Read Simte MATTHAI 26 Bible Online

MATTHAI 26 - Simte bible

MATTHAI 26

¹Huleh hichi ahung hi a, Jesu’n hi thute chu a soi zohin, a nungjuite kawmah,

²Ni nih zou chiangleh chiahkaan ankuang luina um diing ahi, huleh mihing Tapa chu kilhbeh diing a matsah in a um diing hi, chih na he uh ahi, a chi a.

³Hu tahin siampu lalte leh lehkhagialtute, vaantang upate chu siampu lalpen Kaiapha a chih uh innpi ah a kikhawm va,

⁴Huleh Jesu chu doha bawl a man a, a thah theihna diingun a kihoukhawm va,

⁵Ahihvangin ankuang lui ni in hihdah heh, huchilou inchu mipi lahah buaina ahung umkha diing, a chi uhi.

⁶Huleh Jesu chu Bethani khua a miphaah Simon inn a, a um laiin,

⁷Huah chu numei khat Alabastar bawm a thau namtui luultah tawi in a kawmah a hung a, ankuang a, a tou laiin a lu ah a leih a.

⁸Hizongleh a nungjuite’n hichu a muh un, a lungkimta sih va, Bang diinga hikhu mathaang a subei ahiai?

⁹Hi thau hi a man tamtaha zuah a, huleh mizawngte kawma piah theih ahi ngal a, a chi va.

¹⁰Jesu’n hichu a heetin a kawmvah, Bang diinga hi numeinu subuai na hi viai? amahnu’n ka tungah sil hoihtah a bawl ahi.

¹¹Ajiahchu mizawngte na kawmvah a um zing uhi, hizongleh kei chu na kawmva um zing ka hi sih hi.

¹²Hi thau namtui ka tunga a leih chu vuia ka um ni a diingin ahih ahi.

¹³Chihtahzetin ka hung hilh ahi, Khoi munah zong, khovel pumpi ah hi tanchinpha kisoina photah, hi numeinu silbawl zong amah heetzingna diingin a soi jel diing uhi, a chi hi.

¹⁴Huin sawmlehnihte laha khat, Juda Iskariot a chih u’chu siampu lalte kawmah a va chiah a,

¹⁵Huleh a kawmvah, Amah ka hung pekhe diing a, bang na hung pe diing viai? a va chi a. Huleh amahun dangka sawmthum piah diingin a kikhaampihta va.

¹⁶Hunungsiah chu amah matsahna diing lemtaang a hawlta hi.

¹⁷Huchi'n tanghou tol sohlouh ankuang luina ni masapen in, nungjuite Jesu kawmah a hung va, a kawmah, chiahkaan ankuang na neehna diing khoi munah hung guatsah le’ung na ut ei? a chi va.

¹⁸Huin ama’n, Khopi ah chiah unla, mi khat kawmah, Houtupa’n ka hun a naita a, ka nungjuite toh na inn ah chiahkaan ankuang ka nekhawm diing uh, a chi hi, va chi un, a chi a.

¹⁹Huleh nungjuite’n chu Jesu’n a hilh bangin a bawl va; huleh chiahkaan ankuang chu a bawl zouta uhi.

²⁰Huleh nitaahlam ahung hihin, nungjui sawmlenihte toh ankuang a uum va.

²¹Huleh a neeh laiun, ama’n, Chihtahzetin ka hung hilh ahi, Na lahva mi khat in kei ahung mansah diing hi, a chi a.

²²Huleh amahuh chu a lungdong mahmahta va, a kawmah, Lalpa, kei ka hi maw, a chi chiatta va.

²³Huin ama’n a dawng a, An kuang hung sawhpihpa ngei in kei ahung mansah diing hi.

²⁴Mihing Tapa chu a tanchin kigial bang jelin a pai diing ahi; hizongleh mihing Tapa mansah diingpa tung a gih hi! hupa chu ana pianglou hileh amah diingin a hoihzaw diing hi, a chi a.

²⁵Huin a mansahtupa Juda in a dawng a, Houtupa, kei ka hi maw? a chi a. Ama’n a kawmah, Nangma'n na chita hi, a chi a.

²⁶Huleh an a neeh laiun, Jesu’n tanghou a la a, a vangpiah a, a balkeeh a, huleh a nungjuite a pia a, La unla, ne un; hichu ka tahsa ahi, a chi a.

²⁷Huin nou a la a, kipaahthu a soi a, a kawmvah a pia a, Na bawnun dawn un;

²⁸Hichu sualnate ngaihdamna diing a mi tampite diinga pawt thuhun thah a ka sisan chu ahi.

²⁹Hizongleh ka hung hilh ahi, Ka Pa gam a nanguh toh a thah a ka dawn ni a tun masiah, tukal hi grepgah tui ka dawn kiit nawn sih diing hi, a chi hi.

³⁰Huleh la khat a sah zou un a pawt va, Olive taang ah a chiahta uhi.

³¹Huleh Jesu’n a kawmvah, Tu jan chiangin na bawnun, ka tunga lungthuai veh diing na hi uhi; ajiahchu, Belaampu ka jep diing a, huleh belaamhon chu a dalhjah diing uh, chih gelh ahi.

³²Hizongleh ka thohkiit nung chiangin Galili gam ah na ma vah ka chiah diing, a chi a.

³³Peter in a dawng a, a kawmah, Mi zousiah na tungah lungthuai veh zongle uh kei chu ka lungthuai sih diing, a chi a.

³⁴Jesu’n a kawmah, Chihtahzetin ka hung hilh ahi, Tu jan chiang leh, aahkhuan ma in thumvei na hung kihetmohbawl diing, a chi a.

³⁵Peter in a kawmah, Nang toh sikhawm diing hizongleng ka hung kihetmohbawl sih diing, a chi a. Hubangmahin nungjuite zousiah in zong a chi chiat uhi.

³⁶Huin Jesu chu amahuh toh mun khat, Gethsemani a chih uh a tung a, huleh a nungjuite kawmah, Paama ka va haamtei kalin hi-ah na tou un, a chi a.

³⁷Huleh ama’n Peter leh Zebedi tapate nih a pui a, lungsim in a mangbangta a.

³⁸Huin ama’n a kawmvah, Ka lungsim sihna khopin a lunggim hi; hi-ah um unla, hung veenpih un, a chi a.

³⁹Huin amah chu themkhat a chiah gamla deuh a, a khupboh a, Aw Pa, ahihtheihleh hi nou hung peelsah in; ahihvangin keimah thu hilouin nang thuthu hizaw heh, chi'n a haamtei a.

⁴⁰Huleh nungjuite kawmah a hung a, amahuh chu ihmuin ahung mu a, huin Peter kawmah, Nangun daahkal khat zong hung veenpih zoulou na hi uh maw?

⁴¹Heemna a na luut louhna diingun kiging zingin haamtei un; hagau in chu a peih a, tahsa chu a haat sih hi, a chi a.

⁴²A nihveina ah ava chiah kiit a, Aw Pa, ka dawn louha hi nou in hung peel thei lou ahihleh, nang thuthu hita heh, chi'n a haamtei a.

⁴³Huin a hung a, amahuh ihmuin ahung mu kiit a; ajiahchu a ihmut uh a suaah mahmah hi.

⁴⁴Huleh amahuh a nusia a, a chiah kiita, a thumveina ah a soi ngei soi in, a haamtei kiit a.

⁴⁵Huin a nungjuite kawmah a hung a, a kawmvah, Tuin chu ihmu unla khawldamta un, ngai un, a hun ahung tungta hi, Mihing Tapa hi misualte khutah matsah ahita.

⁴⁶Thou unla, i chiah diing uh; en un, ahung mansahtu diing ahung tungta hi, a chi hi.

⁴⁷Huleh a soi laiin, en un, sawmlenihte laha khat, Juda chu, siampu lalte leh upate kawma kipat, mipi nasatah mai namsaau leh khetbuuh tawite toh a hungta a.

⁴⁸Huleh a mansahtu diingpa in amahuh chiamchihna a hilh masa a, Ka tawp penpen amah ahi diing hi; amah chu man un, chi'n.

⁴⁹Huleh ama’n chu Jesu ahung zuanpah a, Chibai, Houtupa, a chi a; huin amah chu a tawp a.

⁵⁰Huleh Jesu’n a kawmah, Lawm, bang diinga hung na hiai? a chi a. Huin amahuh a hung va, Jesu tungah khut a ha va, a manta uhi.

⁵¹Huleh ngai in, Jesu umpihte laha mi khat in a khut in a sawh a, a namsaau a doh a, siampu lal suaahpa a saat a, a bil a saatkhiahsah hi.

⁵²Huin Jesu’n a kawmah, Na namsaau a koihna ah koih kiit in; ajiahchu namsaau pan photmah namsaau maha si diing ahi uhi.

⁵³Tuin zong angel saanggup mun sawmlenih sanga tamzaw hung sawlsah diing a ka Pa kawma ngen thei lou hung sa na hi uh maw?

⁵⁴Hizongleh huchi hitaleh, Pathian lehkhathu hitobanga hung um ngei diing chu bangchi'n a taangtung theita diai? a chi a.

⁵⁵Hu daahkal mahin Jesu’n mipite kawmah, Guta man diing bang jenin, namsaau leh khetbuuh tawiin kei man diingin na hung u'maw? Nichin in Pathian biahinn ah thuhilh in ka tou a, na hung man sih va.

⁵⁶Hizongleh zawlnei lehkhathu ahung taangtun theihna diing a hite zousiah hung um ahi, a chi a. Huin nungjuite zousiah in a nusia va, a taita uhi.

⁵⁷Huleh Jesu mantute’n amah chu siampu lalpen Kaiapha inn a lehkhagialtute leh upate umkhawmna ah a pui va.

⁵⁸Hizongleh Peter in siampu lalpen innpi dongin gamlatahin a jui a, huin a va luut a, a tawpna heet tum in veengtute lahah a va tou a.

⁵⁹Huleh siampu lalte leh upate leh vaaihawmte zousiah in, Jesu chu a thah theihna diingun heetpihtu dihlou a hawl va;

⁶⁰Hizongleh a mu sih uh; ahi, heetpihtu dihlou tamtah ahung vang un, a mu tuan sih uh. A tawpah heetpihtu dihlou nih a hung va,

⁶¹Hi Pa’n Pathian biahinn susia a ni thum sunga bawl kiit thei ka hi, a chi hi, a chi va.

⁶²Huin Siampu lalpen chu a dingdoh a, a kawmah, Bangmahin na dawng sih maw? hite hung heehna bangchidan ahiai? a chi a.

⁶³Hizongleh Jesu chu a haam keei sih a. Huin siampu lalpen in a kawmah, Pathian hing min in ka hung vau ahi, Pathian Tapa Khrist na hihleh hih louh hung hilh in, a chi a.

⁶⁴Jesu’n a kawmah, Na chita hi: himahleh ka hung hilh ahi, Tunung chiangleh mihing Tapa silbawltheihna jiatlama tou leh, vaan mei tunga hung na mu diing uhi, a chi a.

⁶⁵Huin siampu lalpen in a puan a botkeeh a, Pathian a soisia hi; heetpihtu dang bang diing i chi nalai diai? ngai un, Pathian a soisiatna chu tuin na ja uhi.

⁶⁶Bang na chi ngaih viai? a chi a. Amahun a dawng va, Si taah ahi, a chi va.

⁶⁷Huin a maaitang ah chil a siat va, a tuum va, huleh a dangte’n a khutpeeh un a beeng va,

⁶⁸Nang Khrist, hung hilh in, koi ahiai ahung beeng? a chi uhi.

⁶⁹Huleh Peter chu polamah huang sungah a tou a, huleh nungaah khat a kawmah a hung a, Nang zong Galili mi Jesu toh lawikhat na hi, a chi a.

⁷⁰Hizongleh ama’n chu, Na thusoi ka he sih, chi'n a bawnva ma ah hemoh a kipang a.

⁷¹Huin innliima ava pawt tahin nungaah dang in amah chu ana mu-a, hu mun a umte kawmah, Hi mipa zong Nazareth Jesu kawma um ahi, a chi a.

⁷²Huin ama’n, Hupa zaw ka he sih, chia kichiam in a kiheetmohbawl kiitta hi.

⁷³Huleh tomkhat zouin hu mun a dingte a hung va, Peter kawmah, Nang zong a lahva khat na hi ngei mei; ajiahchu na haam in a kihe hi, a chi va.

⁷⁴Huin ama’n, Hupa chu ka he top sih, chi'n haamsia kilohin a kichiamta a. Huin aah a khuangpahta hi.

⁷⁵Huleh Peter in Jesu thusoi, aahkhuan ma in thumvei na hung kiheetmohbawl diing, a chih chu ahung hedohta a. Huin polam ah a pawt a, a kap huthutta hi.