Read Simte MATTHAI 4 Bible Online

MATTHAI 4 - Simte bible

MATTHAI 4

¹Hu nungin Jesu chu diabol heema um diingin gamdai ah Hagau puiluut in a umta a.

²Huleh suun sawmli leh jan sawmli an ngawla a um nungin a gil ahung kialta a.

³Huin heemtu chu a hung a, a kawmah, Pathian Tapa na hih leh hi suang te tanghou suaah diingin thu pia in," a chi a.

⁴Hizongleh ama’n a dawng a, Mihing tanghou chauh in a hing sih diing a, Pathian kama thu chin pawt in a hing zaw diing chih gelh ahi, a chi hi

⁵Huin diabol in amah chu khopi siangthou ah a puitou a, Pathian biahinn siipzum ah a koih a,

⁶Huleh a kawmah, Pathian Tapa na hih leh kikekhesah in; ajiahchu hichibanga gelh ahi, Ama’n na tungtaang thu ah a angelte thu a pe diing a, a khut un ahung dom diing uh; huchilou inchu na keeng in suang khat na suikha zenzen diing, a chi a.

⁷Jesu’n a kawmah, Lalpa na Pathian ze-et sin chih gelh ahi jel hi, a chi a.

⁸Huleh diabol in amah chu taang saangpi khat tungah a pui kiit a, khovel lalgam zousiah leh a loupina uh a ensah a;

⁹Huleh a kawmah, Khupbohin hung be lechin hite zousiah ka hung pe diing hi, a chi a.

¹⁰Huin Jesu’n a kawmah, Hitah apatin chiah mang in, Setan; Lalpa na Pathian chu na biah diing a, amah nna chauh natoh diing ahi, chih gelh ahi, a chi hi.

¹¹Huzohin diabol in a nuseta a, huleh ngai in, angelte a hung va, a nna a tohsahta uhi.

¹²Huchi'n John ankuang ah a khum uh chih Jesu’n a jah tahin Galili gam lamah a chiahta a.

¹³Huleh Nazareth khua nusia in, Zebulon leh Nephthalim gamkaih sunga um tuipi gei a um Kapernaum khua ah a va teengta hi.

¹⁴Zawlnei Isaiah in hichibanga ana thusoite ahung taangtun theihna diingin ahi,

¹⁵Tuipi lama Jordan gaal a, Zebulon gam leh Nephthalim gam, Jentelte Galili;

¹⁶Mial a tou mite’n vaah loupitah a mu uh; huleh sihna gam leh liima toute tungah vaah ahung suaahta hi, a chih chu, chi'n.

¹⁷Hu huna kipanin Jesu in, Kisiih un; ajiahchu vaan lalgam a naita hi, chi'n thusoi a panta a.

¹⁸Huleh Jesu’n, Galili tuipi geia a vaah laiin, Peter kichi Simon leh, a sanggampa Andru tuipi a leensep a um a mu a; ajiahchu amahuh ngaman mi him ahi uhi.

¹⁹Huleh ama’n a kawmvah, Hung jui un, mihing mantuin ka hung siam diing, a chi a.

²⁰Huleh amahun a leente uh nusepahin amah a juita uhi.

²¹Huleh hu a kipana chiah jelin, unau dang nih Zebedi tapate Jakob leh a sanggampa John chu a pa uh Zebedi toh kuang sunga a leente uh phoh a um a mu a; huleh amahuh a kou hi.

²²Huleh amah un kuang leh a pa uh a nusepah va, amah a juita uhi.

²³Huleh Jesu chu Galili gam pumpi ah a vaah lehleh a, a kikhopna inn bang vah thu a hilh a, lalgam tanchinpha soi in, mite laha natna chinteng leh damlouhna chinteng a sudam jel hi.

²⁴Huleh Syria gam pumpi ah a min a thangta a; huleh amahun natna chi tuamtuam a damlou zousiah leh dawi matte, sibup veite leh zengte a kawmah ahung pui va, ama’n ana sudam jel hi.

²⁵Huleh Amah chu Galili apat bang, Dekapoli apat bang, Jerusalem apat bang, Judia apat bang leh Jordan gallam apat banga hung mipi nasatahin a jui uhi.