Read Simte MATTHAI 22 Bible Online

MATTHAI 22 - Simte bible

MATTHAI 22

¹Huleh Jesu’n a dawng a, a kawmvah tehkhinthu a soi kiit a.

²Vaan lalgam chu koiaha kumpipa khat a tapa a diinga kiteenna ankuang bawl tobang ahi,

³Huleh kiteenna ankuang luina a chialte kou diingin a suaahte a sawl a; amahuh a hung nuam sih uhi.

⁴Ama’n a suaah dangte a sawldoh kiit a, Chialte kawmah va chiah unla, Ngai un, ka ankuang ka peihta hi; ka bawngtalte leh ka gan thaute thah ahi a, sil zousiah peihsa ahita; kiteenna ah hungta un, va chi un, a chi a.

⁵Hizongleh amahun a ngaihsah sih va, khat a lou ah, khat a sumdawnna ah a kichiah mangta uhi;

⁶Huleh mi dangte’n a suaahte chu a man va, musittah in a bawl va, a thatta uhi.

⁷Hizongleh kumpipa’n huchu a jah tahin a lungthah a; a sepaihte a sawl a, hu tualthatte chu a sumang a, huleh a khua uh zong a haalsahta hi.

⁸Huin ama’n a suaahte kawmah, Kiteenna ankuang peih ahita, hizongleh ka chialte lah ne taah ahi sih uh.

⁹Hujiahin lamkathuamte ah chiah unla, mi na muh taphot uh kiteenna an ne diingin hung chial un, a chi a.

¹⁰Huchi'n hu suaahte chu a pawt va, lamkathuamte a va chiah in a muhphaah tan uh, misia, mipha, a bawn in a koukhawm va; kiteenna mun chu michialte in ahung dimta hi.

¹¹Huin kumpipa chu michialte en diing a ahung luut leh, kiteenna puan silh lou mi khat a muta a;

¹²Huin ama'n a kawmah, Lawm, bangchidan ahiai, kiteenna puan silh lou a hia na hung luut, a chi a? Huin amah chu a haam keei sih a.

¹³Huin kumpipa’n a suaahte kawmah, A khut leh a keeng kaan unla, pawdoh unla, polam mial ah paaita un; huah kah leh hagawi a um diing.

¹⁴Ajiahchu tampi kouh ahi a, tawmtakhat teel ahi uh, a chi hi.

¹⁵Huin Pharisaite chu a chiah va, a thusoi a mat theihna diing dan a va kihou va.

¹⁶Huleh amahun a nungjuite uleh Herod pawlte a kawmah a sawl va, hute’n chu a kawmah, Houtupa, midihtah na hi a, dihtahin Pathian lam thu na hilh a, mi koimah khawhsah tuam na nei sih chih ka he uhi; ajiahchu koimah khentuam na nei sih hi.

¹⁷Hujiahin bangchi na sa ei? hung hilh in; Kaisar kawma siah tawi siang aha, siang lou? a chi va.

¹⁸Hizongleh Jesu’n a lungsim uh giit louhdan chu a he a, Milepchiahte, bang diinga hung ze-et na hi viai?

¹⁹Siah sum chu hung ensah un, a chi a. Huin a kawmah makhai khat ahung tawi va.

²⁰Huin ama’n a kawmvah, hi koi lim ahiai? a chi a.

²¹Amahun a kawmah, Kaisar a, a chi va. Huin ama’n a kawmvah, Kaisar sil chu Kaisar kawmah pia unla, Pathian sil chu Pathian kawmah pia un, a chi a.

²²Amahun hi thute a jah un thumah a sa mahmah va, amah a nusia va, a chiah mangta uhi.

²³Hu ni mahin Sadukaite, thohkiitna a um sih chite a kawmah a hung va,

²⁴Houtupa, Mosi in, Mi ta nei lou a, a sih leh, a unaupa’n a ji luah in, a unaupa diingin chi a hahsah diing ahi, a chi hi.

²⁵Tuin ka kawmvah unau pasal sagih a um va; huleh a upapen in ji a nei a, a sita a; chi a hah louh jiahin a ji chu a unaupa a nuutsiatta a.

²⁶Huchimahbangin a nihna zong ta beiin a si a, a thumna in a luah a, a sagihna tanin a nei chiat uh.

²⁷Huchi'n a tawp ah numeinu zong a sita hi.

²⁸Ahihleh thohkiitna ah amahnu chu sagihte laha koipen ji ahita diai? a bawnun la a nei chiat ngal va, chi'n a dong uh a.

²⁹Jesu’n a dawng a, a kawmvah, Pathian lehkhathu leh Pathian silbawltheihna na heet louh jiahun, na sukhial veu uhi.

³⁰Thohkiitna ah kiteenna a um nawnta sih a, teeng zong a kiteengsahta sih uh, vaan a angelte tobang ahi uhi.

³¹Hizongleh misi thohkiitna thu a Pathian in na kawmva a soi chu simkha lou na hi uh maw?

³²Kei chu Abraham Pathian, Isaak Pathian, Jakob Pathian ka hi, a chih chu. Pathian chu misi Pathian ahi sih a, mihing Pathian ahi zaw, a chi a.

³³Huleh mipite’n huchu a jah un, a thuhilh chu thumah a sa mahmah uhi.

³⁴Hizongleh ama’n Sadukaite a nialdang chih a jah tahun Pharisaite chu a kikhawm va.

³⁵Huleh a lahva daansiam khat in amah ze-et in thu khat a dong a.

³⁶Houtupa, daan thu ah bang ahiai thupiah lianpen? chi'n.

³⁷Jesu’n a kawmah, Lalpa na Pathian chu na lungtang zousiah in, na hagau zousiah in, na lungsim zousiah in na lungsiat diing ahi, chih.

³⁸Huchu thupiah masa leh lianpen ahi.

³⁹Huleh a nihna chu hibangmah ahi, Nangmah na kilungsiat bangin na innveengte na lungsiat diing ahi, chih.

⁴⁰Hi thupiah nihte tungah daan thu leh zawlneite thu zousiah a kikhaikhawm veh ahi, a chi hi.

⁴¹Pharisaite a kikhop laiun, Jesu’n amahuh thu a dong a.

⁴²Khrist hi bang na chi ngaih viai? koi ta ahiai? a chi a. Amahun a kawmah, David tapa, a chi va.

⁴³Ama’n a kawmvah, Ahihleh bangchidana David in hagau a amah chu,

⁴⁴Lalpa’n ka Lalpa kawmah, Na meelmate na keengpeeh nuaia ka koih masiah ka jiatlam ah tou in, chia, Lalpa a chih ahiai;

⁴⁵Huchia David in amah chu Lalpa a chih ngal leh, a tapa bang a chi hih diai? a chi a.

⁴⁶Huin koima'n amah chu kam khat in zong a dawng thei sih va, hu nia kipatin koima’n thu dang mawngmawng a dong kiit ngamta sih uhi.