Read Simba San Juan 7 Bible Online

San Juan 7 - Simba bible

San Juan 7

¹Cua jaɨcue rupi Jesús oo tenta guasu Galilea pegua reta pe. Oo'ã Judea pe. Echa'ã judío reta uipota uyuca.

²Jare outa ma uvãe judío reta ifiesta Tabernáculos jee vae iara reta.

³Jayave Jesús tɨvɨ reta jei chupe: —Ecua cua güi Judea pe, nderemimboe reta uecha vaerã mbaravɨquɨ ndiyapo vae.

⁴Echa'ã ime yave quía uipota ĩru vae reta uicuaa cavi vaerã jesegua vae, uyapo vɨari'ã iparavɨquɨ. Ndiyapo co cua mbaravɨquɨ. Jáeramo iyapo opaete vae jovaque —jei reta chupe.

⁵Echa'ã tɨvɨ reta vi güɨrovia'ã jese.

⁶Jayave Jesús jei chupe reta: —Ndei uvãe jucuarãi ayapo vaerã, ẽrei pe reta pepuere peo pequɨrẽɨ vae rupi —jei—.

⁷Ɨvɨ pegua reta ipuere'ã pemɨtarẽɨ, ẽrei ɨvɨ pegua reta chemɨtarẽɨ. Echa'ã che amɨmbeu chupe reta icavi mbae vae co jae uyapo reta vae —jei Jesús—.

⁸Pe reta pecua fiesta pe. Che ndei rani aa cua fiesta pe. Echa'ã ndei uvãe che aa joco pe vaerã —jei.

⁹Jucuarãi jei chupe reta Jesús, jare upɨta Galilea pe. Fiesta Tabernáculos jee vae

¹⁰Cua jaɨcue rupi tɨvɨ reta yugüɨraa ma yave fiesta pe, Jesús oo vi. Oo'ã jeta vae jupíe agüɨye vaerã uecha reta.

¹¹Jare judío reta ueca ñugüɨnoi Jesús fiesta pe. —¿Quíape pa ime oĩ? —jei reta.

¹²Jare joco pe ñugüɨnoi vae reta uyeaca uyupii Jesús re. Amocue vae jei: —Cuimbae jecocavi vae co jae. Ĩru vae reta jei: —Jecocavi'ã co. Upurumbɨtavɨ vae co.

¹³Ẽrei opaete vae uquɨye judío reta güi. Jáeramo uyemɨngueta vɨariño reta.

¹⁴Fiesta mbɨte ma yave, Jesús oo Tumpa jo pe umbɨpɨ oporomboe.

¹⁵Jare judío reta ipɨacañɨ. —¿Quirãi ra cua cuimbae jeta uicuaa mbaembae re uyemboe mbae reve? —jei reta.

¹⁶Jayave Jesús jei chupe reta: —Cheporomboe chembaeño'ã co. Jae co chembou vae iporomboe —jei—.

¹⁷Ipotave Tumpa jei vae uipota uyapo vae uicuaata cheporomboe Tumpa iporomboe co. Uicuaata chiñeeiño'ã co —jei—.

¹⁸Ipotave vae jae iñee reño oporomboe yave, jae uipota ĩru vae reta pe uyembutuichaca vaerãño. Ẽrei quía ueca umbutuicha vaerã ombou vae, jae oporomboe añete vae re. Iyapu'ã co —jei Jesús—.

¹⁹Moisés umee peve mboroyocui. Ẽrei mbaetɨ penti ave pe reta piyapo mboroyocui pe uyecuatía oĩ vae rupi —jei—. ¿Maera pa pipota cheyuca? —jei chupe reta.

²⁰Jayave judío reta jei: —Aña oya ma nderé. ¿Quía pa uipota ndeyuca? —jei reta.

²¹—Ayapo ma penti mbaravɨquɨ —jei Jesús—, jare opaete pe reta pepɨacañɨ jese.

²²Moisés umɨmbeu peve piñemɨcircuncidaca vaerã. Ẽrei uyembɨpɨ'ã Moisés umɨmbeu yave. Echa'ã Moisés itenondegua reta uyapo jucuarãi. Jare pe reta pepurumɨcircuncidaca mbutuu ara pe —jei—.

²³Che ambɨgüera ma penti cuimbae mbutuu ara pe. Opaete jete ucuera cavi ma. ¿Maera pa pepochɨ cheve cua jeco pegua? Echa'ã pe reta pepurumɨcircuncidaca mbutuu ara pe mboroyocui Moisés umɨmbeu peve vae pipota'ã piyavɨ ramo —jei Jesús—.

²⁴Agüɨye pepuruãa peecha vae rupiño. Pepuruãa cavi jupi vae rupi —jei. ¿Jae pa co Cristo?

²⁵Jáeramo amocue Jerusalén pegua reta jei: —¿Jae'ã ra cua judío reta uipota uyuca vae?

²⁶Mase, co oĩ cua pe, jare uyemɨngueta oĩ opaete vae pe. Ẽrei mbaetɨ quía mbae jei chupe. Aramoi yanderuvicha reta uicuaa ma jae co Cristo, Tumpa ombou vae —jei reta—.

²⁷Ẽrei yaicuaa quetɨ güi ou cua cuimbae. Echa'ã Cristo uyecuaa yave, ndarau quía uicuaa quetɨ güi ou —jei reta.

²⁸Jáeramo Jesús oporomboe oĩ rambueve Tumpa jo pe, iñeeãta reve jei: —Pe reta checuaa co, jare picuaa co quetɨ güi ayu vae. Ẽrei ayu'ã che aipota ayu rupiño. Echa'ã chembou vae imiari añete vae re, jare pe reta picuaa'ã chembou vae —jei—.

²⁹Ẽrei che aicuaa. Echa'ã ayu jae oĩ vae güi. Jae chembou —jei.

³⁰Jáeramo judío reta uipota tẽi uipɨsɨ. Ẽrei uipɨsɨ'ã quía. Echa'ã ndei uvãe uyepɨsɨ vaerã.

³¹Jare jeta joco pe ñugüɨnoi vae güɨrovia jese. Echa'ã jei reta: —Cristo ou yave, ¿uyapota ra jeta ete mɨacañɨ cua cuimbae uyapo vae güi? Fariseo reta ombou jembiocui reta uipɨsɨ vaerã Jesús

³²Jare fariseo reta uyandu jeta vae iñeenguru ñugüɨnoi Jesús re. Jayave sacerdote reta itenondegua reta jare fariseo reta ombou jembiocui reta uipɨsɨ vaerã Jesús.

³³Jayave Jesús jei: —Aĩta pe reta ndive michi peguaño. Jayave aata chembou vae pe.

³⁴Cherecata co, ẽrei ndarau chevãe. Ndarau peo che aĩta vae pe —jei.

³⁵Jayave judío reta jei uyupe: —¿Quetɨ ra oota cua cuimbae agüɨye vaerã ñavãe chupe? Oota ndipo judío reta judío mbae vae reta ipɨte rupi uñemɨai vae pe. Omboeta ndipo judío mbae vae reta.

³⁶¿Mbae ra uipota jei, jei yave cuarãi: ‘Cherecata co, ẽrei ndarau chevãe. Ndarau peo che aĩta vae pe?’ —jei reta. Ɨ tecove umee vae

³⁷Jocua ara fiesta opata ma yave icavi ete opaete ĩru fiesta iara güi. Jayave Jesús uyemboɨ jare iñeeãta reve jei: —Ime yave quía iúe vae, tou checotɨ ɨ tou —jei—.

³⁸Cheré güɨrovia vae güi usɨrɨta jeta ɨ tecove umee vae. Jucuarãi Tumpa iñee pe uyecuatía oĩ —jei.

³⁹Jucuarãi uyemɨngueta Jesús Espíritu Santo re. Uipota jei umeeta Espíritu Santo güɨrovia jese vae reta pe. Echa'ã ndei umee Espíritu Santo. Echa'ã Jesús ndei oo ye ara pe. Yatɨ vae reta uyeaca uyupii

⁴⁰Cua uyandu yave, amocue joco pe ñugüɨnoi vae jei: —Cua cuimbae jocua Tumpa iñee umɨmbeu vae etei co.

⁴¹Ĩru vae reta jei: —Cua cuimbae Cristo, Tumpa ombou vae co. Ẽrei amocue vae jei: —¿Galilea pegua ra Cristo?

⁴²Echa'ã Tumpa iñee pe uyecuatía oĩ Cristo co jae David iñemoñaa reta pegua jare Belén pegua co. Echa'ã David joco pegua vi co —jei reta.

⁴³Jesús jei chupe reta vae jeco pegua, joco pe ñugüɨnoi vae reta uyeaca uyupii.

⁴⁴Jare amocue vae uipota tẽi uipɨsɨ Jesús, ẽrei uipɨsɨ'ã quía. Mbaetɨ etei quía uyemɨngueta jucuarãi

⁴⁵Jayave uyeyocui vae sacerdote reta itenondegua reta jare fariseo reta ombou vae reta yugüɨraa ye jucuarãiño chupe reta. Jayave sacerdote reta itenondegua reta jare fariseo reta jei jembiocui reta pe: —¿Maera pa peru'ã?

⁴⁶Jembiocui reta jei: —Echa'ã mbaetɨ etei quía uyemɨngueta jocua cuimbae uyemɨngueta rami.

⁴⁷Jayave fariseo reta jei: —¿Piyembɨtavɨca ma pa pe reta vi?

⁴⁸¿Güɨrovia ma ra jese mburuvicha reta jare fariseo reta? Güɨrovia'ã penti ave —jei reta—.

⁴⁹Ẽrei cua jeta vae uicuaa'ã mboroyocui pe uyecuatía oĩ vae. Tumpa uiporaracata co chupe reta —jei reta.

⁵⁰Jayave penti jae reta ipɨte pe oĩ vae jei ĩru reta pe - jae co Nicodemo jee vae - tenonde yave jae oo opou Jesús pe pɨ̃tu yave:

⁵¹—Mboroyocui pe uyecuatía oĩ vae rupi yandepuere'ã ñaãa ipotave vae ndei yayapɨsaca jese mbove. Echa'ã yayapɨsaca jese yave, yaicuaa mbae uyapo vae —jei.

⁵²Ĩru reta jei chupe: —¿Nde vi ra Galilea pegua? Ndeeca yave, ndicuaata mbaetɨ co penti ave Tumpa iñee umɨmbeu vae Galilea pegua —jei reta. Cuña menda re uyuvanga vae

⁵³Jayave opaete vae yugüɨraa ye jenta jenta pe.