Read Simte MATTHAI 19 Bible Online

MATTHAI 19 - Simte bible

MATTHAI 19

¹Huleh hichi ahung hi a, Jesu’n hi thute a soi zohin, Galili gam apatin a pawt a, Jordan gaal Judia gam lamah a chiah a;

²Huleh mipi nasatah in a jui va, ama’n huah amahuh ana sudam hi.

³Pharisaite zong a kawmah a hung va, amah ze-etin a kawmah, Bang jiah pouhin mi’n a ji a khul a siang ei? a chi va.

⁴Huin ama’n a dawng a, a kawmvah, A chiil apat a amahuh siamtu in numei leh pasal in ana siam hi.

⁵Huleh, hijiahin pasal in a nu leh a pa a nuse diing a, a ji a tu diing; huleh a nih un sapumkhat ahung hita diing uh, a chi hi, chih na sim sih u'maw?

⁶Huchi'n amahuh chu nih ahi nawnta sih va, sapumkhat ahita uhi. Hujiahin Pathian in a gawmsa chu mihing in khen sih heh, a chi a.

⁷Amahun a kawmah, Ahihleh bang diinga Mosi in kikhulna lehkha piah a khul diing ahi, chia thu a piah ahiai? a chi va.

⁸Ama’n a kawmvah, Mosi in na lungtang uh khauh jiaha na jite uh khul ahung phalsah ahi; hizongleh a chiil apatin huchibang ahi sih hi.

⁹Huleh ke'n ka hung hilh ahi, Koipouh mi dang toh kingaih jiah hiloua, ji khul a, a dang nei chu aangkawm ahi; huleh khulsa nei photmah zong aangkawm ahi, a chi a.

¹⁰A nungjuite’n a kawmah, pasal a ji toh kal thu huchi ahihleh, kiteen a hoih lou ahi, a chi va.

¹¹Hizongleh ama’n a kawmvah, Hi thu kisoi mi zousiah in a pom thei sih uh, a kawmva piahte lou ngalin.

¹²Michilgeh khenkhat a nu uh gil sung apat huchibanga piang mawng a um va; huleh michilgeh khenkhat, mihing geh thuh zong a um a; huleh michilgeh, vaan lalgam jiaha michilgeha kisiamtawmte zong a um hi. Koipouh a pomthei in pom uheh, a chi hi.

¹³Hulaiin a tungva a khut nga a, a haamteisah diingin a kawmah naupang neute ahung pui va; huleh nungjuite'n ana tai va.

¹⁴Hizongleh Jesu’n, Naupangte chu ka kawma a hung diing uh phalsah unla, khap sih un; vaan lalgam, chu huchibang mite a ahi ngal a, a chi a.

¹⁵Huleh a tungvah a khut a nga a, hu apatin a chiahta hi.

¹⁶Huleh ngai in, mi khat a hung a a kawmah, Houtupa hoih, kumtuang hinna ka neih theihna diingin bang silpha ahiai ka bawl diing? a chi a.

¹⁷Ama’n a kawmah, Bang diinga mi hoih hung chi na hiai? Pathian chih louh mi hoih dang a um sih hi; bangteng hitaleh hinna a na luut nuam leh thupiahte zawm in, a chi a.

¹⁸Ama’n a kawmah, A khoi haw e? a chi a. Jesu’n a dawng a, Tual na thah louh diing ahi, Na aangkawm louh diing ahi, Na guuh louh diing ahi, Heetpihtu tahlou in na pang diing ahi sih.

¹⁹Na nu leh na pa zah in: huleh, Nangmah na kilungsiat bangin na innveengte na lungsiat diing ahi, a chi a.

²⁰Tangvalpa'n chu a kawmah, Hite zousiah chu ka neu apat ka jui zingta hi; bang ka sam na lai ei? a chi a.

²¹Jesu’n a kawmah, Hoihkim keei ning na chih leh, chiah inla, na neih zuah inla, migentheite kawmah pia in, huchi'n vaan ah gou na nei diing; huleh hung inla hung jui in, a chi a.

²²Hizongleh tangvalpa’n chu hu thu a jah tahin lungkham tahin a chiah mangta hi; sum tampi nei ahih jiahin.

²³Huin Jesu’n a nungjuite kawmah, Chihtahzetin ka hung hilh ahi, mi hausa diingin vaan lalgam luut a hahsa hi.

²⁴Huleh ka hung hilh kiit ahi, Mi hausa Pathian gam a, a luut sangin sangawngsaau phin bilvang a, a luut paisuaah a baihlamzaw hi, a chi a.

²⁵A nungjuite’n hu a jah un limdang a sa mahmah va, Huchi ahihleh koi hutdamin a um zou diai? a chi va.

²⁶Hizongleh Jesu’n amahuh a en a, a kawmvah, Huchu mihing diingin bawl gual ahi sih a; hizongleh Pathian diingin chu bangkim ahi thei hi, a chi hi.

²⁷Huin Peter in a kawmah, Ngai in, kei un bangkim nusia in ka hung juita va; bang ka mu diing viai leh? chi'n a dong a.

²⁸Huin Jesu’n a kawmvah, Chihtahzetin ka hung hilh ahi, Siamthahna ah, mihing Tapa a loupina touphah a, a tou chiangin nanguh kei hung juite chu Israel nam sawmlenihte vaihawm in laltouphah sawmlenih ah na tou saam diing uhi.

²⁹Huleh michin ka min jiaha, innte aha, unaute aha, sanggamnute aha, pa aha, nu aha, ji aha, tate aha, gamte aha nusia in chu a lehza a mu diing va, kumtuang hinna a tang diing uh.

³⁰Hizongleh mi tampi masapen a umte nunungpen in a um diing va; huleh nunungpen a umte masapen ahi diing uhi.