Read Simte MATTHAI 5 Bible Online

MATTHAI 5 - Simte bible

MATTHAI 5

¹Huleh mipite a muh in taang ah a kaltou a, a tou a, a nungjuite a kawmah a hung va;

²Huleh ama’n a kam a kaah a, amahuh thu a hilh a;

³Hagau a gentheite a hampha uhi: vaan lalgam amahuh diing ahih jiahin.

⁴Lungngaite a hampha uhi: hamuanna um diing ahih jiahun.

⁵Thunuaigolhte a hampha uhi; Leigou luah diing ahih jiahun.

⁶Dihtatna lama gilkial a dangtaahte a hampha uhi: tai diing ahih jiahun.

⁷Zahngai theite a hampha uhi: zahngaihna tang diing ahih jiahun.

⁸Lungsima siangthoute a hampha uhi; Pathian mu diing ahih jiahun.

⁹Lemna siamtute a hampha uhi; Pathian tate chih a um diing ahih jiahun.

¹⁰Dihtatna jiaha soih a umte a hampha uhi; vaan lalgam amahuh a diing ahih jiahin.

¹¹Mi’n keimah jiaha ahung housiat va, ahung soih va, zuau a gilou chintenga ahung heeh hun chiangun na hampha uhi.

¹²Nuam unla, nasatahin kipaah un; vaan ah na kipaahman diing uh a tam mahmah ngal a; na ma va zawlnei umte zong hitobangin ana sawi veu uhi.

¹³Lei chi na hi uh; hizongleh chi chu data leh bangin a kisu-al kiitta diai? huchia’n a panna a umta sih diing a, paihdoh a mite totchil diing ahi giapta hi.

¹⁴Khovel vaah na hi uh; taang tunga khopi um chu a kiphual thei sih hi.

¹⁵Mi’n thaumei de in loh a khuhkhum ngei sih uh, a tunna ah a koih zaw uhi; huchi'n inn sunga mi um zousiah a salhvaah hi.

¹⁶Hutobangin na vaah uh mi mitmuh in vaah heh, huchi'n amahun na natoh hoihte uh a mu diing va, na Pa uh vaan a um chu a paahtawi thei diing uhi.

¹⁷Daan thu aha, zawlneite thu aha sumang diing a hung ahi chi'n hung ngaihtuah sih un; a sumang diing a hung ka hi sih a, sutaangtung diing a hung ka hi zaw hi.

¹⁸Chihtahzetin na kawmvah ka soi ahi, Vaan leh lei a man masiah daan thu a sutvom neucha aha, thaivom neuchakhat zong a mang sih diing, a bawn a, a taangtun kim masiah in.

¹⁹Hujiahin koipouh hi thupiah neupente laha khat mai zong susia a, hutobanga bawl diing a mite hilh chu vaan lalgam ah mi neupen ahi diing hi; hizongleh koipouh jui a, huleh hutobanga jui diing a mite hilh chu vaan lalgam ah mi lian a chi diing uhi.

²⁰Ajiahchu ka hung hilh ahi, Na dihtatna un lehkhagialtute leh Pharisaite dihtatna a khup louh inchu vaan lalgam ah na luut top sih diing uhi.

²¹Malai mite kawma, 'Tual na thah louh diing ahi; huleh koipouh tual that chu vaihawmna lauthawnghuaitah ah a um diinguh, kichi na zata uhi;

²²Hizongleh ke’n chu na kawmvah ka soi ahi, Koipouh a jiah bei a, a unau tunga lungthah chu vaihawmkhumna lauthawnghuaitah ah a um diing; huleh koipouh a unau kawma, 'Raka (Man louh),' chi chu vaihawmtute vaihawmkhumna lauhuaitah ah a um diing; huleh koipouh, 'Nang mingol,' chitu chu gawtmun mei diila paih lauthawnghuaitah ah a um diing uhi.

²³Hujiahin maitaam bula silpiah diing tawia na hung laitah a na unau in na tungah lunghih louhna a nei chih na heetdoh leh,

²⁴Na silpiah diing chu hu maitaam ma ah nusia inla chiah in; huleh na unau toh kilem masaphot inla, huzohchiangin hung inla, na silpiah diing chu pia in.

²⁵Na langpa toh lampi a na chiah laiin kitam zohin; huchilou inchu na langpa’n vaihawmtu ahung mansah diing a, vaihawmtu’n mimantu lian kawmah ahung pekhe diing a, huleh mimantu lian in suangkul ah ahung khumkha diing hi.

²⁶Chihtahzetin ka hung hilh ahi, Paihsa san khat tana na piah kim masiah hua kipanin na pawtdoh het sih diing hi.

²⁷Malai mite kawma, Na aangkawm louh diing ahi, chia kisoi na zata uh;

²⁸Hizongleh ke'n chu na kawmvah ka soi ahi, Koipouh numei enlahtaha en in a lungsimah amahnu toh a aangkawm zouta ahi.

²⁹Huleh na mit jiatlam in ahung sualsah leh kheidoh inla paai mai in; ajiahchu na tahsa pumpi gawtmuna paih ahih sangin na tahsa peng khat manthai chu nang diingin a hoihzaw hi.

³⁰Huleh na khut jiatlam in ahung sualsah leh saattan inla paai mai in; ajiahchu na tahsa pumpi gawtmuna paih ahih sangin na tahsa peng khat manthai chu nang diingin a hoihzaw hi.

³¹Mi koipouh in a ji a khul leh khulna lehkha pia heh, ana kichi hi.

³²Hizongleh ke'n chu na kawmvah ka soi ahi, Koipouhin mi toh lupkhawm jiah hilou a, a ji a khul leh amahnu chu a aangkawmsah ahi; huleh koipouh hu khulsanu nei chu aangkawm ahi.

³³Huchiangleh, malai mite kawma, Kihaahsial sih un, amahvang na kichiamnate Lalpa kawmah taangtun zaw in, chia kisoi na zata uh;

³⁴Hizongleh ke'n chu na kawmvah ka soi ahi, Kihaahsial mawngmawng sih un; vaan louin kihaahsial sih un; ajiahchu hichu Pathian laltouphah ahi:

³⁵Huleh lei louin kihaahsial sih un; ajiahchu hichu a keeng ngahna ahi: Jerusalem louin kihaahsial sih un; ajiahchu hichu kumpipa loupi khopi ahi.

³⁶Na lutang louin kihaahsial sin; ajiahchu samzang khat zong na kaangsah in na vomsah thei sih hi.

³⁷Hizongleh na soi chu, Ahihleh hi; Ahihlouhleh hilou, hisah mai in; ajiahchu hi val chu gilou apat hung pawt ahi.

³⁸Mit luang in mit, ha luang in ha, ana kichi na zata uh.

³⁹Hizongleh ke'n chu na kawmvah ka soi ahi, Migilou thuh sih un; hizongleh koipouh in na ngeiphe jiatlam a beh leh a lehlam zong doh zaw in.

⁴⁰Huleh mi koipouh in na tunga thusia bawl a, na puannaah laah a tup leh na puanjal zong la sah ngal in.

⁴¹Huleh koipouh meel khat chiah diing a hung phuut photmah kawmah amah toh meel nih chiah khawm un.

⁴²Na kawma ngen chu pia inla, huleh ahung thunglaah ut chu kiheimangsan sin.

⁴³Na innveengte lungsiat inla, na meelmate hua in, kichi na zata uhi.

⁴⁴Hizongleh ke'n chu na kawmvah ka soi ahi, Na meelmate uh lungsiat unla, haamsia hung lohte vangpiah unla, ahung mudahte diingin sil hoih bawlsah unla, huleh ahung bawlsete leh ahung suduhdahte diingin haamteisah un.

⁴⁵Huchi'n na Pa uh vaan a um tate na hi thei diing uhi; ajiahchu ama’n migiloute leh mihoihte tungah a ni a suaahsah a, huleh midihtatte leh midihtatloute tungah zong guah a zusah hi.

⁴⁶Ajiahchu nanguh hung lungsiatte chauh na lungsiat uleh kipaahman bang ahiai na muh diing uh? siahdongte’n zong huchibanga bawl ve hilou ahi viai mah?

⁴⁷Huleh na unaute uh chauh chibai na buuh uleh midang sanga bang ahiai na bawltam tuan uh? siahdongte’n zong huchibanga bawl ve hilou ahi viai mah?

⁴⁸Hujiahin vaan a um na Pa uh a hoihbukim mah bangin nanguh zong hoihbukim un.