uguata ɨ iárambo

¹⁶Jare pɨ̃tu ave ma yave, Jesús jemimboe reta ugüeyɨ yugüɨraa ɨ guasu pe.

¹⁷Joco pe uyupi chalana pe jare umbɨpɨ uasa ɨ guasu rupi Capernaum cotɨ. Pɨ̃tumimbi ma oĩ, jare Jesús ndei ou ye jae reta ñugüɨnoi vae pe.

¹⁸Jayave tanta uyepeyu ɨvɨtu jare ɨ uyembɨaparoaroa.

¹⁹Uruguata reta ma yave chalana penti legua rupi ndipo, uecha Jesús uguata ou ɨ iárambo jare ou coiño ma chalana güi. Jayave uquɨye reta.

²⁰Ẽrei Jesús jei chupe reta: —Che co. Agüɨye pequɨye —jei.

²¹Jayave uyerovia reve jae reta umbuyupi Jesús chalana pe, jare jupivoiño chalana oo uvãe ɨvɨ pe uipota yugüɨraa uvãe vae pe. Ueca reta Jesús

²²Pɨareve pe jeta vae reta jecuaeño upɨta ɨ guasu jovaicho pe. Uecha pentiño chalana joco pe oĩ ndei Jesús jemimboe reta yugüɨraa pɨpe mbove. Jare uicuaa Jesús oo'ã chalana pe jemimboe reta ndive.

²³Ẽrei ĩru chalana reta tenta guasu Tiberias güi yugüeru vae upɨta coiño tenonde yave ucaru reta vae güi. Echa'ã joco pe jae reta jou mbɨyape yandeYa umee yave yasurupai Tumpa pe.

²⁴Uicuaa reta ma Jesús jare jemimboe reta mbaetɨ joco pe ñugüɨnoi. Jayave uyupi reta jocua chalana reta pe jare yugüɨraa Capernaum cotɨ, Jesús ueca vaerã. Mbɨyape tecove umeeta vae

²⁵Ɨ guasu uasa reta ma yave, uvãe Jesús jare jei reta chupe: —Oporomboe vae, ¿quirãi yave pa ndeyu cua pe?

²⁶Jayave Jesús jei chupe reta: —Añete che jae peve, pe reta chereca jocua mbɨyape pemɨangapɨɨ ramoño, chereca'ã jocua mɨacañɨ pe aipota aicuaaca peve ramo —jei—.

²⁷Agüɨye peparavɨquɨ perembiurã ɨmata'ã ico peve vae reño. Ẽrei peparavɨquɨ perembiurã ameeta peve vae re. Che ayeyapo cuimbaerã vae ameeta peve perembiurã opata'ã vae. Echa'ã penoita tecove opa mbae vae. Echa'ã cheRu Tumpa uicuaaca ma peve chepuere ayapo jucuarãi —jei Jesús chupe reta.

²⁸Jayave upɨrandu reta Jesús pe: —¿Mbae pa nduyapota? ¿Quirãi pa orepuere nduyapo mbaravɨquɨ Tumpa uipota nduyapo vaerã vae? —jei reta.

²⁹Jayave Jesús jei: —Perovia cheré. Cua co mbaravɨquɨ Tumpa uipota piyapo vaerã vae. Echa'ã jae chembou —jei.

³⁰Jayave jei reta chupe: —¿Mbae nunga mɨacañɨ pa ndiyapota, nduecha vaerã jare ndugüɨrovia vaerã nderé? ¿Mbae nunga mbaravɨquɨ pa ndiyapota nde? —jei reta—.

³¹Yandetenondegua reta jou maná ñana pe. Echa'ã Tumpa iñee pe uyecuatía oĩ: ‘Umee chupe reta jembiurã ara güi jou reta vaerã’ —jei reta chupe.

³²—Añete che jae peve —jei Jesús—, Moisés umee'ã co jembiurã ara güi ou vae. Añave cheRu umeeta peve perembiurã añetete vae ara güi ou vae —jei—.

³³Echa'ã tembíu Tumpa añave umeeta vae jocua co jae ara güi ou vae. Jae umeeta tecove ɨvɨ pegua reta pe —jei.

³⁴—Carai —jei reta—, jecuaeño emee oreve cua nunga orerembiurã.

³⁵—Che co jae jocua tembíu tecove umeeta vae —jei Jesús—. Ipotave cheré güɨrovia vae ndarau iyembaɨ, jare ipotave cheré güɨrovia vae ndarau iúe —jei—.

³⁶Ẽrei che jae ma peve cuarãi: Perovia'ã, yepe tẽi cherecha ma.

³⁷Opaete cheRu umee cheve vae reta güɨroviata co cheré —jei—, jare ipotave cheré güɨrovia vae ndarau amombo.

³⁸Echa'ã agüeyɨ ayu ara güi ayapo vaerã chembou vae jei vae. Ayu'ã che jae vaeño ayapo vaerã —jei Jesús—.

³⁹Ndarau amɨcañɨ penti ave opaete cheRu umee ma cheve vae reta güi. Echa'ã ambɨjecove yeta aru umanocue vae reta ipɨte güi ara taɨcuegua vae pe. Cua uipota chembou vae —jei—.

⁴⁰Ipotave cherecha vae güɨnoita tecove opa mbae vae cheré güɨrovia yave, jare che ambɨjecove yeta aru umanocue vae reta ipɨte güi ara taɨcuegua vae pe. Cua uipota cheRu —jei Jesús.

⁴¹Jayave judío reta iñeenguru Jesús re. Echa'ã Jesús jei ma: “Che co jae tembíu ara güi ou vae.”

⁴²Jare judío reta jei: —Cua co jae Jesús. Jae co José taɨ. Yaicuaa catu co tu jare ichɨ. ¿Quirãi pa ipuere jei: ‘Agüeyɨ ayu ara güi’? —jei reta.

⁴³Jayave Jesús jei chupe reta: —Agüɨye piñeenguru checotɨ.

⁴⁴CheRu chembou —jei—. CheRu güɨroviaca cheré vaeño ipuere güɨrovia cheré. Jare che ambɨjecove yeta aru umanocue vae reta ipɨte güi ara taɨcuegua vae pe —jei chupe reta—.

⁴⁵Tumpa iñee aracae umɨmbeu vae uicuatía cuarãi: ‘Jare Tumpa omboeta opaete vae.’ Jucuarãi uicuatía —jei—. Ipotave uyapɨsaca Tumpa re jare uyemboe Tumpa jei chupe vae re vae outa checotɨ —jei—.

⁴⁶Mbaetɨ quía uecha cheRu, jaeño che ayu Tumpa güi vae. Che aecha ma co cheRu —jei Jesús—.

⁴⁷Añete che jae peve, cheré güɨrovia vae güɨnoi tecove opa mbae vae.

⁴⁸Che co jae jocua tembíu tecove umee vae —jei—.

⁴⁹Petenondegua reta jou jocua maná ñana pe jare umano reta.

⁵⁰Che co jae tembíu ara güi ou vae. Cua tembíu jou vae ndarau umano —jei—.

⁵¹Che co jae tembíu tecove umee vae. Che agüeyɨ ayu ara güi. Ipotave cua tembíu jou vae güɨnoita tecove opa mbae vae —jei Jesús chupe reta—. Jare jocua tembíu ameeta vae cherete co. Ameeta cherete ɨvɨ pegua reta güɨnoi vaerã tecove —jei.

⁵²Jayave judío reta uyeaca uyupii. —¿Quirãita ra ipuere cua cuimbae umee yandeve jete yau vaerã? —jei reta.

⁵³—Añete che jae peve —jei Jesús chupe reta—, peu'ã yave cherete jare cherugüɨ, ndarau tecove opa mbae vae penoi. Che co jae cuimbaerã uyeyapo vae —jei—.

⁵⁴Cherete jare cherugüɨ jou vae güɨnoi tecove opa mbae vae, jare ambɨjecove yeta aru umanocue vae reta ipɨte güi ara taɨcuegua vae pe —jei—.

⁵⁵Echa'ã cherete jare cherugüɨ tembíu añetete vae co —jei Jesús—.

⁵⁶Cherete jare cherugüɨ jou vae ico che ndive jare che aico jae ndive —jei—.

⁵⁷CheRu güɨnoi tecove opa mbae vae jare jae chembou, jare che anoi tecove opa mbae vae cheRu güi. Jae ramiño vi jocua cherete jou vae güɨnoita tecove opa mbae vae chegüi —jei chupe reta—.

⁵⁸Che co jae tembíu ara güi ou vae. Cua tembíu jae'ã co jocua tembíu petenondegua reta jou vae rami. Echa'ã jae reta umano. Ẽrei ipotave cua tembíu jou vae güɨnoita tecove opa mbae vae —jei.

⁵⁹Jucuarãi jei Jesús judío reta itupao pe, Capernaum pe oporomboe oĩ yave. Ñee reta tecove opa mbae vae pegua

⁶⁰Cua uyandu reta yave, jeta Jesús jemimboe reta jei uyupe: —Icavi'ã co cua jei vae. Agüɨye yayapɨsaca cua nunga ñee re —jei reta.

⁶¹Jesús uicuaa jemimboe reta iñeenguru co icotɨ. Jayave jei chupe reta: —¿Maera pa piñeenguru checotɨ cua re?

⁶²¿Mbae pa piyapota cherecha yave ayupi aa tenonde aico vae pe? Che co jae cuimbaerã uyeyapo vae —jei—.

⁶³Jaeño Espíritu Santo ipuere umee tecove opa mbae vae. Yanderete ipuere'ã umee yandeve cua nunga tecove. Cua amɨmbeu ma peve vae ɨvɨ pegua'ã co. Jae co tecove opa mbae vae pegua —jei Jesús—.

⁶⁴Ẽrei amocue pe reta perovia'ã cheré —jei. Echa'ã Jesús uicuaa iyɨpɨ güive quía reta güɨrovia'ã jese jare quía umeeta jovaicho reta pe.

⁶⁵Jayave jei chupe reta: —Jáeramo amɨmbeu ma peve quirãi cheRu güɨroviaca cheré vaeño ipuere güɨrovia cheré —jei.

⁶⁶Cua jaɨcue rupi jeta jemimboe reta uñatima ye Jesús güi, jare uguata'ã ma jae ndive.

⁶⁷Jayave Jesús upɨrandu jocua doce vae reta pe: —¿Peota pa chegüi pe reta vi?

⁶⁸—¿Quía re pa ndoota, oreYa? —jei Simón Pedro chupe—. Nde co nemɨmbeu oreve tecove opa mbae vae regua.

⁶⁹Jare ndugüɨrovia ma nderé jare nduicuaa ma nde co jae Tumpa oñono tee iyupeguarã vae —jei.

⁷⁰Jayave Jesús jei: —Che puparavo. Pe co jae doce vae reta. Ẽrei ime penti pepɨte pe oĩ vae uyeyocui aña guasu pe —jei.

⁷¹Cuarãi uyemɨngueta Judas re. Judas co jae Simón Iscariote taɨ. Echa'ã Jesús uiparavo doce jare jae reta güi penti co jae Judas. Judas umeeta Jesús jovaicho reta pe.