Read Simte MATTHAI 21 Bible Online

MATTHAI 21 - Simte bible

MATTHAI 21

¹Huleh Jerusalem a tun kuan va, Olive taang a Bethphage a tun un, Jesu’n nungjuite nih a sawl a,

²A kawmvah, Na mazawn va khua ah va chiah un; huleh sabiltung kikhit a kawma, a nou toh na va mupah diing uhi; hute chu suut unla, ka kawmah hung kai unla.

³Huleh mi a koi aha in na kawmva soi a neih leh, Lalpa’n amahuh a mamoh hi, na chi diing va, huchi'n ama’n ahung sawlpah diing hi, a chi a.

⁴Hite zousiah chu zawlnei kam a kisoisa ahung taangtun theihna diingin ahi.

⁵Zion tanu chu hilh inla, Ngai in, na Kumpipa chu kingaingiam tahin sabiltung tungah, sabiltung nou tunga tuangin na kawmah a hung hi, chi'n, a chih chu.

⁶Huin nungjuite chu a chiah va, Jesu’n amahuh thu a piah bangin a bawl va,

⁷Huleh sabiltung leh a nou chu ahung kai va, a tungah a puante uh a phah va, a tungah Jesu a tousah uhi.

⁸Huleh mipi tamtahmei in lampi ah a puante uh a phah va, a dangte’n singbawh a saatkhia va, lampi ah a phah uhi.

⁹Huleh mipi a ma a chiahte leh a nunga juite’n kikou in, David Tapa, Hosanna; Lalpa mina hung pai chu a hampha hi; Tungnungpen ah. Hosanna, a chi va.

¹⁰Huleh Jerusalem khosung a luut tahin, Hipa koi ahiai? chi'n khopi pumpi a liing hial uhi.

¹¹Huleh mipite'n, Hipa hi zawlnei Jesu, Galili gam a Nazareth khua a mi ahi, a chi uhi.

¹²Huleh Jesu chu Pathian biahinn ah a luut a, biahinn a sil zuah leh lei zousiah a delhdoh a, huleh sum hengtute dohkaan haw leh vakhu zuahte touna haw a sawnpuuhsah a.

¹³Huleh a kawmah, Ka Pa inn chu haamteina inn a kichi diing, chih gelh ahi; hizongleh nangun suammangte khuuhin na siam uhi, a chi a.

¹⁴Huleh Pathian biahinn ah, mittawte leh keengbaite a kawmah a hung va, ama’n amahuh chu ana sudam hi.

¹⁵Hizongleh siampu lalte leh lehkhagialtute’n a silmah bawlte leh biahinn a, David Tapa, Hosanna, chia naupang kikoute a muh un a lungkim sih mahmah va.

¹⁶Huleh a kawmah, Hite’n bang ahiai a soi uh na ja ei? a chi va. Huleh Jesu’n a kawmvah, hi, naungeehte leh nawiteep nalaite kam a pawt in paahtawina na sukimta, chih na sim ngei sih u'maw? a chi a.

¹⁷Huleh amahuh nusia in khopi apat a pawt a, Bethani ah a chiah a; huah a giahta hi.

¹⁸Huleh a zing a khopi lama a kilehkiit in a gil ahung kialta a.

¹⁹Huleh lam gei ah theipi kung a mu a, a bula ava chiah leh a nah loungal bangmah a muta sih a, huin theipi kung kawmah, Tu apat kumtuang in na gah kiit nawn sin, a chi a. Huin theipi kung chu a vulpah ngal hi.

²⁰Huleh nungjuite’n huchu a muh un, Bangchidan ahiai theipi kung chu a vulpah mei? chi'n thumah a sa mahmah va.

²¹Jesu’n a dawng a, a kawmvah, Chihtahzetin ka hung hilh ahi, Ginna na neih va, na ginlelh louh uleh theipi kung a bawl bang chauh na bawl sih diing va, hi taang kawmah zong, Kisuandoh inla, tui khang lian ah kipaai in chileh uchin, na chih bang un a um diing hi.

²²Huleh bangkim gingta a haamteia na nget u’chu na mu diing uhi, a chi hi.

²³Huleh amah Pathian biahinn a, a luut a thu a hilh laiin, siampu lalte leh vaantaang upate a kawmah a hung va, Bang thuneihna in ahiai hi silte na bawl? Kuan ahiai hi thuneihna hung pia? a chi va.

²⁴Jesu’n a dawng a, a kawmvah, Ke'n zong thu khat ka hung dong diing a, huchu na hung hilh uleh, ke'n zong koi thu in ahiai hi sil ka bawl ka hung hilh ve diing hi.

²⁵John baptisma hi khoi apatin ahiai? vaan apatin aha, ahihlouhleh mihing apat? a chi a. Huleh amahuh a kingaihtuah va, Vaan akipat chilehang lah, huchi ahihleh bang diinga gingta lou? a chi diing a.

²⁶Hizongleh mihing a kipat chilehang lah mipite i lau ngal a; mi zousiah in John chu zawlnei a, a seh jiahun, a chi va.

²⁷Huchi'n Jesu a dawng va, Ka he sih uh, a chi va. Huin ama’n a kawmvah, Ke'n zong bang thuneihna in ahiai hi silte ka bawl chih ka hung hilh sih diing hi.

²⁸Hizongleh nangun bang na chi ngaih viai? Mi koi aha in tapa nih a nei a; huleh a khatna kawmah a hung a, Tapa, tuni in ka grephuan ah va tong in, a chi a.

²⁹Ama’n a dawng a, Ut sing, a chi a; hizongleh a khonung in a lungsim a hengta a, a va kuanta hi.

³⁰Huin a nihna kawmah a hung a, huchimahbangin a chi a. Huleh ama’n a dawng a, Pu, ka chiah diing hi, a chi a; hizongleh a chiahta sih a.

³¹Amahuh gel koi zaw in a pa uh deihlam a bawl viai le? a chi a. Amahun a kawmah, A masazaw in, a chi va Jesu’n a kawmvah, Chihtahzetin ka hung hilh ahi, Siahdongte leh nohchizuahte’n Pathian gam ahung luut khelh diing uhi.

³²Ajiahchu John chu dihtatna lam thu ah na kawmvah a hung a, amah na gingta sih uh; hizongleh siahdongte leh nohchizuahte’n amah a gingta uhi; huleh nangun hu na muh un, amah na gintaatna diingun na kisiih nuam tuan sih uhi.

³³Tekhinthu dang ngaikhia un; Inn neitu mi koiaha khat a um a, hupa’n chu grephuan a bawl a, daai in a uum kiimvel a, hu sungah grep suuhna kokhuuh a lai a, innsaang a lam a, huchi'n loubawlmite kawmah hohloh diingin a pekhia a, gam dangah a chiahta a.

³⁴Huleh a gah loh a hun diing kuan in, a suaahte chu a gah la diingin a enkolte kawmah a sawl a.

³⁵Huleh a enkolte’n a suaahte chu a man va, khat a vua va, khat a that va, khat suang in a sep uh.

³⁶Huin ama’n a suaahte a masa haw sanga tamzaw a sawl kiit a; amahuh tungah zong huchimahin ana bawl va.

³⁷A tawp ah, Ka tapa a zahtaatkha diing uh chi'n, a tapa chu a sawl a.

³⁸Hizongleh a enkolte’n a tapa chu a muh un, Hipa gouluahtu diing ahi; hung un, i that diing va, a gouluah diing chu i kitan diing uh, a chi va.

³⁹Huin amah chu a man va, grephuan pua ah a paaidoh va, a thatta uhi.

⁴⁰Huchi'n grephuan neitupa a hung tahchiangin hu a enkoltute chu bang a lohta diai? a chi a.

⁴¹Amahun a kawmah, Ama’n hu migiloute chu gentheitahin a sumang diing a, grephuan chu a enkoltu dang, a gah loh hun china a gahte a kawma pe jel diingte kawmah a kemsah diing, a chi va.

⁴²Jesu’n a kawmvah, Pathian lehkhabu ah, Inn lamtute suang deih louh, hu suang ngei chu a ning a suang poimohpen ahung hita; huchu Lalpa bawl ahi a, huleh i mitmuh un a thum ah hi, chih thu na sim kha ngei sih u'maw?

⁴³Hujiahin ka hung hilh ahi, Pathian gam chu na kawm vapat laahsah ahi diing a, gah suang diing jat dang kawmah piah ahi diing hi.

⁴⁴Huleh koipouh hi suang tunga puuh chu a keehjah diing a; huleh a netkhaah photmah chu a gawijan diing hi, a chi a.

⁴⁵Huleh siampu lalte leh Pharisaite’n a tehkhinthute a jah un, amahuh tung thu soi ahi chih a kihe va.

⁴⁶Hizongleh amah chu mat a tup uleh, mipite a lau ngal uhi, amahun zawlnei a, a ngaih jiahun.