Read Simte MARK 4 Bible Online

MARK 4 - Simte bible

MARK 4

¹Huleh diil pangah thu a hilhpan kiitta a; huleh mipi nasatah a kawmah ahung kikhawm va, huchi'n diil tunga kuang ah a luut a, a touta a; huleh mipi zousiah chu diil geiah leitung ah a um uhi.

²Huleh amahuh chu tehkhinthu in thu tampi a hilh a, huleh a thuhilhna ah a kawmvah;

³Ngaikhia unla, En un, buhchithehtu khat buhchi theh diingin a kuan a;

⁴Huleh hichi ahung hi a, a theh laiin khenkhat lampi gei ah a tu a, huleh hute chu tungleeng vate a hung a, a ne zouta uh.

⁵Huleh khenkhat suang silei lahah a tu a, huleh lei a sah louh jiahin a poupah a;

⁶Hizongleh ni ahung satin a haivul a, huleh zung a neih louh jiahin a gogawpta hi.

⁷Huleh khenkhat chu lingnawng lahah a tu a, huleh ling ahung khang a, a deepmangta a, huleh gah a neita sih hi.

⁸Huleh a dang chu lei hoih ah a tu a, huleh pouin a khangpahta a, huleh a leh sawmthum bang, sawmgup bang, huleh zakhat bangin ahung pungta hi, a chi a.

⁹Huleh ama’n a kawmvah, Koipouh jahna diing a bil nei in ja heh, a chi a.

¹⁰Huleh a tang a, a um laiin a kiim a sawmlenihte toh umte’n tehkhinthu chu a dong va.

¹¹Huin ama’n a kawmvah, Pathian gam thuguuh chu nanguh heet diing phal ahi a; hizongleh polam mite diingin chu sil zousiah tehkhinthu a hih ahi.

¹²Muh chu a muh theih va, a heetsiam louhna diing uleh, jah chu a jah theih va, a ngaih na a heet louhna diingun; huchilou inchu a zawleh ahung kihei kiit diing va, a sualnate uh ngaihdam ahi kha diing uh, a chi hi.

¹³Huleh ama’n a kawmvah, Hi tehkhinthu na he sih u'maw? huleh huchi a hih inchu tehkhinthu zousiah bangchi’n na heta divuai?

¹⁴Buhchithehtu in chu thu a theh a.

¹⁵Huleh lamgei a thu thehnate chu hitobang ahi uh; thu chu a jah tahun Setan a hungpah a, a lungtang va thu kitheh chu a lamangpah hi.

¹⁶Huleh huchibang mahin suang si leia kitheh chu hite ahi uh; amahun thu chu a jah tahun kipaahtahin a pompah uh;

¹⁷Hizongleh amah vah zung a nei sih va, tomtakhat chauh a um va; hu nunga thu jiaha gimthuaahna ahung um chiangin a puuhpah uhi.

¹⁸Huleh lingnawng laha kitheh chu hite ahi uh: hute’n thu chu a ja va,

¹⁹Huleh khovel hinkhua ngaihtuahnate, hauhsat utna heemnate leh sil dangdang deihgohnate hung luut in thu chu a deep a, gahlouin a um veuta hi.

²⁰Huleh lei hoih a kitheh chu hite ahi uh: thu chu ja in a pom va, a leh sawmthum bang, sawmguup bang, huleh za khat bangin a gah uh, a chi hi.

²¹Huleh ama’n a kawmvah, Khawn vaah koihna a koih louh diingin, loh nuai aha, ahihlouhleh lupna nuai aha a koih diingin khawnvaah a la ngei viai mah?

²²Ajiahchu kiphuang lou diing a iim bangmah a um sih a; kilang lou diing a phual zong bangmah a um sih hi.

²³Mi koipouh in jahna diing a bil a neih leh ja heh, a chi a.

²⁴Huleh ama’n a kawmvah, Bang ahiai na jah uh pilvaang un; na tehna ngeimah un ahung tehsah diing va; huleh nanguh a ngaikhete kawmah ahung piah behlap diing uh.

²⁵Ajiahchu koipouh a nei kawmah piahbeh ahi diing a; huleh koipouh a nei lou chu a neihsun zong laahsah ahi diing, a chi a.

²⁶Huleh ama’n, Pathian gam chu, mi’n leiah haichi tuh henla;

²⁷Huleh jan chiangin ihmu in suun chiangin thou henla, huleh haichi chu hung pou in khang doh henla, amahpa’n laha zia he sih leh, hutobang ahi.

²⁸Ajiahchu lei in amah in gah ahung suah jel a; a masa in a nah, huin a vui, huin a vui ah a tangching.

²⁹Hizongleh a gah chu ahung min chiangin, buhlaah a huntaah jiahin kawite in a aat panta hi, a chi a.

³⁰Huleh ama’n, Pathian gam chu bangtoh i tehkaahta diai? ahihlouhleh bangtoh tehkhina soi diing i ta viai?

³¹Hichu ankam chi tang khat leia a kituh chianga, leia haichi zousiah sangin neupen zongleh;

³²A tuh nungun, ahung pou a, loupa zousiah sangin ahung lianzaw a, ba lianpi ahung nei a; huchi'n tungleeng vate a liimah a giaah uhi, hutobang ahi, a chi a.

³³Huleh hichibang tehkhinthu tampiin, amahuh heet theih khamkham in a kawmvah thu a soi a;

³⁴Hizongleh tehkhinthu louin a kawmvah thu a soi sih hi; huleh amahuh ngena a um chiangun a nungjuite kawmah sil zousiah a hilhchian jel hi.

³⁵Huleh huni mahin, nitaahlam ahung hih in, ama’n a kawmvah, Gaalkhat lamah i kai diing uh, a chi a.

³⁶Huleh amahun mipite a sawlkhiah zoh un, kuang a a um bangbang in amah a paipihta va. Huleh a kawmah kuang neu dangte zong a um hi.

³⁷Huleh huihpi nasatah ahung nungta a, tuikinawh chu kuang sungah ahung luut juijui a; huchi'n ahung dim phialta a:

³⁸Huleh amah chu kuang meilamah taangkhap khap in, ihmu in a um a; huleh a phawng va, a kawmah, Houtupa, ka manthai uh poisa lou na hi maw? a chi va.

³⁹Huin amah chu ahung thou a, huih chu a tai a, diil kawmah, Daai inla, um kinke'n in, a chi a. Huin huih chu a tawpta a, ahung sipkeeita hi.

⁴⁰Huleh ama’n a kawmvah, Bang diinga huchi lau na hi viai? Ginna himhim na neih louh uh bangchidan ahiai? a chi a.

⁴¹Huleh a lau mahmah va, khat leh khat kihouin, Hipa hi bangtobang mi ahiai, huih leh diil tanphain a thu a awi uh, a kichituah uhi.