Read Simte MATTHAI 13 Bible Online

MATTHAI 13 - Simte bible

MATTHAI 13

¹Hu ni mahin inn apatin a chiahdoh a, tuipi gei ah a tou a.

²Huin a kawmah mipi nasatah ahung kikhawm va, hujiahin amah chu kuang khat ah a luut a; huleh mipi zousiah chu luipiau ah a ding va.

³Huleh ama’n a kawmvah tehkhinthu in thu tampi a soi a, Ngai un, chithehtu khat buhchi theh in a kuan a;

⁴Huleh a theh laiin a khen lamgei ah a tu a, vate a hung va, a tom beita hi.

⁵Huleh khenkhat suang silei munte ah a tu a; lei a sah louh jiahin ahung poupah a;

⁶Huleh ni ahung suaah in haigot in ahung um a; zung a neih louh jiahin a gawgawpta hi.

⁷Huleh khenkhat ling lahah a tu a; ling chu ahung khang lian a, a deepmangta hi.

⁸Hizongleh a dang chu lei hoih ah a tu a, khenkhat a leh za bangin, khenkhat, a leh sawmguup bangin, khenkhat a leh sawmthum bangin ahung gahta hi.

⁹Koipouh jahna diing a bil nei in ja heh, a chi hi.

¹⁰Huin nungjuite a hung va, a kawmah, Bang diinga a kawmva tehkhinthu a na soi ahiai? a chi va.

¹¹Ama’n a dawng a, a kawmvah, Ajiahchu vaan lalgam thuguuh chu nanguh heet diing a phal ahi a, hizongleh amahuh heet chu phal ahi sih.

¹²Ajiahchu koipouh a nei chu piah beh ahi diing a, a hau sem diing; hizongleh koipouh a nei lou chu a neih sun zong laahsah ahi diing.

¹³Hujiahin a kawmvah tehkhinthu in ka soi ahi; ajiahchu amahun mu napi in a mu sih va, huleh ja napi in a ja sih va, he zong a hesiam sih uhi.

¹⁴Huleh Isaiah in ana soilawh chu a tungvah ahung taangtungta ahi; Jah chu na ja diing va, he chu na hesiam sih diing uh; huleh muh chu na mu diing va, he chu na hedoh sih diing uh;

¹⁵Ajiahchu hi mite lungtang a nang gawpta a, a bil uh a ngong a, huleh a mit uh a siingta uhi; huchilou inzaw a mit un a mukha diing va, a bil un a jakha diing va, huleh a lungtang un a hekha diing va, ahung kiheikiitkha diing va, ke'n amahuh ka na sudamkha diing, chia, ana chih khu.

¹⁶Hizongleh nanguh mit chu a muh jiahin a hampha hi; huleh na bil uh zong a jah jiahin a hampha hi.

¹⁷Ajiahchu, chihtahzetin ka kung hilh ahi, zawlnei tampi leh midihtat tampi in zong na sil muhte uh muh a ut va, ahihvangin a mu sih uh; huleh na sil jahte uh zong a ja nuam va, hizongleh a ja sih uhi.

¹⁸Hujiahin buhchithehtu tehkhinthu chu ngai un.

¹⁹Koipouh in lalgam thu a jah a, a heetsiam louh leh, migiloupa a hung a, a lungtang a kithehsa chu a laahsah veu hi. Hichu lam gei a tupa chu ahi.

²⁰Huleh suang silei laha tupa chu, thu chu ja a, kipaahtaha a pompah ngalpa ahi.

²¹Ahihvangin amah a zung a neih louh jiahin, tomkhat chauh a um a; thu jiaha gimthuaahna bang, sawina bang ahung um chiangin a puuhpah veu hi.

²²Huleh ling laha tupa zong, thu chu a ja a ahihvangin hi khovel awlmohna leh hauhsatna heemna in thu chu a deep a, huchi’n amah chu gah nei louin ahung umta hi.

²³Hizongleh lei hoih tunga tupa chu, thu chu ja a hesiampa chu ahi; huchu gah zong a gah a, khenkhat a leh za bang, khenkhat a leh sawmguup bang, khenkhat a leh sawmthum bangin a pung hi, a chi a.

²⁴Tehkhinthu dang ama’n a kawmvah a soi kiit a, Vaan lalgam chu, a lou a chihoih theh mi khat toh tehkhin ahi;

²⁵Hizongleh mite a ihmut kal un a meelmapa chu a hung a, buh lahah buhlem a theh a, a chiah mangta hi.

²⁶Hizongleh buh chu ahung pou a, ahung vuih in, buhlemte zong ahung kilangta hi.

²⁷Huchi'n inn neipa suaahte chu a hung va, a kawmah, Pu, na lou a chi hoih theh hilou na hiai mah? buhlemte khoi apata hung um ahiai? a chi va.

²⁸Ama’n a kawmvah, Meelma khat in ana bawl ahi, a chi a. A suaahte’n a kawmah, Ahihleh va chiah in hute chu va lakhawm le’ung hoih na sa ei? a chi va.

²⁹Hizongleh ama’n chu, Sa lou e, huchi hileh buhlemte na laahkhawmna lam vah, buhte zong na botkhawmkha diing uh;

³⁰Buh laah dongin poukhawm u’heh; huleh buh laah huntah chiangin buh aatte kawmah, Buhlemte lakhawm masa unla, haal diingin a lomlom in gaah un; hizongleh buh chu ka buhpang sungah koih luut un, ka chi diing, a chi hi.

³¹Tehkhinthu dang a kawmvah a soi kiit a, Vaan lalgam chu ankamtang khat mi’n a laah a, a lou a, a theh bang ahi;

³²Huchu haichi lahah a neu penpen a; hizongleh ahung khanlet chiangin, hampa lahah a lianpen a; sing ahung hi a, huchi’n tungleeng vate a hung va, a ba ah ahung giaah uh, a chi a.

³³Tehkhinthu dang a kawmvah a soi kiita; Vaan lalgam chu numei in tol a laah a, taangbuang tehna thum lahah, a bawna a thoh masiaha a phuum bang ahi, a chi a.

³⁴Hi silte zousiah chu Jesu’n tehkhinthu in mipite kawmah a soi a; huleh tehkhinthu lou in a kawmvah bangmah a soi sih hi.

³⁵Zawlnei in, Tehkhinthu in ka kam ka kaah a; leilung pianchiil apat silguuh kiphualte chu ka soi diing hi, chia a soi chu ahung taangtunna diingin.

³⁶Huin Jesu’n mipite a sawlmang a, inn sungah a luut a; huchi’n nungjuite a kawmah a hung va, Lou a buhlem tehkhinthu chu hung hilhchian in, a chi va.

³⁷Ama’n a dawng a, a kawmvah, Hu chi hoih thehtu chu mihing Tapa ahi;

³⁸Lou chu khovel ahi; chi hoihte, chu lalgam tate ahi va; huleh buhlemte chu giloupa tate ahi uh.

³⁹Meelma a thehtu chu Diabol ahi; buh laah hun chu khovel tawpna diing ahi; huleh a aattute chu angelte ahi uh.

⁴⁰Huchia buhlemte chu lakhawm a mei a, a kihaal bangin khovel tawp hun chiangin a um diing.

⁴¹Mihing Tapa’n a angelte a sawlkhe diing a, a gam apatin sualsahtute leh silsual bawl zousiah chu a khawm diing uhi;

⁴²Huleh haaltuina mei ah a paai diing va; huah chu kah leh hagawi a um diing.

⁴³Huzohchiangin midihtatte chu a Pa uh gam ah ni bangin a taang diing uhi. Koipouh jahna diing a bil nei in ja heh.

⁴⁴Huleh vaan lalgam chu loulai a gou kiguuhphum tobang ahi; huchu mi khat in a mudoh a, a phual a, huin kipaahtahin a chiah a, a neih zousiah a zuah a, a leita hi.

⁴⁵Huleh vaan lalgam chu sumkawlveimi tuikep suang hoihtah bawl tobang ahi kiit hi.

⁴⁶Ama’n chu tuikep suang man tamtah khat a mu a, a chiah a, a neih zousiah a zuah a, a leita hi.

⁴⁷Huleh vaan lalgam chu leen tuipi a seh a, chi chinteng huuikhawm bang ahi.

⁴⁸Huchu a dim chiangin a gei ah a kaidoh va, a tou va, a hoihte chu bawmte ah a khum va, hizongleh a hoihloute chu a paai uh.

⁴⁹Khovel tawp chiangin hutobangin a um diing hi; angelte chu a hung diing va, migiloute chu midihtatte lah apat a khenkhe diing uh.

⁵⁰Huleh amahuh chu haaltuina mei ah a paai diing uh; huah chu kah leh hagawi a um diing, a chi hi.

⁵¹Jesu’n a kawmvah, hi silte zousiah na hesiam viai? a chi a. Amahun a kawmah, hi, Lalpa, a chi va.

⁵²Huin ama’n a kawmvah, Hujiahin lehkhagialtu, vaan lalgam thu hilh a um photmah chu inn neitu, a goubawm apata sil lui leh sil thah pholhkhetu bang ahi, a chi hi.

⁵³Huleh hichi ahung hia, Jesu’n hi tehkhinthute a soi zohin, hu apatin a chiahta a.

⁵⁴Huin amah gam lamah a hung a, a kikhopna inn vah amahuh thu a hilh a, huchi’n amahun thum ah a sa mahmah va, Hipa’n hi pilna leh sil loupi bawltheihna khoia a muh ahiai?

⁵⁵Hipa hi sing kuang bawlpa tapa hilou ahiai mah? a nu Mari kichi hilou ahiai mah? huleh a unaute chu Jakob, Jose, Simon huleh Juda hilou ahiai mah?

⁵⁶Huleh a sanggamnute zong i kawmva um veh hilou u'maw? hu ahihleh hipa’n khoi apata hite zousiah a muh ahiai? a chi va.

⁵⁷Huchi’n a tungah a lungkimta sih uhi. Hizongleh Jesu’n a kawmvah, zawlnei amah gam sung leh amah inn sung chih louh ah zahbawl louhin a um ngei sih hi, a chi a.

⁵⁸Huleh a gintaat louh jiahun ama’n hu ah nna loupi tamtah a tong sih hi.