Read Simte MATTHAI 12 Bible Online

MATTHAI 12 - Simte bible

MATTHAI 12

¹Huchihlaiin, Jesu chu khawlni’n buhlei lai tawnin a chiah jel a; huleh a nungjuite a gil uh a kial a, buhvuite a sihtan va, a ne panta uh.

²Hizongleh Pharisaite’n hichu a muhun, a kawmvah, En ve, na nungjuite’n khawlni’n bawl siang louh a bawl uh, a chi va.

³Hizongleh ama’n a kawmvah, David in a gilkial laia a lawite toh a bawl uh simkha lou na hi u'maw?

⁴Huchia Pathian biahinn a, a luut a, amah leh a lawmte neeh siang louh, siampute chauh neeh theih, tanghou siah a neeh uh thu?

⁵Ahihlouhleh khawlni’n Pathian biahinn a siampute’n khawlni a suhbuah unzong siamlouh a tang sih uh chih, daanbu ah na sim sih u'maw?

⁶Hizongleh hi munah Pathian biahinn sanga loupizaw khat a um hi chih ka hung hilh ahi.

⁷Ahihvangin nangun, Kithoihna deih louin zahngaihna ka deih, chih umzia heta hileh u’chin, mohna nei lou chu siamlouh tangsah lou diing hi u’china.

⁸Mihing Tapa chu khawlni Lalpa ahi ngal a, a chi hi.

⁹Huleh hutah apatin a chiah a, a kikhawpna inn vah a luut a.

¹⁰Huleh, ngai in, huah mi khutzeng khat a um a, Huleh amahun a heehsiat theihna diingun, Khawlni a suhdam a siang ei? chi'n amah a dong va.

¹¹Huin ama’n a kawmvah, Na lahva kuan ahiai belaam, khat nei henla, khawlni’n kokhuuh ah keta leh, huchu vatu lou diing leh, kaidoh lou diing um?

¹²Huchi ahihchian belaam sanga mihing chu bangchitaha luulzaw a tai mah? Hujiahin khawlni’n bawlhoih a siang hi, a chi a.

¹³Huin hupa kawmah, Na khut zandoh in, a chi a. Huchi’n a zandoh a; a langkhat bangin ahung damsiangta hi.

¹⁴Huzohin Pharisaite a pawt va, amah suhlup theihna diing ngaihtuahin a kihou va.

¹⁵Hizongleh Jesu’n hichu a heet in, hu apatin, a kihemmangta a; huleh mipi nasatah in amah a jui va, ana sudam veh hi.

¹⁶Huleh amah a soiphuang louhna diingun amahuh a khap a.

¹⁷Huchu zawlnei Isaiah in hichibanga ana soite ahung taangtun theihna diingin ahi.

¹⁸En in, ka suaah, ka teel: ka deihtah, amah ka lungkim mahmahna pa chu; ka Hagau a tungah ka koih diing a, huleh ama’n Jentelte kawmah vaihawmna thu a soi diing.

¹⁹Ama’n chu a nial sih diing a, a kikou sih diing; mi koimah in kholai dungah a aw a ja sih diing uh.

²⁰Gualzou diing a vaihawmna dih ahung tut masiah sialluang gawpsa a sutan sih diing a, pat khu zong a sumit sih diing.

²¹Huleh amah min in Jentelte’n kinepna a nei diing uh, a chih.

²²Huin, dawimat, mittaw haamthei lou khat a kawmah ahung pui va; ama’n ana sudam a, huchi’n haamthei lou chu hung haamthei in khua ahung muta hi.

²³Huleh mipi zousiah in thum ah a sa va, Hipa hi David tapa hilou ahi maw? a chi va.

²⁴Hizongleh Pharisaite'n hi thu a jah tahun, Hipa’n dawimangpa Beelzebul jiah loungal in dawite a nohdoh sih diing, a chi va.

²⁵Huleh Jesu’n a ngaihtuah uh a he a, a kawmvah, Gam sung khat kilangkhen a amah leh amah kidou chu a mangthai veu a; huleh khopi sung aha, inn sung aha kilangkhen zong a dingdoh sih diing;

²⁶Huleh Setan in Setan mah nohdohta leh, amah leh amah kidou ahita diing a; bangchi'n a gam a dingta diai?

²⁷Huleh Beelzebul jiaha dawite nohdoh ka hih leh, na tate un koi jiahin ahiai a nohdoh uh? hujiahin amahuh chu nanguh hung vaihawmsah diingte ahi uhi.

²⁸Hizongleh ke’n Pathian Hagau vanga dawite nohdoh ka hih leh, Pathian gam na kawmvah hung tung ahita hi.

²⁹Ahihlouhleh, kuan mihaat chu a kaan masat louh leh, a inn a luut in, a neih a laahsah thei ngei ei mah? Ka an masa in huzohchiangin a inn chu a luhsah chauh diing ahi.

³⁰Koipouh ka lama pang lou chu ahung dou ahi; huleh koipouh ahung khopkhawmpih lou chu a sudalh ahi.

³¹Hujiahin ka hung hilh ahi, Mi a sualna zousiah uleh Pathian a soisiatna zousiah vah ngaihdam ahi diing a; hizongleh Hagau Siangthou soisiatna chu ngaihdam ahi sih diing.

³²Huleh koipouh mihing Tapa kalh chu, a kalhna uh ngaihdamsah ahi diing a, hizongleh koipouh Hagau Siangthou kalh chu, a kalhna uh hi khovel ah zong, huleh khovel hung um kiit diing ah zong ngaihdamsah ahi sih diing hi.

³³Sing chu a hoih, a gah zong a hoih na chih louhngal uleh sing chu a sia, a gah zong a sia chi ngal un; ajiahchu sing hi a gah in a kihe hi.

³⁴Guul suante haw, na giitlouhna pum va bangchia thu hoih soi thei diing na hi viai? lungtang dolh val chu kam in a soi veu ahi ngal a.

³⁵Mihoih in lungtang goubawm hoih apatin sil hoihte ahung ladoh a; huleh migilou in a goubawm hoihlou apatin sil hoihlou ahung ladoh jel hi.

³⁶Hizongleh ka hung hilh ahi, Mite’n thulimlou a soi photmah uh, vaihawm ni chiangin a jiah a soi diing uhi.

³⁷Ajiahchu na thu in siamtansah in na um diing a, na thu mahin siamlouh tansah in na um diing hi, a chi hi.

³⁸Huin Pharisaite leh lehkhagialtute hunkhop in a dawng va, Houtupa, nangmah apatin chiamchihna ka mu nuam uh, a chi va.

³⁹Hizongleh ama’n a dawng a, a kawmvah, Khangthah gilou leh aangkawm haatte’n chiamchihna a hawl uh; hizongleh zawlnei Jonah chiamchihna loungal a kawmvah, chiamchihna dang piah ahi sih diing;

⁴⁰Ajiahchu Jonah suun thum leh jan thum ngapi gil sunga a um mahbangin mihing Tapa zong suun thum leh jan thum lei gil sungah a um diing hi.

⁴¹Nineveh khua mite chu vaihawmna ah tulai khang thahte toh ahung ding diing va, siamlouh a tangsah diing uh; amahuh Jonah thusoi jiahin a kisiih ngal va; en un, Jonah sanga loupizaw hi-ah a um hi.

⁴²Huleh simlam kumpinu chu vaihawmna ah tulai khang thahte toh ahung thoukhawm diing a, siamlouh a tangsah diing: Solomon pilna ngaikhe diingin bawn kawlmong apat ahung ngal a; huleh en un, Solomon sanga loupizaw hi-ah a um hi.

⁴³Huleh dawiniin chu mi sung apat a pawt in tui umlouhna mun chinah khawlna hawl in a vaah lehleha, a mu ngal sih a.

⁴⁴Huin ama’n, Ka pawtdohna inn mahah ka kiihkiit mai diing, a chi a; huchia a hungtahin huchu a awng a, phiatsiang leh zephoih in a mu a;

⁴⁵Huin ava chiah a, amah sanga gilouzaw dawi dang sagih ava pui a, huah a luut va, a teengta uh; huin hupa umdan nunung chu a masa sangin a sezawsemta hi. Tulai khang thah giloutahte tungah zong hutobangin a um diing, a chi hi.

⁴⁶Huchia ama’n mipite kawma thu a soi laiin, ngai in, a nu leh a unaute chu amah houpih nuamin inn pua ah a ding va.

⁴⁷Huin mi khat in a kawmah, Ngai in, na nu leh na unaute nang hung houpih nuamin inn pua ah a ding uhi, a chi a.

⁴⁸Hizongleh ama’n a dawng a, amah hilhpa kawmah, Ka nu koi ahiai? huleh ka unaute zong koi ahiai? a chi a.

⁴⁹Huin a nungjuite lamah a khut a jah a, En un, ka nu leh ka unaute!

⁵⁰Ajiahchu koipouh vaan a um ka Pa deihzawng bawl taphot chu ka unaupa, ka unaunu, huleh ka nu ahi uh, a chi hi.