Read Simte MARK 13 Bible Online

MARK 13 - Simte bible

MARK 13

¹Huleh Pathian biahinn a kipana a pawtdohin a nungjuite laha khat in a kawmah, Houtupa, en dua, a suang te bang tobang hi a, huleh a innte haw bangchitah a loupi a taimah! a chi a.

²Huin Jesu’n a dawng a, a kawmah, Hi inn loupite na mu maw? suhchim louh a, suang khat tunga khat kichiang mawngmawng hi-ah a um sih diing, a chi a.

³Huleh Olive taang a Pathian biahinn zawna a tou laiin, Peter toh Jakob toh, John toh Andru in a guuhin a kawmah,

⁴Hi silte bang chih chiangin ahung tung diai? huleh hi silte hung tun diing chiangin chiamchihna bang ahung um diai? hung hilhin, chi'n a dong va.

⁵Huleh Jesu’n amahuh a dawng a, a kawmvah, Koima’n ahung heem louhna diingun pilvaang un.

⁶Ajiahchu, Kei Khrist ka hi, chi'n mi tampi ka minin ahung diing va, mi tampi a heem diing uh.

⁷Huleh gaal thute leh kidou thuthangte na jah hun chiangun lungdong sih un; hute chu hung tung diing mawng ahi: hizongleh a tawpna chu ahi nai tadih sih diing.

⁸Ajiahchu nam tuam leh nam tuam a kidou diing va, gam tuam leh gam tuam a kidou diing uh; huleh mun tuam tuam ah ziil a kiliing diing a, kialte leh buainate a tung diing: hi silte chu gentheihna kipatna ahi.

⁹Hizongleh kipilvaang un; ajiahchu vaihawmtute khutah ahung pedoh diing va, kikhopna innte ah ahung vo diing va; huleh keimah jiahin houtute leh kumpite ma ah amah uh heetsahna diingin a hung kipui diing hi.

¹⁰Huleh Tanchinpha chu nam zousiah kawmah soi masat ahi diing hi.

¹¹Hizongleh ahung pui va, ahung piahdoh hun chiangun bang ka soi de aw chi'n ngaihtuah khawl sih unla; a huntaha hung kipia chu soi zaw un; ajiahchu a soitu nanguh hilouin, Hagau Siangthou ahi zaw ngal a.

¹²Huchi'n unaupa in unaupa thah diingin a mansah diing a, huleh pa in a ta; huleh tate’n a nulepate uh a dou diing a, a thatsah diing uhi.

¹³Huleh ka min jiahin mi zousiah huat na hi diing uh; hizongleh a tawp dong a thuaah tawntung zou, hu mi ngei chu huuhhing in a um diing hi.

¹⁴Hizongleh zawlnei Daniel in ana soi, sumangtu kihdahum chu a din louhna diing a ding na muh chiangun, (a sim photin a umzia he heh) hu hun tah chiangin Judia gam a umte taang ah tai u’heh.

¹⁵Huleh inn tunga um zong kum sih heh, a inn sunga thuampua umte ladoh diingin zong va luut sih heh;

¹⁶Huleh lou a um chu a puan la diingin kiih kiit sih heh.

¹⁷Hizongleh hu lai huna gaai leh naunou pomte tung a gih hi!

¹⁸Huleh hu lai hun chu phalbilai ahih louhna diingin haamtei un.

¹⁹Ajiahchu hu nite ah gimthuaahna a um diing, hutobang gimthuaahna Pathian in leilung a siam chiila kipan tuni tanin a um ngei nai sih a, um zong a um nawn sih diing hi.

²⁰Huleh Lalpa’n hu nite chu sutom sih henla hileh, mi mawngmawng hingin a suahta sih diing uh; hizongleh miteel, a teeltuamte jiahin a nite chu a sutomta hi.

²¹Huleh hu hun chianga mi khat pouh in na kawm va, En un, hi ah Khrist a um, aha ahihlouhleh, en un, hutah ah a um, a chih uleh tahsang sih un.

²²Ajiahchu Khrist tahlou leh zawlnei tahlou ahung pawt diing va, hute’n chu chiamchihnate leh silmahte ensah in, hithei lehouh teelte nasan a heemkhe diing uh.

²³Hizongleh kipilvaang un: ngai un, sil zousiah ka hung hilh masata hi.

²⁴Hizongleh hu nite a, hu hahsatna tun zoh chiangin, ni chu a mialta diing a, huleh ha zong a vaah nawn sih diing.

²⁵Huleh vaan aahsite chu ahung ke diing a, vaan a um silbawl theihnate chu a kiliing diing hi.

²⁶Huleh hutah chiangin mihing Tapa chu silbawltheihna nasatah leh loupina toh meipi laha hung a mu diing uh.

²⁷Huleh hutah chiangin ama’n a vaansawllehte a sawlkhe diing a, a teelte, kawlmong li a kipan, lei tawp a kipanin vaan tawp dongin a khawmkhawm diing uhi.

²⁸Huchi'n theipi kungah tehkhinthu zil un; a ba ahung dot a, a nah ahung sel chiangin nipi a naita chih na he uh.

²⁹Huchimahbangin hi silte ahung tun na muh chiangun, amah ahung naita, kotkhaah bul ngei ah ahung tungta, chih he un.

³⁰Chihtahzetin ka hung hilh ahi, hi sil zousiah a tunkim masiah tulai khang thahte a bei sih diing uh.

³¹Vaan leh lei a bei diing a: ka thu ahihleh a bei sih diing hi.

³²Hizongleh hu ni leh hu huntah chu, Pa chauh loungal, koimah in, vaan a um angelte’n zong, Tapa in zong a he sih hi.

³³A hun diing na heet louh jiahun pilvaang unla, kiging zinga um in haamtei un.

³⁴Bang jiahin ahiai i chih leh mihing Tapa chu, mi khat a inn nusia a, a suaahte kawma thuneihna pia a, huleh a natoh diing uh pe chiat a, khual gamlapi a va zin bang ahi.

³⁵Hujiahin kiging zing un; ajiahchu inn neitupa hung diing hun, nitaah lam aha, jan khang lai aha, aahkhuan in aha, ahihlouhleh jingkal in aha chih na he sih uh.

³⁶Huchilou inzaw thakhata hungin ihmu in ahung mukha diing hi.

³⁷Huleh na kawm va ka soi chu mi zousiah kawma ka soi ahi, Kiging zing un, a chi hi.