Read Simte MATTHAI 6 Bible Online

MATTHAI 6 - Simte bible

MATTHAI 6

¹Na sil hoih bawlte uh mi muh diing a, a ma va bawl lou diingin pilvaang un; huchilou inchu na Pa uh vaan a um kawmah muh diing kipaahman na nei sih diing uh.

²Hujiahin mi kawma sil na piah chiangun milepchiahte’n, mi phat a loh theihna diing va kikhopna inn bang, kholai banga ahih veu bangun, na ma vah pengkuul muut sih un. Chihtahzetin ka hung hilh ahi, Amahun a kipaahman uh a mu zouta uh.

³Hizongleh nang chu mi kawma sil na piah chiangin, na khut jiatlam hih chu na khut veilam hesah sin:

⁴Huchi’n na silpiah chu a guuhin a um thei diing a; huleh na Pa a guuha hung mupa in phuanglaahtahin ahung dit diing hi.

⁵Huleh na haamtei chiangun milepchiahte bangin na hih diing uh ahi sih; ajiahchu amahun mi’n a muh theihna diingin kikhopna innte, kotzing ningkawite banga dingin a haamtei ut sese uh; chihtahzetin ka hung hilh ahi, Amah un a kipaahman uh a muta uhi.

⁶Hizongleh nang chu na haamtei chiangin na pindan sungah luut inla, na kot khaah inla, a guuha um na Pa kawmah haamtei in; huchi'n na Pa a guuha hung mupa in phuanglaahtahin ahung dit diing hi.

⁷Hizongleh na haamtei chiangun Jentelte bang in soi nonnon sih un; amahun chu a haam tam jiah va zaaha um diingin a kingaihtuah uh.

⁸Hujiahin amahuh bang sih un: ajiahchu na Pa un amah na nget ma un bang silte ahiai na mamoh uh a he hi.

⁹Huleh nanguh chu hichibangin haamtei un: Ka Pa uh vaan a um, na min kizahtaat heh.

¹⁰Na lalgam hung tung heh. Na deihzawng vaan a a kibawl bangin, leiah zong kibawl heh.

¹¹Ka niteng an neeh uh tuni in hung pia in.

¹²Ka leibate uh ka ngaihdam bangun ka batte uh hung ngaidam in.

¹³Heemna ah hung puiluut sinla, gilou lahah hung hunkhe zaw in: lalgamte, silbawltheihnate, loupinate, kumtuanga nanga ahih jiahin. Amen, chi'n.

¹⁴Mi a tatsualnate uh na ngaihdam uleh, na Pa uh vaan a um in zong nanguh ahung ngaidam diing hi.

¹⁵Hizongleh mi a tatsualnate uh na ngaihdamlouh uleh na Pa un zong na tatsualnate uh ahung ngaidam sih diing hi.

¹⁶Huchiangleh an na ngawl chiangun milepchiahte bangin ngui meel po sih un; amahun chu an ngawla a kilat theihna diingun a maaisuah uh a tuamsah veu uh; chihtahzetin ka hung hilh ahi, amahun a kipaahman uh a muta uhi.

¹⁷Hizongleh nang chu an na ngawl chiangin na lu sathau nuh inla, na maai phiat in.

¹⁸Huchi'n na Pa a guuha um mitmuh ah loungal mihing mitmuh a angawl na bat louhna diingin; huleh na Pa a guuha hung mupa in phuanglaahtahin ahung pethuh diing hi.

¹⁹Lei a leikha leh tui-eeh in a neehsiatna ah leh, gutate’n a pheet vang va a guuh theihna vah gou kikhol sih un;

²⁰Hizongleh vaan ah, leikha leh tui-eeh in a neehsiat louhna leh, gutate’n a pheet vang va a guuh louhna vah gou kikhol zaw un.

²¹Ajiahchu na gou uh umna photah na lungsim u’zong a um diing hi.

²²Sapum vaahna chu mit ahi; hujiahin na mit a dih leh na sapum a vaah veh diing hi.

²³Hizongleh na mit a dih louh inchu na sapum a mial veh diing hi. Hujiahin na sunga vaah chu mial hitaleh hu mial chu nasa na’n chia!

²⁴Mi koimah in houtu nih nna a tongkhawm thei sih; ajiahchu khat mudahin khat a lungsiat diing a, ahihlouhleh khat gum in khat a simmoh diing hi. Pathian leh sum nna na tongkhawm thei sih diing uhi.

²⁵Hujiahin ka hung hilh ahi, Bang ahiai ka neeh diing, bang ahiai ka dawn diing, chi'n na hinna uh diing leh bang ahiai ka silh a ka teen diing chi'n na tahsa uh diing lunghimoh sih un. Neeh diing sangin hinna a luulzaw sih eimah? huleh silh leh teen sangin tahsa a luulzaw sih eimah?

²⁶Tungleeng vate en un, buh a tuh sih va, aat zong a aat sih uh, huleh buhinn ah zong a sunglut sih uh; ahihvangin na Pa uh vaan a um in amahuh a vaah hi. Nanguh chu amahuh sanga nasataha luulzaw hilou na hi viai mah?

²⁷Nanguh lahah kua’n ahiai kingaihtuah jiaha a dung tongkhata behlap thei?

²⁸Huleh silh leh teen thu a bang diinga lunghimoh na hi viai? gam a lili paahte khandan ngaihtuah un; tong laha tonggim sih va, pat zong a kheeh sih uh;

²⁹Hizongleh ka hung hilh ahi, Solomon hilhial zong a loupina zousiaha a kizepin hite khat tuhin zong zep ahi zou sih hi.

³⁰Huchi'n gam a hampa tunia hing a, zinga meikhuuh a paihluut diing bawn Pathian in a huchi zep leh, Aw nanguh gintawmte, ama’n, nanguh husangin ahung zeemzaw tham sih diai mah?

³¹Hujiahin bang ahiai i neeh diing a, bang ahiai i dawn diing; ahihlouhleh bang ahiai i silh diing, chi'n lunghimoh sih un.

³²(Ajiahchu hi silte zousiah Jentelte’n a hawl uhi), hi silte zousiah na mamoh uh chih na Pa uh vaan um in a he hi.

³³Hizongleh nangun chu Pathian gam leh a dihtatna hawl masa un; huleh hi silte zousiah piahbeh na hi diing uhi.

³⁴Hujiahin zinga diingin lunghimoh sih un; ajiahchu jing in amah a diing ahung kingaihtuah tawm diing hi. Ni khat gimthuaah chu ni khat diingin a hun ahi.