Read Simba Apocalipsis 22 Bible Online

Apocalipsis 22 - Simba bible

Apocalipsis 22

¹Jayave ángel uechaca cheve ɨ usɨrɨ vae iquɨa mbae vae. Jesãca ete. Vidrio echa cheve. Tecove opa mbae vae pegua co jocua ɨ. Oẽ usɨrɨ Tumpa jare Ovecha-raɨ iguapɨa güi.

²Jare tenta guasu icalle mbɨte rupi jare ɨ usɨrɨ vae jembeɨ reta rupi ñugüɨnoi ɨvɨra tecove opa mbae vae pegua reta. Jocua ɨvɨra ía doce uyuavɨ vae reta co jare yagüɨye opa yasɨ rupi. Jare ɨvɨ pegua reta ipuere uiporu ɨvɨra joquɨ reta moarã agüɨye vaerã imbaerasɨ.

³Jare ndarau ma oĩ yepɨpeyu ɨvɨ re. Echa'ã Tumpa jare Ovecha-raɨ iguapɨa oĩta joco pe. Jare Tumpa jembiocui reta uyeyocuita chupe.

⁴Jare jae reta uechata Tumpa. Jare güɨnoita reta isɨva re Tumpa jee.

⁵Jare ndarau pɨ̃tu joco pe. Ndarau uiporu mechero jare guarasɨ jembipe. Echa'ã yandeYa Tumpa umeeta chupe reta tembipe. Jare jae reta oporoyocuita jaeño mai pegua. Cristo ou yeta ɨmambae

⁶Jare ángel jei cheve: —Cua ñee reta añete co. Yandepuere yarovia catu. Aracae yandeYa Tumpa uicuaaca mbaembae iñee umɨmbeu vae reta pe. Echa'ã jae oñono tee reta iyupeguarã iñee umɨmbeu vaerã. Jae ramiño vi yandeYa Tumpa chembou aicuaaca vaerã jembiocui reta pe ɨmambae uyeyapota vae. Che co jae penti ángel Tumpa pe uyeyocui vae —jei—.

⁷‘Mase, aa yeta ɨmambae’ —jei yandeYa, jei—. ‘Piyapo yave ñee cua tupapire pe ñugüɨnoi vae reta, piyeroviata co. Echa'ã cua ñee reta umɨmbeu peve uyeyapota vae’ —jei, jei.

⁸Che etei aecha cua mbaembae jare ayandu vi. Jare aecha jare ayandu yave, ayeatɨca ángel cua mbaembae uicuaaca cheve vae jovai ambɨadora vaerã.

⁹Ẽrei jae jei cheve: —Agüɨye chembɨadora. Che vi ayeyocui Tumpa pe, nde ndiyeyocui chupe rami. Che vi amɨmbeu Tumpa iñee, yanderɨvɨ umɨmbeu rami. Echa'ã jae reta vi uyapo ñee cua libro pe uyecuatía oĩ vae reta. Tumpaño embɨadora —jei.

¹⁰Jare jei vi cheve: —Emɨmbeu ĩru vae reta pe ñee cua libro pe ñugüɨnoi vae reta. Echa'ã cua ñee reta umɨmbeu uyeyapota vae jare coiño ma ou uyeyapo vaerã —jei—.

¹¹Jupi mbae vae uyapo vae jecuaeño tuyapo jupi mbae vae. Jae ramiño vi pɨchɨ̃i vae uyapo vae jecuaeño tuyapo pɨchɨ̃i vae. Jae ramiño vi jupi vae uyapo vae jecuaeño tuyapo jupi vae. Jae ramiño vi uñeñono tee Tumpa peguarã vae jecuaeño tuñeñono tee Tumpa peguarã —jei—.

¹²Mase, aa yeta ɨmambae —jei yandeYa, jei—. Jare ameeta opaete vae pe imbaerã penti penti uyapocue vae rupi —jei, jei—.

¹³Che co jae Alfa jare Omega jee vae. Che co jae tenondegua vae jare taɨcuegua vae —jei, jei—.

¹⁴Piyapo yave yandeYa iporoyocui reta, piyeroviata co. Echa'ã piyapo yave, pepuereta peu ɨvɨra tecove opa mbae vae pegua ía, jare pepuereta pique jocua tenta guasu pe jonque reta rupi —jei—.

¹⁵Echa'ã tenta guasu pe ndarau uique Tumpa iñee ndive oyovaicho vae reta, jare ipaye vae reta, jare iaguasa vae reta, jare upuruyuca vae reta, jare tumpa-raanga reta umbɨadora vae reta, jare opaete iquɨrẽɨ reve iyapu vae reta —jei.

¹⁶Jare yandeYa Jesús jei cheve: —Che etei amondo penti ángel cheve uyeyocui vae umɨmbeu vaerã peve cua mbaembae upurugüɨrovia vae uyembatɨmbatɨ vae reta rupi. Che co jae David Iyɨpɨ jee vae. Che co jae David iñemoñaa reta pegua. Che co jae yasɨtata guasu jembipe vae neimbove asɨ uyecuaa vae —jei.

¹⁷Jare Espíritu Santo jare Ovecha-raɨ ndive umendata vae jei: —Eyu. Jare uyandu vae tei: —Eyu. Iúe vae ipuere ou cua pe. Ipotave vae ipuere jou ɨ tecove opa mbae vae pegua jepɨ mbae reve.

¹⁸Ñee cua tupapire pe ñugüɨnoi vae reta uicuaaca uyeyapota vae. Che amɨmbeu opaete cua ñee reta uyandu vae reta pe cua: Ime yave quía cua ñee reta ndive ĩru ñee reta umɨĩruta vae, Tumpa umeeta chupe uiporara vaerã susere cua tupapire pe uyecuatía ñugüɨnoi vae reta.

¹⁹Jare ime yave quía ñee cua tupapire pe ñugüɨnoi vae reta uipotata umbai vae, Tumpa ndarau umaeño jese jou vaerã jocua ɨvɨra tecove opa mbae vae pegua ía. Ndarau vi umaeño jese uique vaerã tenta guasu uñeñono tee Tumpa peguarã vae pe. Ndarau vi umaeño jese güɨnoi vaerã imbaerã mbaembae icavi vae cua libro pe uyecuatía oĩ vae.

²⁰YandeYa umɨmbeu cheve opaete cua. Jae etei jei: —Añete co, aa yeta ɨmambae. Yande yae: —Amén. Eyu, yandeYa Jesús.

²¹YandeYa Jesús tumee ipɨacavi opaete imbae reta pe. Amén.