Read Simte MARK 2 Bible Online

MARK 2 - Simte bible

MARK 2

¹Huleh ni bangzah aha nungin Kapernaum khua ah a luut kiit a, huleh inn ah a um chih thu ahung thangta a.

²Huleh kotkhaah kiim tanpha a, umna diing um lou khopin mi tampi ahung kikhawmpah va; huleh ama’n a kawmvah thu a soi hi.

³Huleh mizeng khat mi li in hung zawngin a kawmah ahung pui va.

⁴Huleh mitam jiaha a kawm nai a ahung theih louh tahun a umna inn tung a hong va; huleh a pheet vang zohun, mizeng chu a lupna toh a khaikhesuh uhi.

⁵Jesu’n a gindan uh a muh in mizeng kawmah, Tapa, na sualnate ngaihdam ahita, a chi a.

⁶Hizongleh lehkhagialtute khenkhat hu muna tou a um va, a lungsim un,

⁷Bang diinga hi pa’n Pathian soisia a hichibang thu a soi ahiai? Pathian chauh loungal koi ahiai sualnate ngaidam thei? chi'n a ngaihtuah uhi.

⁸Huleh Jesu’n a lungtang un huchibangin a ngaihtuah uh chih a lungsim in ana hepah a, a kawmvah, Bang diinga hi thute na lungtang va ngaihtuah na hi viai?

⁹Mizeng kawma, Na sualnate ngaihdam ahita, chih leh, Thou inla na lupna la inla, keengin chiahta in, chih khoi a baihlamzaw ei?

¹⁰A khoi hitaleh mihing Tapa’n leitung ah sualnate ngaihdam theihna, a nei chih na heetna diingun, (mizeng kawmah),

¹¹Thou inla, na lupna la inla, na inn lamah chiahta in ka hung chi ahi, a chi a.

¹²Huleh amah chu a thoupah a, a lupna la in a bawn va mitmuh ah a chiahdohta hi; huchi'n a bawnun limdang a sa va, Hichibang mawngmawng i mu ngei sih, chi'n Pathian a paahtawi uhi.

¹³Huleh amah chu diil gei ah a chiahdoh kiit a; huleh mipi zousiah a kawmah a va chiah va, amahuh thu ana hilh hi.

¹⁴Huleh a chiah pum in Alphai tapa Levi, siahdonna muna toulai a mu a, a kawmah, Hung jui in, a chi a. Huin amah chu a thou a, a juita hi.

¹⁵Huleh hichi ahung hi a, Jesu’n Levi inn a ankuang a uum leh siahdongtute leh misualte tampi in zong Jesu leh a nungjuite a uumpih va; ajiahchu tampi ahi va, a nung a jui uhi.

¹⁶Huleh lehkhagialtute leh Pharisaite’n siahdongtute leh misualte toh an nekhawma amah a muh tahun, a nungjuite kawmah, Bangchidan ahiai siahdongtute leh misualte toh a neeh a, a dawn? a chi va.

¹⁷Jesu’n hichu a jah tahin, a kawmvah, Mi damte’n doctor a mamoh sih va, mi damloute’n a mamoh zaw uhi; midihtatte kou diing a hung ka hi sih a, misualte kisiihsah diing a hung ka hi zaw hi, a chi hi.

¹⁸Huleh John leh Pharisaite nungjuite’n an a ngawl veu va; huleh a hung va, a kawmah, Bang diinga John nungjuite leh Pharisaite nungjuite’n an a ngawl va, nang nungjuite’n a ngawl louh uh ahiai, a chi va.

¹⁹Huleh Jesu’n a kawmvah, Moupuite kawma mouneitu a um laisiah moupuite’n an a ngawl thei ngei viai mah? Mouneitu a kawm va a um laisiah an a ngawl thei sih diing uhi.

²⁰Hizongleh mouneitu a kawm va kipana puimang nite ahung tung diing a, hu ni chiangin chu a ngawl diing uhi.

²¹Mi koimah in puan lui puan thah them in a phoh ngei sih; phoh tale uh a phohna pen in a lui pen a luai keeh diing a, a susezaw sem diing hi.

²²Huleh mi koimah in uain thah savun thawl lui ah a thun ngei sih uh; thun tale uh uain thah in savun thawl chu a phukeeh diing a, uain a kibo diing a, huleh savun thawl chu a seta diing hi; uain thah chu savun thawl thah a thun ngei diing ahi zaw hi, a chi hi.

²³Huleh hichi ahung hi a, khawlni in buhlei lai tawnin a chiah a; huleh a nungjuite’n a chiah kawmun buhvuite a zuut panta va.

²⁴Huin Pharisaite’n a kawmah, En in, bang diinga amahun khawlni a bawl sianglou bawl ahi viai mah? a chi va.

²⁵Huin ama’n a kawmvah, David leh a lawite a taahsap va, a gilkial lai va a silbawl uh na simkha ngei hial sih u'maw?

²⁶Abiathar siampu lalpen ahihlai a, Pathian inn a, a luut a, siampute chauh loungalin neeh sianglou tanghou siah a neeh a, a lawite kawma zong a piah thu, a chi a.

²⁷Huleh ama’n a kawmvah, Khawlni chu mihing a diing a bawl ahi a, mihing chu khawlni a diing a bawl ahi sih.

²⁸Hujiahin mihing Tapa chu khawlni Lalpa zong ahi, a chi hi.