Read Simte MATTHAI 8 Bible Online

MATTHAI 8 - Simte bible

MATTHAI 8

¹Huleh taang a kipata ahung paisuh in mipi nasatah in amah a jui va.

²Huleh ngai in, miphaah khat a kawmah a hung a, amah chibai a buuha, Lalpa, na ut in chu na hung susiangthou thei hi, a chi a.

³Huin Jesu’n a khut aha a, a khoih a, Ka ut hi, siangthouta in, a chi a. Huin a phaah chu a siangthoupah ngal hi.

⁴Huleh Jesu’n a kawmah, Koimah na hilh louh diing ahi; hizongleh chiah inla siampu va kimusah in, huleh amahuh heetsahna diing a Mosi’n thu a piah sillat ding chu va pia in, a chi hi.

⁵Huleh Jesu Kepernaum a, a luut in, a kawm ah sepaih zahoutu khat a hung a, amah ahung ngen a,

⁶Lalpa, ka suaahpa chu zeng in inn ah a lum a, nasataha suhnat in a um hi, a chi a.

⁷Huin Jesu’n a kawmah, Ka hung diing a ka sudam diing, a chi a.

⁸Sepaih zahoutu’n a dawng a, Lalpa, ka inn sunga na hung luutnataah ka hi sih hi; thu chauh soi in, huchi'n ka suaahpa chu a dam mei diing.

⁹Ajiahchu kei zong thuneihna nuaia um ka hi a, ka nuaiah sepaihte a um va; huleh khat kawmah, Chiah in, ka chihleh a chiah a, huleh a dang kawmah, Hung in, ka chihleh a hung a; huleh ka suaahpa kawmah, hi bawl in, ka chihleh a bawl jel hi, a chi a.

¹⁰Jesu’n hi thu a jah tahin, limdang a sa a, amah juite kawmah, Chihtahzetin ka hung hilh ahi, Israelte laha zong hichilawm a ginna lian ka mukha sih.

¹¹Huleh ka hung hilh ahi, Suahlam leh tumlam apatin mi tampi a hung diing va, vaan gam ah Abraham toh, Isaak toh, Jakob toh a toukhawm diing uhi.

¹²Hizongleh lalgam tate chu polam mial ah paihdoh in a um diing uh; huah chu kah leh hagawi a um diing hi, a chi a.

¹³Huin Jesu’n sepaih zahoutu kawmah, Chiahta in; na gintaat bangin na tungah hung tungta heh, a chi a. Huleh a suaahpa chu hu daah mahin a damta hi.

¹⁴Huleh Jesu chu Peter inn sungah a luut a, a ji nu khosih a lum a mu a.

¹⁵Huin ama’n amahnu khut a khoih a, a khosih a phata hi; huin amahnu chu ahung thou a, a nna uh a tohsahta hi.

¹⁶Huleh nitaahlam ahung hihin a kawmah dawimatte tampi ahung pui va; ama’n a thu in dawite a nohdoh a, damlou zousiah a sudamta hi;

¹⁷Zawlnei Isaiah in, Amah ngei in i hatlouhnate a la a, i natnate a pua hi, chia a soi chu a taangtun theihna diingin.

¹⁸Chi’n Jesu in a kiimvela mipi nasatah a muh in, gaal lehlama chiah diing thu a pia a.

¹⁹Huleh lehkhagialtute khat a hung a, a kawmah, Houtupa, na chiahna photah ka hung jui diing, a chi a.

²⁰Jesu’n a kawmah, Si-aalte’n kua a nei va, tungleeng vate’n bu a nei uh; hizongleh mihing Tapa’n a lu ngahna diing mun a nei sih, a chi a.

²¹Huleh a nungjuite laha midang khat in a kawmah, Lalpa, va chiah a ka pa vui phot diingin hung phalsah in, a chi a.

²²Hizongleh Jesu’n a kawmah, Hung jui in, misi in a misi uh kivui u’heh, a chi hi.

²³Huleh kuang a a tuan in nungjuite’n a jui va.

²⁴Huleh, ngai in, tuipi ah huihpi nasatahin a nung a, hu tuikinawh in kuang chu ahung tuum a, hizongleh amah chu a ihmu a.

²⁵Huin a nungjuite chu a kawm a hung in amah a phawng va, Lalpa, hung hundam in, beimang diing hitalou ka hi u'maw, a chi va.

²⁶Huin ama’n a kawmvah, Gin tawmte haw, bang diinga lau na hi viai? a chi a. Huzohin a thou a, huihpi leh tuipi chu a vau a; ahung daai keeita hi.

²⁷Huin mite’n chu limdang a sa mahmah va, Hipa hi bangchibang mi ahiai le, huih leh tuipi nasanin a thu a man uh! a chi uhi.

²⁸Huleh gaal lehlam Gadara mite gam a tunin, dawimat mi nih, haan apata hungin amah ahung tuaah va, a lauhuai mahmah va, hulam chu koima'n a tawn thei sih uh.

²⁹Huleh, ngai in, amahun, Jesu, nang Pathian Tapa, keiuh leh nang bang ahiai kimatna i neih? hunchiam tunma a keiuh gawt diing a hitaha hung na hi maw? chi’n a kikou va.

³⁰Huleh a umna apat va gamla simah vohhon tampi a taa va.

³¹Huleh dawite’n a kawma ngen in, Na hung nohdoh leh, hu a vohhon sungah hung luutsah in, a chi va.

³²Huin ama’n a kawmvah, Chiah un, a chi a. Huleh amahuh chu a hungdoh va, vohhon sungah a luut va; huleh ngai in, hu vohhon chu kawl ah a taikhesuh va, tuipi ah a tailuut va, hu tui ah a sigamta uhi.

³³Huin a chingtute a tai va, khopi ah a chiah va, sil zousiah leh dawimatte tung a sil hung tungte bang a hilhta uh.

³⁴Huleh, ngai in, a khopumpi un Jesu tuaah diingin ahung pawt va; huleh, amah a muh un, a gam vapat pawt diingin nasatahin a ngen uhi.