Read Simte MATTHAI 28 Bible Online

MATTHAI 28 - Simte bible

MATTHAI 28

¹Khawlni beikuan, hapta ni masapen diing khua ahung vaah kuanin, Mari Magdalene leh Mari dang chu haan en diingin a hung va.

²Huleh ngai in, zil nasatahin ahung liing a; ajiahchu Lalpa angel vaan apatin ahung kumsuh a, huleh haan kot apat suang a liihkhia a, a tungah a touta hi.

³A meel kilatdan chu kawlphe bangmai ahi a, a puansilh chu vuuh bangin a vaam hi.

⁴Huleh amah a lau jiahun veengtute chu a kithing va, misi bangin ahung umta uhi.

⁵Huin angel in numeite a houpih a, a kawmvah, Lau sih un; Jesu kilhbeh a um chu na hawl uh chih ka he hi.

⁶Amah hi-ah a um sih; ajiahchu ama’n a soi bangin a thouta hi. A lupna mun hung en mah un.

⁷Huleh kintahin chiah unla, nungjuite kawmah, Misi lah apatin a thou kiitta; huleh, ngai un, Galili gam lamah na ma vah a chiah hi, hu mun ah amah na mu diing uh, chi'n va hilh un; ngai un, Ka hung hilh zouta hi, a chi a.

⁸Huin amahuh chu lau leh kipaah mahmah kawmin, haan apatin kintahin a chiah va; huleh a nungjuite va hilh diingin a taita va.

⁹Huleh a nungjuite va hilh diing a a chiah laiun, ngai in, Jesu’n amahuh a tuaah a, Chibai, a chi a, Huin a hung va, a keengte tu in a bia uhi.

¹⁰Huin Jesu’n a kawmvah, Lau sih un; chiah unla, ka unaute Galili gam a chiah diingin va hilh un, hu mun ah ahung mu diing uhi, a chi a.

¹¹Huleh amahuh a chiah laiun, ngai in, veengtute khenkhat khopi sungah a hung va, siampu lalte kawmah sil umdan zousiah a va hilh va.

¹²Huleh upate toh a kikhop va a kihoutuaah zohun, sepaihte kawmah sum tampi a pia va,

¹³A kawmvah, Jan in, ka ihmut kal un, a nungjuite a hung va, amah ana guta uh, chi un.

¹⁴Huleh gamoptu’n ana jah taahleh, keiun amah ka heem diing va, nanguh ka hung hunkhe nadiing uh, a chi va.

¹⁵Huchi'n sum chu a la va, amahuh a hilh bang ngeiun a bawlta uh; huleh hi thu chu Juda mite lahah tuni tanin a kisoi nalai hi.

¹⁶Huin nungjui sawmlekhatte chu Galili gam ah Jesu’n a guatsah taang ah a chiah va.

¹⁷Huleh amah a muh tahun chibai a buuh va; hizongleh khenkhat in a ginglel uhi.

¹⁸Huin Jesu chu a kawmva hung in amahuh a houpih a, Vaan leh lei a thuneihna zousiah ka kawmah piah ahita.

¹⁹Hujiahin chiah unla, nam chin a mi nungjui in siam unla, Pa leh Tapa leh Hagau Siangthou min in baptis un;

²⁰Thu ka hung piah zousiah jui diingin thuhilh un; huleh ngai un, kei bangchihtanin, khovel tawp dongin na kawmvah ka um diing hi, a chi hi. Amen.