Read Simte MARK 5 Bible Online

MARK 5 - Simte bible

MARK 5

¹Huleh diil gaal, Gadara mite gam ahung tungta va.

²Huleh kuang a kipan ahung pawt tahin, mi dawiniin paai khat, haan a kipan hung pawt in amah ana tuaahpah a.

³Amah chu haan lah ngen a teeng ahi a; mi koima’n khainiang in a kaan thei hial sih uh;

⁴Kol buh in, khainiang bangin ana kaanta va, hizongleh khainiangte chu a bottan a, huleh kolte a sugawp a, mi koimah in a thunun zou sih uhi.

⁵Huleh suun leh janin taangte leh haante a um zingin a kikou a, suang bangin a kiziih veu hi.

⁶Hizongleh ama’n gamlatah apat Jesu a muh tahin, a tai a, a va beta a;

⁷Huleh aw ngaihtaha kikouin, Jesu, Pathian Tungnungpen Tapa, nang toh kizolhna bang ahiai ka neih? hung sugim lou diingin Pathian minin ka hung ngen hi, a chi a.

⁸Ajiahchu Jesu’n a kawmah, Nang dawiniin, hipa sunga kipan hung pawt in, ana chita a.

⁹Huleh ama’n, Na min bang ahiai? Huchi'n a dong a. Huleh ama’n, Ka min Nuai ahi, ajiahchu tampi ka hi uh, chi'n a dawng a.

¹⁰Huleh hu gam a kipan amahuh sawlmang lou diingin a kawmah hah nget in a ngen a.

¹¹Huleh hutaha taang pangah voh hon tampi a taa a.

¹²Huleh dawite zousiah in, Voh sungah hung sawl in, a sung va ka luut theihna diingun, chi'n a kawmah a ngen uhi.

¹³Huin Jesu’n amahuh thu a pia a, huchi'n dawiniinte chu a pawt va, voh sungah a luut va; huin voh hon saang nih phial chu keenah diil lamah hah tai in a taisuhta va; huchi'n tui lahah a sita uhi.

¹⁴Huin voh chingte chu a tai va, khopi sung leh kho neu ah hi thu a va hilh va; huin amahuh chu bang sil hung um a taimah, chia en diingin ahung uh.

¹⁵Huleh Jesu kawm ahung tung va, dawi mat, nuai paaipa chu puan silh a, lungsim ngeina pua a ana tou chu ahung mu va; huin a lauta uhi.

¹⁶Huleh a mute’n dawi matpa tunga sil tundan leh, voh umtan bang amahuh ana hilh va.

¹⁷Huin amah chu a gam va kipan pawtkhe diingin a ngenta uhi.

¹⁸Huleh amah kuang a, a luut kuanin dawi paaipa’n a kawma um diing a ngen a.

¹⁹Hizongleh Jesu’n a phal sih a, a kawmah, Na inn ah na lawmte kawmah chiah inla, Lalpa’n nanga diing a sil loupi ahung bawlsah daante leh, nang ahung hehpih daante va hilh in, a chi zawta hi.

²⁰Huin a chiah a, Jesu’n amah diing a sil loupi a bawlsah daante Dekapoli khua ah a taangkoupihta a; huleh mi zousiah in limdang a sa mahmah uhi.

²¹Huleh Jesu kuang a gaalkhat lama ahung kai kiitin mipi tampi a kawmah ahung paikhawm va; huin amah chu diil pangah a um a.

²²Huleh, ngai in, kikhopna inn a vaihawmte laha mi khat, a min Jaira kichi a hung a; Jesu a muh tahin a keeng bulaha bohkhup a,

²³Ka tanu naupang neu a si dehdeh a; ahung dam a, a hin theihna diingin, hung a a tunga na khut nga diingin ka hung ngen hi, chi'n hah nget in a ngen a.

²⁴Huleh Jesu chu amah toh a chiah a; mipi nasatahin a jui va, a tuam huthut uhi.

²⁵Huleh numei khat Kum sawmlenih sipuuta damlou a um a,

²⁶Doctor tampi lahah sil tampi ana thuaah in, a neih zousiah ana zang zouta a, bangmah phatuam louin a khawh zosem a.

²⁷Amahnu in Jesu tanchin ana ja a, a nungah mipi lahah a hung a, a puan a khoih a.

²⁸Ajiahchu a lungsim in, A puan chauh khoih leng zong ka dam mai diing, chi'n a ngaihtuah hi.

²⁹Huin a sipuut chu a kangpah a; a natna a damta chih a tahsa ah a kiheet hi.

³⁰Huleh Jesu’n a sunga kipanin silbawltheihna a pawt chih a hepah a, mipi lahah a kihei kimvel a, Koi ahiai ka puan khoih? a chi a.

³¹Huleh a nungjuite’n a kawmah, Mipi in ahung tuam huthut uh na mu ngal a, Koi ahiai hung khoih? na chih, a chi va.

³²Huleh ama’n hu sil bawlnu chu muh tum in a en kimvel a.

³³Hizongleh numeinu in a tunga sil kibawl he in, lau leh kituun pum in a hung a, a ma ah a bohkhup a, a kawmah thudih zousiah a hilhta hi.

³⁴Huin ama’n amahnu kawmah, Tanu, na ginna in ahung damsahta hi; hamuangtah in chiah inla, na natna kipanin damta in, a chi a.

³⁵Ama’n huchia a soi laiin, kikhopna inn vaihawmtu inn a kipanin mi a hung a, Na tanu a sita ve; bang diinga Houtupa subuai nalai na hiai? ahung chi a.

³⁶Jesu’n hu thu kisoi a jah tahin, kikhopna inn vaihawmtu kawmah, Lau sin, gingta mai in, a chi a.

³⁷Huleh ama’n Peter leh Jakob leh, Jakob unaupa John chih louh in amah a juih uh a phal sih a.

³⁸Huleh kikhopna inn vaihawmtu inn ahung tung a, a na buai vengvung leh, kap a na maau jenjunte a mu a.

³⁹Huleh a luut a, a kawmvah, Bang diinga kap a hichi na hi viai? naupangnu chu a si ahi sih, ihmu ahi, a chi a.

⁴⁰Huin amahun awilou tahin a nuihsan va. Hizongleh amahuh chu a bawnun a nohdoh a, naupangnu nu leh pa leh a tonpihte a pui a, naupangnu umna ah a luut va.

⁴¹Huleh ama’n naupangnu chu a khut in a tu a, a kawmah, Talitha kumi, a chi a; huchu, Naupangnu thou in, ka hung chi ahi, chihna ahi.

⁴²Huin naupangnu chu a thou a, a paipah ngal a; amah chu kum sawmlenih mi ahita him a. Huin amahun nasatahin limdang a sa uh.

⁴³Huleh ama’n a kawmvah hi thu koimah in a heet louh diing a chi tinten a; Huleh amahnu chu neeh diing bang aha piah diing thu a pia hi.