Read Simba Apocalipsis 7 Bible Online

Apocalipsis 7 - Simba bible

Apocalipsis 7

¹Jare cua jaɨcue rupi aecha irundɨ ángel reta uyemboɨ ñugüɨnoi ɨvɨ pe. Penti uyemboɨ guarasɨ oẽ vae cotɨ, jare ĩru uyemboɨ guarasɨ uique vae cotɨ. Ĩru uyemboɨ norte cotɨ, jare ĩru uyemboɨ sur cotɨ. Jare jae reta oyopia irundɨ ɨvɨtu ɨvɨ iyɨpɨ rupi uyepeyu vae, agüɨye vaerã uyepeyu ɨvɨ reta iárambo jare ɨ guasu reta iárambo, jare agüɨye vaerã uipeyu ɨvɨra reta.

²Jare aecha ĩru ángel ou guarasɨ oẽ vae cotɨ güi, jare jocua ángel güeru Tumpa imeño mai ico vae imarca. Jayave ángel iñeeãta reve jei jocua irundɨ ángel reta pe: —Agüɨye perucumegua ɨvɨ reta jare ɨ guasu reta jare ɨvɨra reta, ndei ñaneTumpa jembiocui reta isɨva numɨmarca mbove. Echa'ã jocua irundɨ ángel pe uñemee ma mbaepuere urucumegua vaerã ɨvɨ reta jare ɨ guasu reta.

⁴Jare ayandu mbovɨ Tumpa jembiocui reta ángel reta umɨmarca vae. Umɨmarca reta ciento cuarenta y cuatro mil Israel pegua reta opaete atɨ reta güi.

⁵Umɨmarca reta doce mil Judá iñemoñaa reta güi. Umɨmarca reta doce mil Rubén iñemoñaa reta güi. Umɨmarca reta doce mil Gad iñemoñaa reta güi.

⁶Umɨmarca reta doce mil Aser iñemoñaa reta güi. Umɨmarca reta doce mil Neftalí iñemoñaa reta güi. Umɨmarca reta doce mil Manasés iñemoñaa reta güi.

⁷Umɨmarca reta doce mil Simeón iñemoñaa reta güi. Umɨmarca reta doce mil Leví iñemoñaa reta güi. Umɨmarca reta doce mil Isacar iñemoñaa reta güi.

⁸Umɨmarca reta doce mil Zabulón iñemoñaa reta güi. Umɨmarca reta doce mil José iñemoñaa reta güi. Umɨmarca reta doce mil Benjamín iñemoñaa reta güi. Jeta ete vae jemimonde tĩ vae reta

⁹Cua jaɨcue rupi aecha jeta ete vae opaete ɨvɨ ambɨembɨe ipɨte güi yugüeru vae reta. Mbaetɨ quía ipuere uipapa. Jae reta uyemboɨ ñugüɨnoi jocua guapɨa jare Ovecha-raɨ jovai. Jae reta jemimonde tĩ jare ipo pe güɨnoi carandaɨ joquɨ.

¹⁰Jare iñeeãta reve jei reta: —ÑaneTumpa guapɨa pe uguapɨ vae upurumbɨasa vae co. Ovecha-raɨ vi upurumbɨasa vae co —jei reta.

¹¹Jare opaete ángel reta uyemboɨ ñugüɨnoi jocua guapɨa jare jocua tenondegua reta jare jocua irundɨ mbaembae icove vae reta iyɨpɨ rupi. Jayave jae reta uyeatɨca guapɨa jovai jare umbɨadora Tumpa.

¹²Jae reta jei: —Amén. Ñamee yasurupai tuicha ñaneTumpa pe. Jae co iyaracuaa catu vae. Jae co opaete mbaepuere güɨnoi vae. Tuyembɨadoraca jaeño mai pegua. Amén —jei reta.

¹³Jayave penti jocua tenondegua vae upɨrandu cheve: —¿Quía reta pa co cua jemimonde tĩ vae reta? ¿Quetɨ güi pa yugüeru? —jei.

¹⁴—Cheya, nde co ndicuaa —jae chupe. Jayave jei cheve: —Cua reta yugüeru cua pe uiporara ete rendave pe. Uputuca jemimonde jare umɨtĩ Ovecha-raɨ jugüɨ pe —jei—.

¹⁵Jáeramo yugüɨreco ma Tumpa iguapɨa jovai, jare uyeyocui reta Tumpa pe ara rupi jare pɨ̃tu rupi Tumpa jo pe. Jare guapɨa pe uguapɨ vae uyandarecota jese reta —jei—.

¹⁶Ndarau ye iyembaɨ reta. Ndarau ye iúe reta. Ndarau ye jasɨ chupe reta guarasɨ.

¹⁷Echa'ã Ovecha-raɨ jocua guapɨa mbɨte pe oĩ vae uyandarecota jese reta jare güɨraata reta ɨcua ɨ oẽ vae tecove umee vae reta pe. Jare Tumpa oyoeta jesaɨ chugüi reta —jei.