Read Simte MATTHAI 10 Bible Online

MATTHAI 10 - Simte bible

MATTHAI 10

¹Huleh ama’n a nungjui sawmlenihte a kouh zohin, a kawmvah dawiniinte nohdoh theihna leh damlouhna chinteng leh natna chinteng suhdam theihna thuneihna a pia hi.

²Sawlleh sawmlenihte min chu hite ahi: A masapen in, Simon, Peter kichipa leh a unau Andru; Zebedi tapa Jakob leh a unau John:

³Philip leh Bartholomai; Thoma leh siahdongtu Matthai; Alphai tapa Jakob leh Lebbai, a mintah Thaddai;

⁴Kananmi Simon leh a mansahtu Juda Iskariot bang.

⁵Hi sawmlenihte chu Jesu’n a sawldoh a, amahuh chu thu a pia a, Jentelte lampi ah chiah sih unla, Samarite khopi sungah zong luut hial sih un;

⁶Ahihvangin, Israel innkuan belaam mangte kawmah chiah zaw un.

⁷Huleh na chiah kawmun, Vaan lalgam a naita hi, chi’n soi jel un.

⁸Damloute sudam unla, phaahte susiangthou unla, misite kaithou unla, dawite nohdoh un; a thawn in na mu va, a thawn in pia un.

⁹Na dangka-ip sungvah, sana, dangka, huleh sumeng bangmah guang sih un,

¹⁰Na zinna va diingin sakhau aha, puannaah nih aha, kengtophah aha, chiang aha keng sih un; ajiahchu natongtu chu a neeh mutaah ahi.

¹¹Huleh na chiahna va, khopi sung hi’n, khoneu sung hileh na luutna phot vah, na tunna diing taah uh mi kandoh unla, na chiahkhiah masiah uh hutahah um zing un.

¹²Huleh inn sung khat a na luut chiang uleh, chibai buuh un.

¹³Huleh hu inn sung in a taah leh, na hamuanna u’chu a tungah um heh; hizongleh a taah louh uleh na hamuanna u’chu na kawmvah hung kiihkiit heh.

¹⁴Huleh koipouh nanguh hung kipaahpih lou a, na thute uh ngaikhe lou chu, hu inn aha, hu khua aha apat na pawt chiangun na keeng va leivui thingkhia un.

¹⁵Chihtahzetin ka hung hilh ahi, Vaihawm ni chiangin, hu khopi thuaah diing sangin Sodom leh Gommorrah thuaah diing chu adan a um zaw diing hi.

¹⁶Ngai un, ngeite laha belaam um bangin ka hung sawl ahi; hujiahin guul bangin pil unla, vakhu banga poikhoih louin um un.

¹⁷Hizongleh mite lahah kiveeng un; ajiahchu amahun vaihawmte ahung mansah diing va, a kikhopna inn bang vah ahung vosah diing uh;

¹⁸Huleh keimah jiahin gamoptute leh kumpite ma ah, amah uh leh Jentelte heetsahna diingin ahung pui diing uhi.

¹⁹Hizongleh ahung matsah chiangun, bangchia bang soi diing ka hiai, chi’n lungkham sih un; na soi diing uh a huntaha hung kihilh diing na hi ngal va.

²⁰A soitu chu nanguh na hi sih diing va, na Pa uh Hagau in nanguh ah a soi zaw diing ahih jiahin.

²¹Huleh unau in unau, pa’n a ta thah diingin a mansah diing; huleh tate’n zong a nu leh pate uh a dou diing va, a thatsah diing uhi.

²²Huleh ka min jiahin mi zousiah huat na hi diing uhi; hizongleh a tawp donga thuaah mualsuaah chu hutdam in a um diing uh.

²³Hizongleh hi khopi a ahung sawi chiangun, kho dang ah tailuut un; chihtahzetin ka hung hilh ahi, mihing Tapa hung ma in Israel khua zousiah na tuan suaah sih diing uhi.

²⁴Nungjui chu houtu tungah a um ngei sih a, suaah zong a pu tungah a um ngei sih hi.

²⁵Nungjui chu a houtu banga ahung um a, suaah chu a pu banga ahung um a hun ahi. Amahun inn neitupa bawn Beelzebul a chih uleh, a innkuante chu bang chituhin ahiai a chih taah diing uh?

²⁶Hujiahin amah uh haw lau sih un; ajiahchu lang lou diing a kiphual bangmah a um sih a; heet louh diing a iim zong bangmah a um sih hi.

²⁷Mial a nanguh ka hung hilh chu vaah ah soi unla: huleh na bil kawmva na jah uh chu inn tungah taangkoupih un.

²⁸Huleh tahsa that thei a, hagau that thei lou haw chu lau sih un; hizongleh hagau leh tahsa a nih a gawtmun a sumang theitu amah chu lau zaw un.

²⁹Kawlgit nih paisa khat in a kizuah veu hilou maw? ahihvangin a lahva khat zong na Pa uh heet louhin tual ah a ke sih diing hi.

³⁰Na lutungva samzangte nasan simveh ahi.

³¹Hujiahin lau sih un, kawlgit tampi sangin na luul zaw uh ahi.

³²Hujiahin koipouh mite ma a hung gum chu, ke'n zong vaan a ka Pa ma ah amah ka gum diing hi.

³³Hizongleh koipouh mite ma a hung kiheetmohbawl chu, kei zong vaan a ka Pa ma-ah ka kiheetmohbawl diing hi.

³⁴Leitung a lemna leengsah diing a hung pai hung sa sih un; lemna leengsah diing a hung ka hi sih a, temsaau leengsah diing a hung ka hi zaw hi.

³⁵Ajiahchu tapa’n a pa, tanu’n a nu, huleh mou in a innpinu dousah diing a hung ka hi.

³⁶Huleh mi a melma chu amah innkuante ngei ahi diing hi.

³⁷Koipouh a pa aha, a nu aha keimah sanga lungsiat zaw chu ka mi hitaah ahi sih: huleh a tapa aha, a tanu aha keimah sanga lungsiat zaw chu ka mi hitaah ahi sih.

³⁸Huleh koipouh a kros pua a, hung jui lou chu, ka mi hitaah ahi sih hi.

³⁹Koipouh a hinna mu in a taan diing a; huleh koipouh keimah jiaha a hinna taan in a mu diing hi.

⁴⁰Koipouh nanguh hung kipaahpih chu kei hung kipaahpih a hi a, huleh koipouh keimah hung kipaahpih chu kei hung sawlpa kipaahpih ahi.

⁴¹Koipouh zawlnei chu zawlnei ahih jiaha kipaahpih in zawlnei kipaahman a mu diing; huleh midihtat chu midihtat ahih jiaha kipaahpih in midihtat kipaahman a mu diing.

⁴²Huleh koipouh hi mi neutahte laha khat nungjui ahih jiaha tuisih nou khat chauh pia in zong, chihtahzetin ka hung hilh ahi, a kipaahman muh diing chu a taan hial sih diing hi, a chi hi.