Read Simte MATTHAI 16 Bible Online

MATTHAI 16 - Simte bible

MATTHAI 16

¹Pharisaite zong Sadukaite toh a hung va, amah ze-etna diingin vaan a kipan chiamchihna amahuh ensah diingin a ngen va.

²Ama’n a dawng a, a kawmvah, Nitaahlam chiangin, khua a pha diing hi’nte mei san a suaah, na chi veu uhi.

³Huleh jingkal chiangin, tuni’n khua a se diing hi’nte mei san a suaah a, a ngiamkai, na chi veu uhi. Nanguh milepchiahte aw, vaan umdan na hesiam va; hizongleh hun chiamchihna na he sih uh.

⁴Khangthah gilou leh aangkawm haatte’n chiamchihna a hawl uh; hizongleh zawlnei Jonah chiamchihna loungal a dang a kipe sih diing, a chi a. Huleh amahuh a nusia a, a chiahta hi.

⁵Huleh a nungjuite’n gaallehlam a tun un, tanghou a po mangngilh va.

⁶Huin Jesu’n a kawmvah, Pharisaite leh Sadukaite tol lahah kiveeng unla pilvaang un, a chi a.

⁷Huleh amahun chu, Tanghou i puaah louh jiahin ahi ve, chi'n a kingaihtuah va.

⁸Jesu’n huchu a hedoh a, a kawmvah, Aw gintawmte, tanghou na neih louh jiah va bang diinga kingaihtuah na hi viai?

⁹Mi saangngaate vaahna tanghou ngaa leh, bawm bangzah aha na dimsah uh, chih tu nasan a hesiam nailoua, na lungsim va zong he zing lou na hi u'maw?

¹⁰Huleh mi saangli vaahna tanghou beu sagih leh na bawm dimzaat u’zong?

¹¹Na kawmvah tanghou thu soi ka hi sih a, Pharisaite leh Sadukaite tol lahah kiveeng un chih soi ka hi zaw chih bang diinga hesiam lou na hi viai? a chi a.

¹²Huin amahun tanghou tol lahah kiveeng un chi hilouin Pharisaite leh Sadukaite thuhilhna lahah pilvaang diingin ahi zaw, chih ahung theita uhi.

¹³Jesu chu Caesarea Philippi gam ahung tunin a nungjuite kawmah, Mite’n kei mihing Tapa hi koi ahi ahung chi viai? chi’n a dong a.

¹⁴Huleh amahun, Lawikhat in, Baptistu John ahi ahung chi va; lawikhat in Elijah huleh a dangte’n Jeremiah ahihlouhleh zawlneite laha khat ahi, ahung chi uhi, a chi va.

¹⁵Ama’n chu a kawmvah, Ahihleh nangun koi ahi na hung chi viai? a chi a.

¹⁶Huin Simon Peter in a dawng a, Khrist, Pathian hing Tapa chu na hi, a chi a.

¹⁷Huleh Jesu’n a dawng a, a kawmah, Simon Barjona na hampha hi, ajiahchu sa leh sisan in ahung heetsah na hi sih a, vaan a um ka Pa hung heetsah ahi zaw hi.

¹⁸Huleh ke'n zong na kawmah, Nang Peter na hi, chih ka hung hilh ahi; huleh hi suangpi tungah ka kouhtuam ka lemdoh diing hi; huchu misi kulh kotkhaahte’n bangmah a lohbut sih diing.

¹⁹Huleh na kawmah vaan lalgam chabite ka hung pe diing a, lei a na kaan photmah chu vaan ah kaan ahi diing a, huleh lei a na phel photmah chu vaan ah phel ahi diing, a chi a.

²⁰Huin Khrist ahi chih koima hilhlou diingin a nungjuite dettahin thu a pia hi.

²¹Hunungsiah chu Jesu’n Jerusalem a, a chiah diing bang, upate, siampu lalte huleh lehkhagialtute laha sil tampi a thuaah diingdan bang, thaha a um diing bang, huleh ni thum ni a, a thoh kiit diing bang a nungjuite a hesah panta hi.

²²Huin Peter in amah a puituam a, Lalpa, hih in hung gamlaat heh; na tungah a tung hial sih diing, chi'n a taihilh a.

²³Hizongleh amah chu a kihei a, Peter kawmah, Setan, ka nungah pai in; kei diingin puuhna na hi; nang Pathian silte ngaihtuah louin mihing silte na ngaihtuah zawh jiahin, a chi a.

²⁴Huin Jesu’n a nungjuite kawmah, Mi koipouh in ahung juih nuam leh mahni gimthuaah khawhsa louin, a kros pua in hung jui heh.

²⁵Ajiahchu koipouh a hinna humbit nuamin a taan diing a; huleh koipouh keimah jiaha a hinna taan in a mu diing hi.

²⁶Mi’n khovel a pum in nei henla, a hinna taan taleh amah diingin bang a phatuam diai? ahihlouhleh, mi’n a hinna luang in bang ahiai a piah diing?

²⁷Mihing Tapa chu a Pa loupinna a angelte toh hung diing ahi ngal a; huchiangin michin a natoh bangjelin a thuh chiat diing hi.

²⁸Chihtahzetin na kawmvah ka soi ahi, Hi a dingte a khen chu, mihing Tapa a lalgam a, a hung a muh masiah uh, sihna chiam lou diing a um uhi, a chi hi.