Read Simte MARK 16 Bible Online

MARK 16 - Simte bible

MARK 16

¹Huleh khawlni a bei phetin, Mari Magdalene leh, Jakob nu Mari leh, Salomi in amah a vanuh diingun sil gimtui a lei va.

²Huleh hapta ni masapen ni jingkal matahin haan ah ni suaah in ahung va.

³Huleh, amah uleh amahuh kihou in, Ha an kot apat suang kua’n hung liihkhiahsah diing adiai? a kichi va.

⁴Huleh a et uleh suang chu liihdohsa in a muta uhi; a suang chu a lian mahmah hi.

⁵Huleh haan sunga a luut uleh, tangval khat puan vaam tualtah silh a, jiatlam panga tou a muta va; a lau mahmah uhi.

⁶Huin ama’n a kawmvah, Lau sih un; Kros a kikilhbeh Nazareth Jesu na hawl uh ahi; amah chu a thou kiitta a, hi-ah a um nawn sih hi; en un a sialna mun uh.

⁷Hizongleh chiah unla, a nungjuite leh Peter kawmah, Galili gam ah na ma vah a chiah hi; na kawm va a soi bangin amah na mu diing uh, chih va hilh un, a chi a.

⁸Huin amahuh chu kintahin a pawt va, haan apatin a taita uh a; kiliing a thum ah a sah jiahun. Huleh a lau jiahun koimah kawmah bangmah a soi sih uhi.

⁹Huchi'n Jesu chu hapta ni masapen a, a thohkiit in Mari Magdalene, a sung apat dawi sagih a nohdohna nu kawmah a kilaah masapen a.

¹⁰Huleh amahnu chu a chiah a, Jesu umpih veute, amah suuna kapte a va hilh a.

¹¹Huleh amahun, amah chu a hingta a, huleh amahnu in a mu hi chih a jah un a tahsang sih uhi.

¹²Huleh hu nungin a lah va mi nih, gamlam zuana a pai laiun, meel tuam pu in a kawmvah a kilaah a.

¹³Huin amahuh chu a chiah va, nungjui dangte a va hilh va; amahun zong ana gingta sih uhi.

¹⁴Hunung la min, ankuang a, a tou laiun, sawmlekhatte kawmah a kilaah a, a thohkiit nunga amah mute thu a gintaat louh jiahun, a gintaat louhna uleh, a lungtang khauh thu vah a taihilh hi.

¹⁵Huin ama’n a kawmvah, khovel zousiah ah chiah unla, silsiam chinteng kawmah Tanchinpha soi un.

¹⁶Koipouh a gingta a baptisma tang chu huhing in a um diing a; hizongleh a gingta lou chu siamlouh tang in a um diing hi.

¹⁷Huleh a gingtate chu hi chiamchihnate in a jui diing: Ka min in dawite a nohdoh diing va; haam thahte in a haam diing uh.

¹⁸Guulte khut in a la diing va; sih theihna sil bangchi bang dawn zongle uh bangmah a chi sih diing uh; huleh damloute tungah khut a nga diing va, a dam jel diing uhi, a chi hi.

¹⁹Huchia Lalpa’n a kawm va thu a soi zohin, amah chu vaan ah puitouh in a um a, Pathian jiatlamah a touta hi.

²⁰Huleh amahuh chu a kuandoh va, mun chinah thu a soita va, Lalpa’n amah uh a tohpih a, chiamchihna in juiin a thu chu a sukip jel hi. Amen.