Read Simte MATTHAI 7 Bible Online

MATTHAI 7 - Simte bible

MATTHAI 7

¹Soisel sih un, soisela na umlouhna diingun.

²Na soisel bangmah un soiselin na um diing uh; huleh na tehna ngeimah un ahung tehsah kiit diing uhi.

³Huleh bang diinga na mit a innkam ngaihtuah loua, na unau mit a chiangthem um muthei na hiai?

⁴Ahihlouhleh bangchi'n ahiai na unau kawma, Na mit a chiangthem hung lakhesah in, na chih theih diing? ngai in, nang mit ngei ah innkam a um hi.

⁵Nang milepchiah, nangmah mit apat innkam chu lakhe masa in; huchi’n na unau mit a chiangthem laahdoh diing chu na muchian thei diing hi.

⁶Uite kawmah sil siangthou pe sih unla, voh ma-ah zong na tuikep suang uh paai sih un; amahun hute chu a keeng un a chilse diing va, huleh hung kiheiin nanguh ahung baljahkha diing uhi.

⁷Ngen un, piahin na um diing uh; hawl un, na mu diing uh; kiu un, honsah in na um diing uhi.

⁸Ajiahchu a ngen taphot in a tang va, a hawl taphot in a mu va; huleh a kiu taphot chu honsah in a um diing hi.

⁹Ahihlouhleh na lahvah kua’n ahiai a tapa in tanghou ngen henla hileh suang pe diing?

¹⁰Ahihlouhleh nga ngen henla hileh guul pe diing?

¹¹Huchi ahihleh, nanguh migilou in bawn na tate uh sil hoih piahna taang na heet un chu, na Pa uh vaan a um in a kawma ngente sil hoih petham lou diing ahiai mah?

¹²Hujiahin sil zousiah mi’n na tungva a bawl na deih photmah uh, nangun zong hutobangin a tungvah bawl un; huchu daan thu leh zawlneite thu ahi.

¹³Kot geeng ah luut un; ajiahchu manthaina lam chu a kot a gol a, a lampi zong a lian hi, huleh hua luutte chu tam zong a tam uhi:

¹⁴Hinna a chiahna kot chu a geeng a, a lampi zong a neu a, huleh a mute zong a tawm uhi.

¹⁵Zawlnei tahloute na lahva belaam vun silha hung a, hizongleh a sungnunglam va ngei haangsantah hingalte lahah pilvaang un.

¹⁶Amahuh chu a gah un na he diing uhi. Mi’n khau lingnei gui ah grep gah a lou ngei viai mah, ahihlouhleh lenling ah zong theipi a lou ngei viai mah?

¹⁷Huchimahbangin sing hoih photmah a gah hoih jel a; hizongleh singsia chu a gah a se veu hi.

¹⁸Singhoih gah a se thei sih a, singsia zong a gah hoih thei boh sih hi.

¹⁹Sing chin gah hoih lou taphot chu a phuuh va, mei ah a paai uh.

²⁰Hujiahin amahuh chu a gah un na he diing uhi.

²¹Lalpa, Lalpa, hung chi nazong vaan lalgam ah a luut sih diing uh; hizongleh ka Pa vaan a um deihzawng bawlte chu a luut diing uhi.

²²Hu ni chiangleh mi tampi’n, Lalpa, Lalpa, na min in thu ka soi uh hilou ahiai mah? na min in dawite ka nohdoh un, na min in silmah tampi ka bawl uh hilou ahiai mah? a chi diing uhi.

²³Huchiangin ke’n a kawmvah, Nanguh bangchihmahin ka hung he ngei sih hi; sil gilou bawlte haw, ka kawm apatin chiah mang un, ka chi diing hi.

²⁴Hujiahin koipouh hi ka thusoite za a, jui chu mipil suangpi tunga inn bawl toh ka tehkhin diing hi;

²⁵Guah ahung zu a, tui ahung liana, huih ahung nunga, hu inn chu ahung muut vah a; hizongleh a puuh sih; suangpi tunga leptouh ahih jiahin.

²⁶Huleh mi koipouh hi ka thusoite za a, jui lou photmah chu, mi ngol sehneel tunga inn bawl toh ka tehkhin diing hi:

²⁷Guah ahung zu a, tui ahung lian a, huih ahung nung a, hu inn chu ahung nam vah a; a puuhta; hu a puuh git chu a ngaih ngeel hi, a chi a.

²⁸Huleh hichi ahung hi a, Jesu’n hite a soi zohin, mipi’n a thuhilh chu limdang a sa mahmah uhi.

²⁹Ajiahchu ama’n lehkhagialtute bang loua, thuneitah bangin amahuh thu a hilh hi.