Read Simte MARK 3 Bible Online

MARK 3 - Simte bible

MARK 3

¹Huleh amah chu kikhopna inn ah a luut kiit a; huah mi khutzeng khat ana um a.

²Huleh amah a heeh theihna diingun, khawlni a, a suhdam leh suhdamlouh a ensim va.

³Huleh ama’n khutzengpa kawmah, Dingdoh in, a chi a.

⁴Huleh ama’n a kawmvah, Khawlni in sil hoih bawl aha siang, ahihlouhleh sil hoihlou bawl? hutdam aha siang, ahihlouhleh suhlup? a chi a. Hizongleh amah uh a sip chiat va.

⁵Huleh ama’n a lungtang khauhdan uh poisatahin, lungthah pum a, a et kimvel nungin, hupa kawmah, Na khut zandoh in, a chi a. Huleh ama’n a zandoh a: huchi'n a langkhat bangin a damta hi.

⁶Huleh Pharisaite chu a pawtdoh va, amah a suhlup theihdan diing uh ngaihtuahin. Herod mite toh a kihoukhawmpah uhi.

⁷Hizongleh Jesu chu a nungjuite toh diil lamah a chiahta a; huleh Galili gam a kipan mipi nasatahin amah a jui va,

⁸Huleh a silbawl loupidante a jaun, Judia gam apat, Jerusalem apat, Idumai apat bang, Jordan gaal apat bang in; Tura leh Sidon khokiim apat bangin mipi nasatah a kawmah a hung uhi.

⁹Huleh ama’n mipi jiahin amah diing a kuang neu khat guatsa a koih diingin a nungjuite a hilh a, huchilou inchu amah a nehthopkha diing uh.

¹⁰Ajiahchu mi tampi a sudamta a; huchi'n natna nei photmahin amah a khoih theihna diingun a boh lutlut uh.

¹¹Huleh dawiniinte’n amah a muh un, a ma a bohkhup in, Nang Pathian Tapa na hi, chi'n a kikou uhi.

¹²Huleh ama’n a tanchin phuangdoh lou diingin amahuh a khap chat hi.

¹³Huleh taang ah a chiah tou a, a deihdeihte a kawmah a kou a; Huleh amahuh a kawmah a hung va.

¹⁴Huleh a kawm a um diingin leh, thusoi a, a sawlkhiah theihna diingin sawmlenihte a guat a,

¹⁵Damloute suhdam theihna leh, dawite nohdoh theihna thunei diingin;

¹⁶Huleh Simon chu ama’n Peter a sa a,

¹⁷Zebedi tapa Jakob leh, Jakob unaupa John; amahuh chu Bonerges a sa a, huchu, Vaanpiging tate, chihna ahi.

¹⁸Huleh Andru, Philip, Bartholomai, Matthai, Thoma, Alphai tapa Jakob, Thaddai, Kananmi Simon,

¹⁹Huleh a mansahpa Juda Iskariot zong ahi uh; huleh amahuh inn sungah a luut va.

²⁰Huleh an nasan nesah thei lou khopin mipi ahung kikhawm kiit uh.

²¹Huleh a lawmte’n hichu a jahun, A ngol ahita, chi'n amah mat tum in a pawt uhi.

²²Huleh lehkhagialtute Jerusalem khua a kipan a hungsuhte’n, Beelzebul paai ahi, huleh dawi maangpa jiahin ahi dawite a nohdoh, a chi va.

²³Huleh ama’n amahuh a kou a, a kawmvah tehkhinthu in thu a soi a, Bang chi'n Setan in Setan a nohdoh thei diai?

²⁴Gam khat kilangkhen in kidou leh, hu gam chu a dingdoh thei sih diing hi.

²⁵Huleh innkuan khat kilangkhen in kidou leh, hu innkuan zong a dingdoh thei sih diing hi.

²⁶Setan zong amah leh amah kidouin kilangkhen leh a dingdoh zou sih diing a, a mangthai zaw diing hi.

²⁷Mi koimah in mi haatpa a kaantom masat louhngalleh, mi haatpa inn a luut in a thuampuate a laahsah thei sih; a kaantom nung chiangin chu a thuampua a tomsah mai diing.

²⁸Chihtahzetin ka hung hilh ahi, Mihing tate a sualna zousiah uleh, Pathian soisiatna lama a soisiatna zousiahte uh ngaihdam ahi diing va;

²⁹Hizongleh koipouh Hagau Siangthou soisia in chu bangchihtanin ngaihdamna a mu sih diing a, kumtuang siamlouhtanna lauhuai ah a um zaw diing hi, a chi a.

³⁰Dawi niin paai ahi, a chih jiahun hu thu chu a soi ahi.

³¹Huin a unaute leh a nu a hung va, inn pua a ding in amah kou diingin mi a sawl va.

³²Huleh a kiim ah mipihon a tou va, amahun a kawmah, Ngai in, inn pua ah na nu leh na unaute’n ahung hawl uhi, a chi va.

³³Huleh ama’n a dawng a, a kawmvah, Ka nu leh ka unaute koite ahiai? a chi a.

³⁴Huin a kiim a pute a envel a, En un, ka nu leh ka unaute!

³⁵Ajiahchu koipouh Pathian deihzawng bawl photmah, hu mite chu ka unaute, ka sanggamnute leh ka nute ahi uh, a chi hi.