Read Simba Hebreos 8 Bible Online

Hebreos 8 - Simba bible

Hebreos 8

¹Opaete che jae ma peve vae uipota jei cua: Ime ñanoi cua nunga sacerdote tenondegua. Jae uguapɨ ma oĩ Tumpa iyɨpɨ pe iyacata cotɨ ara pe.

²Tumpa jo ñana pe Israel pegua reta uyapo vae uyemɨjaanga ara re. Echa'ã jocua o japɨpe pe Tumpa oĩ vae pe sacerdote tenondegua uyapose iparavɨquɨ. Jae ramiño vi Jesús añave uyapo iparavɨquɨ ara pe Tumpa oĩ vae pe. Israel pegua reta uyapo jocua o. Ẽrei yandeYa Tumpa uyapo ara.

³Jare sacerdote tenondegua penti penti uyeparavoca umee vaerã Tumpa pe ofrenda reta jare maemɨmba uyeyucacue reta. Jáeramo icavi co cua sacerdote tenondegua vi güɨnoi vaerã mbae umee vaerã chupe.

⁴Ɨvɨ peño ico yave mona, mbaetɨta tẽi ico sacerdoterã. Echa'ã jocua ĩru sacerdote reta umee Tumpa pe ofrenda reta mboroyocui rupi.

⁵Ẽrei mbaravɨquɨ jae reta uyapo vae uyemɨjaangaño mbaravɨquɨ ara pegua re. Echa'ã ndei Moisés uyapoca Tumpa jo mbove, Tumpa umɨmbeu chupe quirãi uyapoca vaerã. Jei chupe cuarãi: “Mase, iyapoca opaete o cua amɨjaanga ndeve cua ɨvɨtu guasu re vae rami.” Jucaruãi jei chupe.

⁶Jare mbaravɨquɨ Tumpa umee Jesús pe vae icavi ete mbaravɨquɨ jocua ĩru sacerdote reta uyapo vae güi. Jae ramiño vi trato Jesús rupi yande ñanoi vae icavi ete trato tenondegua vae güi. Echa'ã jocua Tumpa jei umeeta yandeve vae icavi ete jocua Tumpa jei umeeta trato tenondegua vae rupi vae güi.

⁷Jocua trato tenondegua vae rupi ipuere'ã opa uyembai mbaeyoa reta. Jáeramo icavi co Tumpa uyapo vaerã ĩru trato.

⁸Echa'ã Tumpa uicuaa Israel pegua reta iyoa vae reta co. Jáeramo Tumpa iñee pe uyecuatía oĩ quirãi yandeYa Tumpa jei cuarãi:“Mase, outa ara reta amee vaerã trato ipɨau vae Israel pegua reta jare Judá pegua reta pe.

⁹Jocua trato tenondegua vae amee itenondegua reta pe, aru yave Egipto güi.Ẽrei trato ipɨau vae uyuavɨ trato tenondegua vae güi.Echa'ã jae reta uyapo'ã che jae chupe reta uyapo vaerã vae, trato tenondegua vae amee chupe reta yave.Jáeramo ayandareco cavi'ã jese reta.

¹⁰Echa'ã jocua ara reta rendave pe ameeta trato ipɨau vae Israel pegua reta pe.Jae co cua: Ipɨa pe ambɨyemɨnguetata reta cheporoyocui reta re,jare ayapocata chupe reta cheporoyocui reta.Jae reta chembɨadorata.Echa'ã uicuaata che co jae Tumpa.Jare che amborɨta reta.Echa'ã yugüɨrecota chembae retarã.

¹¹Ndarau etei quía omboe jentaɨgua cheré.Ndarau etei quía omboe jentarã cheré.Ndarau etei quía jei ĩru vae pe: ‘Iyemboe yandeYa re’.Echa'ã opaete vae - sambiaɨ reta jare ucuacuaa vae reta - checuaata co.

¹²Aipararecota reta. Echa'ã ambɨasata chupe reta imbaeyoa reta.Ndarau ye chemandúa imbaeyoa reta re.” Jucuarãi jei Tumpa.

¹³Tumpa jei umeeta co chupe reta trato ipɨau vae. Cua uipota jei jocua trato tenondegua vae indechi ma co. Jare mbae indechi vae opa seri ma co oĩ.