Read Simte MARK 14 Bible Online

MARK 14 - Simte bible

MARK 14

¹Huleh ni nih nungin chiahkaan kuut leh tanghou tolsoh louh kuut a um a; huleh siampu lalte leh lehkhagialtute'n amah chu doha bawl a, mat a, thah theihna diingdan a hawl va.

²Hizongleh kuut ni in hidah leh, huchilou inchu mipi buaina a umkha diing, a chi va.

³Huleh Bethani khua a Simon miphaahpa inn a um a, ankuang a, a tou laiin, numei khat, Alabastar bawma spiknard thau gimtui man tamtah tawi in a hung a; huleh amahnu’n a bawm chu a tatkeeh a, a lu ah a sungta hi.

⁴Huleh a lah vah lungkim lou khenkhat a um va, Bang diinga thau namtui kimawh suhbei ahiai?

⁵Hichu makhai zathum sanga tamzaw a zuah a, migentheite kawma piah theih diing ahi ngal a, a chi va. Huchi'n amahnu tungah a phunta uhi.

⁶Huin Jesu’n, Amahnu chu a umum in umsah un, bang diinga subuai na hi viai? ka tungah na hoih a tong ahi.

⁷Ajiahchu migentheite na kawmvah a um zing va, na ut hun teng un na panpih thei uh; hizongleh kei chu na kawmvah ka um zing sih hi.

⁸Amahnu’n a bawl theihtawp a bawlta ahi, ka sapum vui diing a thau hung nuh khawl ahi.

⁹Chihtahzetin ka hung hilh ahi, khovel pumpi a hi tanchinpha kisoina phot ah hi amahnu sil bawl zong a heetzingna diingin a kisoi diing hi, a chi a.

¹⁰Huleh sawmlenihte laha khat, Juda Iskariot chu amah mansah diingin siampu lalte kawmah a va chiah a.

¹¹Huleh hikhu a jah tahun amah uh a kipaah va, huleh amah chu sum piah a chiamta uhi. Huin ama’n a matsahna diing lemtaang a hawlta hi.

¹²Huleh tanghou tolsoh louh kuut ni masapen, chiahkaan kuut belaamnou a goh ni un, a nungjuite’n a kawmah, chiahkaan ankuang na neeh theihna diingin khoiah va bawl le ung na ut ei? a chi va.

¹³Huin ama’n a nungjuite nih a sawldoh a, a kawmvah, Khopi sungah va luut un, huchi'n pasal tuibeel pua khat in ahung tuaah diing a: amah chu jui un.

¹⁴Huleh a luutna penpen, hu inn neitu kawmah, Houtupa’n ka nungjuite toh chiahkaan ankuang ka neeh na diing uh mikhual pindan khoitah ahiai? a chih hi, chi un.

¹⁵Huchi'n ama’n pindan tungnung liantah, van umsa leh guatsa diam ahung ensah diing; hu ah ei uh diing bawl un, a chi a.

¹⁶Huin a nungjuite a chiah va, khopi sungah a luut va, huleh a kawm va a soi bangin a muta uh; huchi'n chiahkaan ankuang chu a bawlta uhi.

¹⁷Huin nitaah lam ahung hihin amah chu sawmlenihte toh ahung a,

¹⁸Huleh tou a, a neeh laiun Jesu’n, Chihtahzetin ka hung hilh ahi, An ka neehkhawmpih na lah va mi khat in ahung mansah diing hi, a chi a.

¹⁹Huleh amahuh chu a lungkham panta va, a kawmah, khatkhat in, Kei ka hi maw? a chi va, a banban in a dongta uhi.

²⁰Huin ama’n a dawng a, a kawmvah, Sawmlenihte laha khat, kuang a ka an sawhkhawmpih ahi.

²¹Mihing Tapa chu a tanchin kigial bang ngei a chiah diing ahi a; hizongleh mihing Tapa mansah diingpa tung a gih hi! amahpa chu a pian a piang lou hileh amah diingin a hoihzaw diing hi, a chi a.

²²Huleh a neeh laiun Jesu’n tanghou a la a, a vangpiah a, huleh a balkeeh a, a kawmvah a pia a, La unla ne un: hichu ka tahsa ahi, a chi a.

²³Huin nou a la a, huleh kipaahthu a soi zohin, a kawmvah a pia a; a bawnun a dawn chiat uhi.

²⁴Huleh ama’n a kawmvah, Hichu thuhun thah a ka sisan, mi tampite diing a luang chu ahi.

²⁵Chihtahzetin ka hung hilh ahi, Pathian gam a a thah a ka dawn ni a tun masiah greptui ka dawn nawnta sih diing, a chi a.

²⁶Huleh amahun la khat a sah zohun a pawtdoh va, Olive taang ah a chiahta uhi.

²⁷Huleh Jesu’n a kawmvah, Tujan chiangin na bawnun ka tungah na lunghilou veh diing uh; ajiahchu, Belaampu ka jep diing a, belaam hon chu a dalhjah diing uh, chih gelh ahi.

²⁸Hizongleh ka thohkiit nung chiangin Galili gam ah na ma vah ka chiah diing, a chi a.

²⁹Hizongleh Peter in chu a kawmah, A bawnun lunghilou veh zong le uh kei chu ka lunghilou sih diing, a chi a.

³⁰Huin Jesu’n a kawmah, Chihtahzetin ka hung hilh ahi, Tuniin, tujan ngei in, aah nihvei a khuan ma in thumvei na hung kiheetmohbawl diing, a chi a.

³¹Hizongleh ama’n chu khauh semin, Nang toh sikhawm diing hizongleng ka hung kiheetmohbawl sih diing, a chi a. Huchimahbangin a bawnun a chi chiat uhi.

³²Huleh amahuh chu Gethsemani kichi mun khat ahung tungta va; huleh ama’n a nungjuite kawmah, Ka haamtei sungsiah hi-ah na tou un, a chi a.

³³Huleh Peter toh, Jakob toh John a pui a, nasatah a thaphaangin a mangbang panta a.

³⁴Huchi'n a kawmvah, Ka lungtang sihna khop hialin a lungkham hi, hi-ah ana um unla, kiging zing un, a chi a.

³⁵Huin malamah themkhat a chiahsuan deuh a, tual ah a puuh a, ahihtheih leh hu hunin amah a pelh theihna diingin a haamtei a.

³⁶Huleh, Abba, Pa, sil zousiah nanga diingin a hithei hi, hi nou hi kei apatin lamang in; hizongleh kei thu hilouin, nangmah thu thu hizaw heh, a chi a.

³⁷Huin a hung a, amahuh chu ihmu in ahung mu a, huchi'n Peter kawmah, Simon ihmu na hi maw? daahkal khat zong kiging a um zou lou na hi maw?

³⁸Heemna a na luut louhna diingun kiging zing unla, haamtei un. Hagau in chu a peih a, hizongleh tahsa chu a zawngkhal hi, a chi a.

³⁹Huleh a chiahmang kiit a, a haamtei a, a chih ngeimah a chi a.

⁴⁰Huin ahung kiihkiit a, amahuh chu ihmuin ahung mu jel a, (a ihmut uh a suaah mahmah jiahin) huleh amah dawnna diing zong a he sih uhi.

⁴¹Huin a thumveina in a hung a, a kawmvah, Tuin chu ihmu unla, khawlta un; a hunta hi, a hun zong a tungta; ngai un, mihing Tapa chu misualte khut a piahkhiah ahita.

⁴²Thou un, i chiah diing uh; en un, kei hung mansahtu chu a naita hi, a chi a.

⁴³Huleh thu a soi laiin, sawmlenihte laha khat, Juda chu siampu lalte leh lehkhagialtute leh upate a kipanin namsaau leh khetbuuh tawi mipi nasatah toh ahung tungpah a.

⁴⁴Huleh amah mansahpa in, Ka tawp penpen chu amah ahi, man unla, kituup tahin puimang un, chi'n chiamchihna a pe masa zouta a.

⁴⁵Huchi'n ahung hun tahin a va naihpah a, Houtupa, houtupa, chi'n a tawpta a.

⁴⁶Huin amahun a tungah khut a ha va, a manta uhi.

⁴⁷Huleh a kawm va dingte laha khat in namsaau a doh a, siampu lalpen suaahpa a saat a, a bil a saatkhia hi.

⁴⁸Huleh Jesu’n amahuh a dawng a, a kawmvah, Guta man diing bang hialin namsaaute leh khetbuuhte keng in kei man diingin na hung kuan uh maw?

⁴⁹Ni chinin, biahinn ah thuhilh in ka um zinga, na hung man sih uh; hizongleh Pathian lehkhabu thu a taangtun ngei diing ahi, a chi a.

⁵⁰Huin a bawnun amah a nusia va, a taita uhi.

⁵¹Huleh tangval koi ahakhat in, puannem khat chauh silh in amah a jui a; huleh tangvalte’n amah ana man va;

⁵²Huin a puannem chu nusia in, a saguah in a taita hi.

⁵³Huin Jesu chu siampu lalpen ma ah a pui va; huleh amah toh siampu liante leh, upate leh, lehkhagialtute zousiah ahung kikhawm va.

⁵⁴Huleh Peter in gamlapi ah, siampu lalpen inn sung tandongin a jui a; huleh suaahte toh a toukhawma, mei a awi hi.

⁵⁵Huleh siampu lalte leh vaihawmna inn a um zousiah in Jesu a thah theihna diingun a heeh na diing a hawl va; a mu sih uh.

⁵⁶Mi tam tahin zuauthu in a heeh va, hizongleh a heehna haw uh a kituaah sih.

⁵⁷Huin mi koite aha a dingdoh va, zuauthu in a heeh va,

⁵⁸Hi khuta bawl biahinn ka suse diing a, ni thum sungin khuta bawl louh a dangkhat ka lam diing, ama’n a chih ka ja uh, a chi va.

⁵⁹Hizongleh huchi'n zong a heehna uh a kituaah thei tuan sih hi.

⁶⁰Huin siampu lalpen a lai ah a dingdoh a, Jesu kawmah, Bangma a dawng lou maw? Hite hung heehna bangchidan ahiai? chi'n a dong a.

⁶¹Hizongleh amah chu a sip bihbeh a, bangmahin a dawng sih hi siampu lalpen in, Nang Hampha Tapa, Khrist chu na hi maw? chi'n a dong kiit a.

⁶²Huleh Jesu’n, Ka hi; huleh mihing Tapa hi silbawltheihna jiatlama tou a, vaan meipi laha hung na mu diing, uh, a chi a.

⁶³Huin siampu lalpenin a puante a botkeeh a, Heetpihtu dang bang diing i chi nalai diai?

⁶⁴Pathian a soisiatdan na jata uh; bangchi na sa viai? a chi a. Huin a bawnun amah chu si taahin siamlouh a tangsahta uhi.

⁶⁵Huin khenkhat in chil a siatkhum panta va, a maai a tuamsah va, khut in a su va, huleh a kawmah, Soi in, a chi va; huleh suaahte’n zong a khutpeeh un a beeng uhi.

⁶⁶Huleh Peter chu nuai lama innpi huanga a um laiin, Siampu lalpen suaah nungaahte laha khat a hung a;

⁶⁷Huleh amahnu in Peter mei awi a um a muh in, a en a, Nang zong Nazareth Jesu toh kilawi na hi, a chi a.

⁶⁸Hizongleh ama’n chu kiheetmohbawl in, Ka he sih, na soi zong a ngaihna ka he sih, a chi a. Huleh inn liimah a va pawtdoh a, huchi'n aah a khuangta hi.

⁶⁹Huleh nungaah khat in amah a mu kiit a, a kawma dingte kawmah, Hipa a lah va khat ahi, a chi jel a.

⁷⁰Huleh a kiheetmohbawl kiit a. Huin tomkhat zouin a kawma dingte’n Peter kawmah, A lah va khat hijen te: ajiahchu Galilimi na hi a, na haam in zong a kihe hi, a chi va.

⁷¹Hizongleh ama’n, Hu na mihing soipa uh ka hekha sih, chi'n haamsia louin a kichiamta hi.

⁷²Huleh a nihveina’n aah a khuangta a. Huin Peter in Jesu’n a kawma, aah nihvei khuan ma in thumvei na hung kiheetmohbawl diing hi, a chih thu a hedoh a ama’n huchu a ngaihtuahin a kapta hi.