Read Simte MATTHAI 9 Bible Online

MATTHAI 9 - Simte bible

MATTHAI 9

¹Huin amah chu kuang sungah a luut a, a gaalkai a, a khopi ah a luutta a.

²Huleh, ngai in, mi khat zenga damlou, lupna a lum, a kawmah ahung zawng va; huleh Jesu’n a ginna uh a muh in zenga damloupa kawmah, Tapa, lungmuangtahin um in; na sualnate ngaihdam ahita, a chi a.

³Huleh, ngai in, lehkhagialtute khenkhat in a lungsim un, Hipa’n Pathian a soisia hi, a chi va.

⁴Huleh Jesu’n a ngaihtuah uchu he in, Bang diinga na lungtang va sil gilou ngaihtuah na hi viai?

⁵Na sualte ngaihdam ahita, chih leh, Thou inla, keeng in chiah in, chih khoi a baihlamzaw diai? a chi a.

⁶Hizongleh mihing Tapa’n leitung ah sualte ngaihdam theihna a nei chih na heetna diingun, (zeng a damloupa kawmah) Thou inla, na lupna la inla, na inn ah chiahta in, a chi a.

⁷Huin amah chu a thou a, a inn ah a chiahta hi.

⁸Hizongleh mipi’n huchu a muh un, thum ah a sa va, huchibang bawltheihna mihingte kawma petu Pathian a paahtawita uhi.

⁹Huleh Jesu chu hu apatin a pai jel a, mi khat a min Matthai, siah piahna mun a tou a mu a; a kawmah, Hung jui in, a chi a, huleh a thou a, amah a juita hi.

¹⁰Huleh hichi ahung hi a, Jesu an ne diing a a tou leh, ngai in, siahdongtute leh misualte tampi hung in amah leh a nungjuite toh ankuang a uumkhawm uhi.

¹¹Huleh Pharisaite’n huchu a muh un, a nungjuite kawmah, Bang diinga na houtupa un siahdongte leh misualte toh an nekhawm ahiai? a chi va.

¹²Hizongleh Jesu’n huchu a jah tahin a kawmvah, Mi damte’n doctor a mamoh sih uh, damloute chauhin a mamoh uhi.

¹³Hizongleh chiah unla, Kithoihna deihlouin zahngaihna ka deih hi, chih umdan va zil un; ajiahchu midihtatte kou diing a hung ka hi sih a, misualte kisiihsah diing a kou a hung ka hizaw hi, a chi hi.

¹⁴Huin John nungjuite a kawmah a hung va, Bang diinga keiuh leh Pharisaite’n an ngawl veu unga, na nungjuite’n ngawl lou ahi viai? a chi va.

¹⁵Huin Jesu’n a kawmvah, Mouneitu a kawmva a um laisiah, moupuite a dah ngei uh maw? hizongleh mouneitu a lahva kipana laahmang ni ahung tung diing a, huchiangin an a ngawl diing uhi.

¹⁶Mi koimah in puan lui puan thah them in a phoh ngei sih uh, ajiahchu a phohna in puan chu a luaikeeh zaw diing a, ahung keeh zawsem diing hi.

¹⁷Mi koimah in uain thah savun thawl lui ah a thun ngei sih uh; huchilou inchu savun thawlte chu a pawhkeeh diing a, uain a kibo diing a, savun thawlte zong a segawp diing hi; hujiahin uain thah chu savun thawl thah ah a thun zaw va, huchi in a nihin a bit tuaah hi, a chi hi.

¹⁸Hi silte ama’n a kawmva a soi laiin, ngai in, vaihawmtu khat a hung a amah chibai ahung buuh a, Ka tanu tutahin a si hi; hizongleh hung inla, a tungah na khut nga lechin a hing mei diing, a chi a.

¹⁹Huin Jesu chu a thou a, amah a juita a, huleh a nungjuite’n zong a jui uhi.

²⁰Huleh, ngai in, numei khat, kum sawm leh kum nih sipawt a damlou, a nungah ahung pai a, a puan mong a khoih a.

²¹Amahnu’n a lungsim in, A puan chauh khoih leng, ka dam mei diing, chi'n a ngaihtuah ngal a.

²²Huin Jesu chu a kinunghei a, amahnu a mu a, Tanu, lungmuangtahin um in, na ginna in ahung damsahta hi, a chi a. Huleh hu numeinu chu hu daah apat a damta hi.

²³Huleh Jesu chu vaihawmtu inn sunga a luut in, silgingthei tumte leh mipi puaah vengvung a mu a,

²⁴A kawmvah, Hung ot un; naupangnu chu a si sih hi, ihmu ahi zaw, a chi a. Huin amah a nuihsan giap va.

²⁵Hizongleh mipite sawldoh a, a um nungin, a luut a, amahnu chu a khut in a tu a, huchi’n naupangnu chu ahung thouta hi.

²⁶Huin hi thu chu hu gam pumpi ah a thangsuaahta hi.

²⁷Huleh Jesu hutah apat a pawt in, mittaw nih in a jui va, David Tapa, ka tungvah zahngai in, chi'n a kikou va.

²⁸Huleh inn sunga a luut in, hu mittawte chu a kawmah a hung va; huin Jesu’n a kawmvah, hi bawl thei in na hung gingta uh maw? a chi a. Amahun a kawmah, Gingta e, Lalpa, a chi va.

²⁹Huin ama’n a mit uh a khoih a, Na gintaat bang un na tungvah tungta heh, a chi a.

³⁰Huin a mit uh ahung vaahta a; huin Jesu’n koima hesah lou diingin amahuh a khap a.

³¹Hizongleh amahuh chu a pawt va, hu gam pumpi ah a min a soithangta uhi.

³²Huleh amahuh a pawt laiun, ngai in, mi haamthei lou dawimat khat a kawmah ahung pui va.

³³Huleh dawi chu a nohdoh tahin, haamthei lou chu a hung haamta a; huin mipite’n thum ah a sa mahmah va, Israelte lahah hitobang sil a kimu ngei sih, a chi va.

³⁴Hizongleh Pharisaite’n chu, dawimangpa jala dawite a nohdoh ahi, a chita va.

³⁵Huleh Jesu’n a kikhopna inn bang va thuhilh in, lalgam tanchinpha chu soi in, damlouhna chinteng leh natna chinteng sudam in, khopi leh khoneute zousiah ah a vaahleh hi.

³⁶Hizongleh ama’n mipite a muh in, a chingtu bei belaamte banga, chau leh kithehdalh a, a um jiahun a hehpih mahmah a.

³⁷Huin ama’n a nungjuite kawmah, Buh laah diing a tam mahmah a, hizongleh a natongtute a tawm hi.

³⁸Hujiahin a buh la diing a natongtute hung sawldoh diingin buh Neitupa kawmah ngen un, a chi hi.