Read Simte MARK 10 Bible Online

MARK 10 - Simte bible

MARK 10

¹Huleh amah chu hu apat a kipandoh a, Judia gam kualsung Jordan gaal lampeh ahung tungta a; huleh mipite a kawmah ahung kikhawm kiit va; huchi'n ahih ngeimah bangin amahuh thu a hilh kiit hi.

²Huleh Pharisaite a kawmah ahung va, amah ze-etna diingin, Mi'n a ji a khul a siang ei? chi'n a dong va.

³Huleh ama’n a dawng a, a kawmvah, Mosi in nanguh bang thu ahung pia ei?’ a chi a.

⁴Huin amahun, Mosi in kikhulna lehkha gial a kikhul a phal hi, a chi va.

⁵Huin Jesu’n a dawng a, a kawmvah, Na lungtang khauh jiahun ahi ama’n hi thupiah nanguh diing a ahung na gelhsah.

⁶Hizongleh leilung kisiam chiila kipanin Pathian in amahuh pasal leh numei in a siam hi.

⁷Hi jiahin pasal in a pa leh a nu a nuse diing a, a ji a tu tinten diing;

⁸Huleh a nihun tahsa pumkhat ahung hita diing va; huchi'n nih hi nawn louin tahsa khat ahung hi zawta diing uh.

⁹Hujiahin Pathian in a gawmsa chu mihingin khen sih heh, a chi a.

¹⁰Huleh inn sungah a nungjuite’n hu thu mah amah a dong kiit va.

¹¹Huleh ama’n a kawmvah, Mi koipouh in a ji a khul a ji dang a neih leh a ji a aangkawmsan ahi.

¹²Huleh numei in a pasal a khul a pasal dang a neih leh a aangkawm ahi, a chi a.

¹³Huleh a khoih diingin naupang neute a kawmah ahung pui va; huleh a nungjuite’n ahung puite ana tai uh.

¹⁴Hizongleh Jesu’n hu a muh in a lungkim hial sih a, a kawmvah, Naupang neute ka kawmah hungsah unla, khap sih un; ajiahchu Pathian gam chu huchibang mite a diing ahi.

¹⁵Chihtahzetin ka hung hilh ahi, Mi koipouh naupang neu banga Pathian gam sang lou chu, a sungah a luut het sih diing, a chi a.

¹⁶Huin ama’n amahuh a pom a, a tung vah a khut a koih a, huleh a vangpiahta hi.

¹⁷Huleh lampi a chiah diing a a pawt laiin, mi khat ahung tai a, a ma ah a khupdin a, huleh a kawmah, Houtupa hoih, kumtuang hinna ka tan theihna diingin bang ahiai ka bawl diing? chi'n a dong a.

¹⁸Huin Jesu’n a kawmah, Bang diinga hoih hung chi na hiai? Khat chih louh hoih koimah a um sih, huchu Pathian ahi.

¹⁹Thupiahte na he vele, Aangkawm sin, tual that sin, Gu sin, Heetpihtu tahlouin pang sin, Mi heem sin, Na nu leh na pa zahbawl in, chihte, a chi a.

²⁰Huin ama’n a dawng a, a kawmah, Houtupa, hihaw zousiah chu ka naupan laia kipana ka juih a hita, a chi a.

²¹Huin Jesu’n amah a en a, a lungsiat a, a kawmah, sil khat na sam nalai hi; chiah inla, na neih photmah zuah inla, migentheite kawmah pia in, huchi'n vaan ah gou na nei diing; huleh hung inla, kros pua in hung jui in, a chi a.

²²Huin amahpa chu hu thu ah a maai ahung mualta a, huleh lunggim tahin a chiahmangta hi, sum tampi nei mi ahih jiahin.

²³Huleh Jesu’n a en kimvel a, a nungjuite kawmah, Mi hausate diingin Pathian gam a luut hahsa hina mei e! a chi a.

²⁴Huleh a nungjuite’n chu a thusoite thumah a sa thei mahmah va. Hizongleh Jesu’n a dawng kiit a, a kawmvah, Naute, hauhsatna muangte diingin Pathian gam a luut hahsa hina mei e!

²⁵Mi hausa Pathian gam a a luut sangin, sangawngsaau phin bil vanga a luut paisuaah a baih zaw hi, a chi a.

²⁶Huin amahun soi theih louh khopin thumah a sa va, Huchi ahihleh koi hutdam in a um zou diai? a kichi uh.

²⁷Huin Jesu’n amahuh a en a, Mihing diingin hichu bawl gual louh ahi a, hizongleh Pathian diingin ahi sih; ajiahchu Pathian diingin sil zousiah a hithei hi, a chi a.

²⁸Huin Peter in a kawmah, En in, kei un bangkim nusia in ka hung jui uh, chi'n a soi panta a.

²⁹Huleh Jesu’n a dawng a, Chihtahzetin ka hung hilh ahi, Mi koi hitaleh keimah jiah leh Tanchinpha jiaha inn aha, unaupate aha, unaunute aha, pa aha, nu aha, ji aha, tate aha, huleh gamte aha nusia chu,

³⁰Tu damsung ngeia sawinate toh innte, unaunute, nute, tate, huleh gamte a lehza a mulou diing a um sih uh; huleh khovel hung tung diing ah kumtuang hinna toh.

³¹Hizongleh mi tampi a masapente a nunung pen diing va, a nunungpente a masapen diing uh, a chi hi.

³²Huleh amahuh chu Jerusalem khua a chiahtou in lampi ah a um va, Jesu chu a ma vah a pai a; huleh amahun limdang a sa mahmah va; huleh a juih pumun a lau va. Huin ama’n sawmlenihte a pui kiit a, a tung a sil hung tung diingte a hilh panta a,

³³Ngai un, Jerusalem khua a chiahtou diing i hi uh; huleh mihing Tapa chu siampu lalte leh lehkhagialtute kawmah matsah in a um diing; huleh amah chu si diingin siamlouh a tangsah diing va, Jentelte khutah a pekhe diing uh;

³⁴Huleh amahun chiamnuih bawlna in a zang diing va, a jep diing va, chil a siatkhum diing va, huleh a that diing uh; huleh a ni thum ni in a thou kiit diing hi, a chi hi.

³⁵Huin Zebedi tapate Jakob leh John a hung va, a kawmah, Houtupa, na kawma ka deih photmah uh hung bawlsah lechin ka chi uh, a chi va.

³⁶Huin ama’n a kawmvah, Nanguh diingin bang hung bawlsah leng na chi viai? ana chi a.

³⁷Huin amahun a kawmah, Na loupina ah, khat na jiatlam ah, khat na veilam ah hung tousah in, a chi uh.

³⁸Hizongleh Jesu’n a kawmvah, Bang ahiai na nget uh na he sih uhi; ka nou dawn diing na dawn thei diviai? huleh ka baptisma tan diing zong na tangthei diviai? a chi a.

³⁹Huin amahun a kawmah, Thei e, a chi va. Huin Jesu’n a kawmvah, Ka dawn diing nou chu na dawn ngei diing va; huleh ka baptisma tan diing zong na tang ngei diing uh;

⁴⁰Hizongleh ka jiatlam leh ka veilama tou diing chu kei piah diing ahi sih a, a diing va kiguatsahte kawmah piah ahi zaw diing hi, a chi a.

⁴¹Huleh sawmlenihte’n hichu a jahun Jakob leh John tungah a lungkim sih mahmah meita va;

⁴²Hizongleh Jesu’n amahuh a kou a, a kawmvah, Jentelte tunga vaihawm diing a kiguatte chu a tung vah a lal mahmah uh; huleh a mi lianteun a tung vah thu a nei mahmah mei chih na he uh.

⁴³Hizongleh nanguh lahah huchibang ahi sih diing hi; mi koipouh na lah va a lian hih ut chu na natongtu un a pang diing a;

⁴⁴Huleh mi koipouh na lah va lalpen ut chu mi zousiah suaahin a pang diing ahi.

⁴⁵Ajiahchu mihing Tapa hiilhial zong natohsah a um diingin ahung sih a, natongtu diing leh mi tampite tatna diing a a hinna pe diingin a hung zaw hi, a chi hi.

⁴⁶Huleh Jeriko khua ahung tung va; huleh a nungjuite leh mipi nasatah toh Jeriko khua apat a pawt laiun Timai tapa Bartimai mittaw chu lam gei ah khutdohin ana tou a.

⁴⁷Huleh Nazareth Jesu ahi chih a jah tahin, Jesu, nang David tapa, hung khotuah in, chi'n a kikou a.

⁴⁸Huleh mi tampi in amah chu sip diingin a khap va; hizongleh ama’n chu, Nang David tapa, hung khotuah in, chi'n a kihahkou sem hi.

⁴⁹Huin Jesu chu a dinga, amahpa kouh diing thu a pia a. Huleh amahun mittawpa chu a kou va, a kawmah, Ha muangtahin um inla, thou in; ama’n nang ahung kou hi, a chi va.

⁵⁰Huin amah chu a puansilh paai in a thou a, Jesu kawmah a hungta a.

⁵¹Huleh Jesu’n a dawng a, a kawmah, Na tungah bang bawl leng na ut ei? a chi a. Mittawpa in a kawmah, Lalpa, muhtheih ka ut hi, a chi a.

⁵²Huin Jesu’n a kawmah, Chiahta in; na ginna in ahung damsahta hi, a chi a. Huin a mit ahung vaahpah a; lampi ah Jesu a juita hi.